O Armenteira Veteranos cae derrotado en Pontearnelas nun partido marcado pola polémica

FICHA TÉCNICA

S.D. PUENTEARNELAS - ARMENTEIRA VETERANOS - 3 - 2

ARMENTEIRA VETERANOS: Sirra; Jorge Dávila, Carlos Castro, Óscar Muñiz, Moncho; Martín, Carlos Muniz, Javi, Óscar Barreiro; Galiñanes e Jorge Castro. Tamén xogaron Rubén, Avelino, Manolo, Rafa, Marcial e Yumas.

GOLES: 0-1. Minuto 9. Jorge Castro. 1-1. Minuto 21. Rafael Pintos, de penalti. 1-2. Minuto 55. Marcial. 2-2. Minuto 67. Víctor Romero. 3-2. Minuto 80. Rafa Fernández.

ÁRBITRO: Núñez Veget. Mostrou cartóns amarelos a Julio Cores por parte da S.D. Puentearnelas e a Galiñanes e a Moncho por parte do Armenteira Veteranos, e cartón vermello directo a Óscar Barreiro por parte do Armenteira Veteranos.

INCIDENCIAS: Partido da terceira da Terceira Galicia de Veteranos. Grupo 2, disputado no campo de As Chans, ante uns trinta espectadores, nunha soleada e calorosa, e sobre un terreo de xogo lixeiramente seco, aínda que nunhas condicións aceptables para a práctica do fútbol.

CRÓNICA

O Armenteira Veteranos perdeu outra oportunidade para acadar a primeira vitoria da temporada 2019/2020. Parecía a ocasión propicia para inaugurar o casilleiro de triunfos, pero, por diversas circunstancias, este feito non foi posible. A desacertada arbitraxe de Núñez Veget, excesivamente nervioso, inseguro e con moitas dúbidas, acabou prexudicando os intereses dun Armenteira Veteranos que, por outra banda, tampouco conseguiu reflectir no marcador a superioridade que a priori parecía ter sobre o terreo de xogo. O encontro comezou de cara para os visitantes. Manexando a posesión e movendo e balón con relativa comodidade non atopaban demasiados atrancos para chegar á área rival. Con apenas nove minutos disputados Jorge Castro culminaba maxistralmente unha xogada colectiva e adiantaba ao Armenteira Veteranos. Todo parecía poñerse de cara ata que un penalti sinalado por Núñez Veget ao decretar man cando Javi repelía un lanzamento de córner da S.D. Puentearnelas. As protestas dos futbolistas de A Armenteira non surtiron efecto e a pena máxima acabaría sendo convertida por Rafa Pintos. Este gol e unha serie de cambios que modificaron a disposición dos xogadores sobre o campo trastocaron a estratexia do Armenteira Veteranos.A isto uníanse os problemas físicos de Jorge Castro, a gran referencia ofensiva dos verdinegros, que por estrivo moi lonxe do seu nivel habitual. As lesións de Carlos Castro e de Óscar Muniz deixaban desguarnecido o centro da zaga dun Armenteira Veteranos comezaba a dar síntomas de debilidade. Uns man a man dos dianteiros locais, magnificamente solventado polo gardamallas Sirra foron un aviso. Con todo, o cadro visitante aínda tiña a sensación de sentirse superior sobre a superficie de herba artificial do campo da parroquia de Tremoedo. O camiño cara o triunfo parecía abrirse na segunda metade, cando Marcial destapou o tarro das esencias e, mediante unha minivaselina superaba a saída de Julio Cores e enviaba o coiro ao fondo da rede. Pero os plans visitantes volvían frustrarse, e un contraataque da S.D. Puentearnelas, rematado cunha cabezada de Víctor Romero no segundo pau, situaba de novo a igualada. Coa esperanza de levarse os tres puntos o Armenteira Veteranos buscaba entrar polos costados, onde tanto Manolo pola esquerda como Marcial pola dereita se mostraban moi incisivos. Faltaba o remate de Jorge Castro. Cando semellaba que o resultado conducía ao empate unha polémica decisión do colexiado, ao sinalar unha infracción no borde da área do Armenteira Veteranos, acabaría coas esperanzas verdinegras. Non fixo caso Núñez Veget ás reclamacións de Javi, que lle indicaba que a infracción fora cometida polo atacante local, acción que este recoñeceu e, tras expulsar a Óscar Barreiro por un comentario que deu en considerar despectivo, autorizou o lanzamento da falta. Fran Fernández, ex-futbolista do Armenteira Veteranos, colocaría o esférico na escadra de Sirra e botaría por terra as opcións dun cadro visitante que cun home menos vía moi reducidas as opcións de sumar algún punto na súa visita a Pontearnelas. O marcador final de tres tantos a dous mantén aínda ao conxunto de O Leixo sen punto algún tras tres xornadas disputadas. Unha mala noticia para un equipo que esta semana, ao contrario que viña sucedendo nos últimos encontros, presentaba unha ampla relación de xogadores, entre os cales cabe destacar a Yumas, que este sábado debutaba coa camisola verde e negra. A próxima fin de semana o Armenteira Veteranos terá que recibir no campo de O Leixo ao equipo vilagarcián da Asociación Deportiva de Veteranos Fátima, que ocupa a undécima posición con tres puntos.

