Sorte dispar para os equipos de fútbol base do Armenteira C.F. na primeira xornada de liga

Os equipos de fútbol base do Armenteira C.F. iniciaron esta fin de semana a liga. O primeiro en facelo foi o equipo alevín, que recibiu na mañá do sábado ao Céltiga. A inexperiencia, a falta de rodaxe e de efectivos deste grupo de xogador@s púxose en evidencia ante un rival moi superior, que acabou derrotando ao equipo verdinegro por cero goles a dezaséis. Ante todo o conxunto que dirixe Valentín Estévez mantén as gañas e a ilusión e agardan que en non moito tempo os resultados do seu traballo comecen a chegar.

O segundo equipo do Armenteira C.F. en porse en marcha na liga foi o conxunto infantil, dirixido por Martín Casais, que visitou o campo de Monte Redondo, en Corón, onde acabou sendo derrotado por cinco goles a un polo conxunto local do S.D. Chispa. Trátase dun conxunto aínda en formación, pero que no que comezan a observar progresos en canto a acoplamento e ritmo do grupo de xogadores, polo que o corpo técnico se mantén esperanzado de cara respecto do futuro desta escadra. A reseñar o bonito gol obra de Santi.

O domingo pola mañá deu comezo a liga para o conxunto alevín do Armenteira C.F. O equipo que dirixe Jonathan Crespo visitou o campo de A Rapeira, en Portas, onde foi recibido polo C.D. Portas, e alí deu mostras de solvencia e solidez, acadando unha vitoria por un gol a cinco, con tantos obra de Rubén, Mosteiro e Zubo. O corpo técnico e a Xunta Directiva teñen postas moitas esperanzas neste grupo de xogador@s, e confían en que a continuidade do bo traballo que está a facer con este colectivo depare unha temporada exitosa.

Finalmente, o último equipo do Armenteira C.F. en saír a competir foi o conxunto cadete, que visitaba o campo de O Buelo, en Moraña, nun encontro no que chegou a ir vencendo por cero goles a dous, con goles obra de Villa e Mathias, pero no que acabou cedendo os tres puntos cun gol do equipo morañés no último minuto. As moitas adversidades ás que se enfrontou o grupo que dirixe Marcial Prado durante a pretemporada parecen empezar a superarse e, a pesares de tratarse dunha plantilla curta, a calidade dos xogadores e a forza do grupo debe ser garantía dunha boa temporada.

Primeira vitoria da temporada para o Armenteira Veteranos

O Armenteira Veteranos logrou na tarde do pasado sábado a súa primeira vitoria da temporada, na que debuta no grupo 4A da liga de veteranos da zona de Pontevedra. Foi no Campo Municipal de Monteporreiro ante o equipo local, o Monteporreiro C.F. Veteranos, nun partidos con moitas alternativas, no que ambos conxuntos puideron levarse o triunfo, pero no que a calidade de Jorge Castro, autor dos dous tantos visitantes, serviu para decantar a balanza a favor do equipo meisino. Con esta vitoria o equipo que capitanea José Luís Galiñanes sitúase no décimosegundo posto da clasificación e alónxase das prazas de descenso.

Exitoso paso da Volta Ciclista a Galicia pola parroquia de A Armenteira

A Armenteira volveu a ser este domingo escenario dunha competición ciclista. Nesta ocasión foi a edición do 2015 da Volta Ciclista a Galicia que, na súa última etapa, con principio e final na cidade de Pontevedra, trascurriu polas terras desta parroquia meisina. Os ciclistas tiveron que coroar o porto de montaña de O Busto, de segunda categoría, para dirixirse posteriormente a A Escusa, e descender de novo polo vial que conduce ao mosteiro. Esta etapa final finalizou coa victoria do corredor manchego do Supermercados Froiz Pedro Merino, mentras que o vasco Aitor González, do equipo Ampo Goierriko, se adxudicou unha vez máis a clasificación xeral final.

Un Armenteira Veteranos moi mermado cae derrotado ante o Pescados Nieves

As numerosas baixas que sufriu o Armenteira Veteranos a causa das tarefas da vendima, que mantiveron ocupados a varios membros do seu plantel, lastraron a este equipo no seu terceiro partido de liga ante o conxunto sanxenxino do Pescados Nieves. O equipo celeste viuse obrigado a comezar o encontro con dez xogadores e, a pesares de que dous efectivos máis se foron incorporando co transcurso do partido, a superioridade numérica do rival e o cansanzo fixeron que, o gol de Jorge Castro que permitiu que fosen con ventaxa ao descanso, fose insuficiente e provocase a segunda derrota da temporada para a escuadra celeste. A próxima fin de semana desprázanse a terras pontevedresas para rendir visita ao Monteporreiro C.F. Veteranos, agardando poder contar xa con maior número de efectivos.

O equipo infantil do Armenteira C.F. sofre unha severa derrota no súa primeira proba de pretemporada

O equipo infantil do Armenteira sufriu unha estrepitosa derrota na súa visita ao campo de As Cachizas, en Dena, onde foi derrotado por once goles a cero polo conxunto da vila meañesa, A falta de rodaxe, xa que a falta de efectivos impediulle ao corpo técnico traballar con normalidade, e a falta de acoplamento, xa que a maior parte dos xogadores era a primeira ocasión na disputaban un partido xuntos, fixo que o equipo dirixido por Martín Casais dese unha imaxe endeble. A pesares diso o técnico amosouse satisfeito sobre todo pola imaxe dada no primeiro período e polas conclusións que lle permitiu sacar o encontro. A próxima fin de semana o equipo desprazase a Corón para disputar o seu primeiro partido de liga ante o S.D. Chispa.

O bo tempo acelera as tarefas da vendima na parroquia de A Armenteira

O bo tempo que tixo esta fin de semana na comarca de O Salnés, permitiu que os viticultores puidesen avanzar coas tarefas da vendima. Na parroquia de A Armenteira, onde os viñedos de castes coma a folla redonda, a catalán ou a albariña abundan sobre todo en lugares coma Castiñeiras, Fofán, Gondes, Pereiras, Cabeza de Boi, As Congostras, Couso ou Silván, lugares que reciben unha maior insolación e se atopan a menor altitude, as xentes dirixíronse estes días ás leiras para acelerar a recollida das uvas, despois de que o paso da cicloxénese a principios da semana, retardase esta actividade. A maior parte dos agricultores da parroquia agarda dar por rematado este traballo a principios da vindeira semana.

O Armenteira Veteranos recibe a visita do Pescados Nieves na terceira xornada de liga

Despois do punto sumado a pasada fin de semana en Cangas ante o Montecarrasco, o Armenteira Veteranos recibe este sábado a partires das 18 horas, no campo de O Leixo, a visita do Pescados Nieves, un equipo que tamén suma un punto no que levamos de temporada, polo que, a priori, o encontro se presenta igualada. A pesares de que o equipo celeste terá previsiblemente numerosas baixas a causa das tarefas da vendima na que se atopan inmersos moitos dos seus xogadores agardan conseguir a primeira vitoria da temporada ante o conxunto de Sanxenxo.