Vitoria do Armenteira C.F. feminino ante a E.D.M. Salceda F.F. tras un intenso e emocionante partido

FICHA TÉCNICA

ARMENTEIRA C.F. - E.D.M. SALCEDA F.F. - 2 - 1

ARMENTEIRA C.F.:Lola; Alba, Rocío; Anabel, Sara Torres, Sara Rey; e Nerea. 

ÁRBITRO: Asensio Fariza. Non mostrou cartóns amarelos a ningún dos dous equipos.

INCIDENCIAS: Partido da terceira xornada da primeira fase da Liga Feminina de fútbol-7, que se  disputou no campo de O Leixo, ante uns vintecinco espectadores, nunha mañá soleada e calorosa e sobre un terreo de xogo cunha superficie excesivamente dura e irregular..

CRÓNICA

O equipo feminino do Armenteira logrou estrear o seu casilleiro de vitorias na temporada 2019/2020. Na terceira xornada e ante un rival que se prevé que loite polos mesmos obxectivos que as rapazas que adestra Marcial Prado, o cadro verdinegro venceu ao seu adversario tras un partido cheo de intensidade e emoción, no que destacou o gran traballo e compromiso colectivo, aínda que personalizado en dúas xogadoras: Alba, autora dos dous tantos locais, e Lola, a gardamallas, que detivo unha pena máxima nos intres finais do encontro. Con só sete futbolistas dispoñibles e, en consecuencia, sen ningún recambio no banco de suplentes, o Armenteira C.F. atopábase unha vez máis nunha situación nada favorable para afrontar os sesenta minutos de xogo. Con todo, axiña conseguiu poñerse en vantaxe grazas a unha excepcional cabalgada dende a zona defensiva de Alba que ela mesma culminou enviando o coiro ao fondo das redes defendidas por María Silva. Apenas dous minutos despois a futbolista de San Miguel ampliaría vantaxe para as locais. Sería tras unha excepcional execución dun lanzamento de falta, ante a que nada puido facer a meta visitante. En base a unha forte presión e á intensidade defensiva, o Armenteira C.F. trataba de contrarrestar o intento de trazar xogadas combinativas por parte das de Salceda de Caselas. Un balón bombeado que sorprendeu a Lola permitiría ao equipo visitante recurtar distancias. Puideron lograr a igualada despois dun rigoroso penalti sinalado por un Asensio Fariza moi pouco afortunado nesta mañá en O Leixo, pero a lanzadora das do Baixo Miño enviou o balón un metro á dereita da portería local. No segundo período mantívose o equilibrio. As pretensión de xogo combinativo da E.D.M. Salceda atopábanse unha e outra vez coa labor destrutiva das de A Armenteira, lideradas dende a zaga por Alba, que de novo volveu estar espléndida. Foi incrementando o ritmo o cadro visitante e froito delo atopouse con outro penalti, desta vez menos rigoroso. O lanzamento das de Salceda daría a oportunidade de lucirse á gardamallas Lola que, mediante unha brillante intervención, evitaría o empate. Nos últimos minutos o xogo endureceuse ao tempo que a tensión sobre o terreo de xogo ía en aumento. Unha sucesión de saques de curruncho deron emoción aos suspiros finais dun encontro que deixa ao Armenteira C.F. con catro puntos puntos no seu haber, unha cifra máis ca envexable, tendo en conta as dificultades para pór en marcha o equipo e a escaseza de efectivos que aínda segue sufrindo a escadra que dirixe Marcial Prado. Haberá que agardar dúas semanas para ver de novo ás mozas do conxunto verdinegro en competición, pois a Xunta Directiva está xestionando co Club Peñasco o aprazamento do partido da próxima xornada. Ata catro xogadoras estarán ausentes a próxima fin de semana, polo que fan imposible disputar un encontro que posiblemente se acabe trasladando para o 8 de decembro.

A hora da política local

Cando imos camiño dunhas novas eleccións xerais a actividade política tanto a nivel estatal, como a nivel autonómico e local non se detén. A falta de acordo e do mantemento dun permanente goberno en funcións parecen provocar certo desapego respecto das decisións que se toman dende Madrid, pero non aparentemente non ocorre o mesmo cos asuntos municipais. Por este motivo, este venres, 27 de setembro hai unha nova cita coa política municipal do Concello de Meis. A partires das 20:30 horas, no salón de plenos da Casa Consistorial terá lugar unha nova sesión ordinaria dun pleno municipal no que abordarán temas que interesan sobremaneira aos veciños e veciñas do Concello en xeral e da parroquia de A Armenteira en particular. Agárdase unha sesión longa, pero de gran interese. Entre as cuestións a tratar están a proposta de festas locais para 2020 ou a ratificación do acordo da Xunta do Goberno Local sobre o nomeamento do representante na Fundación Monte Castrove, a que se encarga de xestionar o Campo de Golf de Meis. Asimesmo, someteranse a debate e votación unha serie de mocións presentadas polos grupos municipais do BNG e do PSdeG-PSOE relativas á igualdade e a loita contra a violencia de xénero, á emerxencia climática ou en defensa da sanidade pública, especialmente co motivo da polémica suscitada pola falta de facultativos e do servizo de pediatría nos centros médicos do municipio ao longo deste verán. Tamén se tratarán e votarán temas como o impulso social da lingua galega no Concello, a solicitude á Xunta de Galicia para levar a cabo un cambio real na política de conservación dos ríos da provincia de Pontevedra ou a reclamación a esa mesma administración dun compromiso máis firme en materia educativa. O acto completarase cunha serie de cuestións de natureza orzamentaria e económica e coa posta en coñecemento das resolucións da alcaldía. Será de novo unha oportunidade de contemplar en vivo o desenvolvemento da política local e coñecer aspectos da realidade do Concello de Meis e da parroquia de A Armenteira a través da representación democrática elixida pola veciñanza o pasado 26 de maio e que tras corenta anos de gobernos conservadores pasou a mans dun executivo socialista presidido por Marta Giráldez, a primeira muller que ostenta o bastón de mando na historia da Corporación meisina.

O Armenteira Veteranos deixa escapar tres puntos nos últimos minutos do partido do regreso de Jorge Castro

FICHA TÉCNICA

ARMENTEIRA VETERANOS - A ESTRADA VETERANOS - 2 - 3

ARMENTEIRA VETERANOS: Sirra; Jorge Dávila, Carlos Castro, Óscar Muñiz, Avelino; Óscar Barreiro, Carlos Muniz, Javi, Martín; Galiñanes e Jorge Castro. Tamén xogaron Moncho e Rafa.

GOLES: 0-1. Minuto 40. José Varela. 0-2. Minuto 48. Juan Mosquera. 1-2. Minuto 63. Jorge Castro. 2-2. Minuto 66. Emilio Constenla, en propia meta. 2-3. Minuto 87. Manuel Martins.

ÁRBITRO: Velasco García. Mostrou cartóns amarelos a Francisco Freire por parte do A Estrada Veteranos, a Moncho por parte do Armenteira Veteranos e expulsou por doble cartón amarelo a Javier Álvarez despois dunha discusión que se produciu na última xogada do encontro.

INCIDENCIAS: Partido da segunda xornada da Terceira Galicia de Veteranos. Grupo 2, disputado no campo de O Leixo, ante uns quince espectadores, nunha temperada e nublada, e sobre un terreo de xogo excesivamente enlameado e esvaradizo, nunhas condicións moi pouco aptas para a práctica do fútbol.

CRÓNICA

O Armenteira Veteranos deixou escapar tres puntos nos minutos finais do partido que supoñía o regreso de Jorge Castro coa camisola verdinegra. O atacante de Vilar, que a pasada temporada non puido participar en ningún encontro por motivos laborais, regresaba este sábado ao campo de O Leixo coa intención de rescatar a un equipo que non acaba de superar a mala xeira de resultados que vén arrastrando dende fai un ano, e que o levou a un descenso de categoría. O partido comezou de forma favorable para o conxunto local. Mantendo a posesión do balón e xogando case sempre en campo contrario, o Armenteira Veteranos sentíase cómodo sobre a superficie de lama dun terreo de xogo que, como ocorre habitualmente nos días de choiva, se ía volvendo impracticable coa acumulación de pegadas. Un disparo de Jorge Castro que repeliu o pau esquerdo da portería defendida por Santiago Gañete foi a ocasión máis clara para os verdinegros nestes primeiros minutos. Custáballe retomar o tacto co balón ao goleador do Armenteira Veteranos e non era quen de irse dos defensores coa facilidade que acostuma. Co paso dos minutos o cadro local foi cedendo terreo e o A Estrada Veteranos empezou a deixarse ver con tímidas aparicións polas proximidades da meta custodiada por Sirra. Un man a man entre un dianteiro estradense e o gardamallas de Couso, que este último resolveu maxistralmente, foi un aviso de que o perigo ía ser real. A escasos minutos do descanso, unha falta colgada á área era rematada no segundo pau ao fondo da rede por José Varela completamente libre de marca. No segundo período o Armenteira Veteranos continou desorientado. Non era quen de facerse co control do xogo e a falta de confianza e mesmo a desmotivación era evidente nos seus xogadores. Unha internada polo costado esquerdo do ataque visitante por parte do hábil extremo Juan Mosquera era culminada polo propio futbolista estradense para poñer o que semellaba ser a sentenza. Incluso a vantaxe puido ampliarse se un rebote dunha parada de Sirra que foi dar en Óscar Muñiz non fose freada pola lama que cubría a liña de gol. Case desesperado e sen apenas argumentos, o conxunto de O Leixo mantiña como única opción que algún pelotazo acabase nos pés de Jorge Castro e que este volvese a sacar o manual de recursos ofensivos que tanto dano soe causar ás defensas rivais. E isto foi o que ocurriu. Dous ramalazos do dianteiro de Vilar remataron en sendos goles e permitiron lograr unha igualada coa que minutos antes nin soñaban os locais. Chegaron incluso a crer na vitoria, pero outra xogada a balón parado, unha falta novamente colgada á área polo A Estrada Veteranos, foi rematada polo corpulento defensa central dos da Terra de Tabeirós e, ante a resposta de Sirra, o balón quedou morto na área para que Manuel Martins remachase a gol. Foi sen dúbida un mazazo para un Armenteira Veteranos que daba por bo o empate tras un partido moi desacertado. Unha disputa nas inmediacións da área estradense provocou que o colexiado Velasco García acelerase o asubío final e solucionase este amago de conflito cun par de cartóns amarelos, un para o xogador local Moncho, e outro para Javier Álvarez, que neste caso era o segundo. Sen demasiado tempo a laiarse do sucedido este sábado o Armenteira Veteranos tratará de resarcirse desta derrota na visita que o próximo sábado rendirá ao campo de As Chans, onde se medirá á S.D. Puentearnelas, décimo terceiro clasificado cun punto no casilleiro.

Inicio de liga con empate para o Armenteira C.F. feminino ante o Caldelas C.D.

 FICHA TÉCNICA

ARMENTEIRA C.F. - CALDELAS C.D. - 0 - 0

ARMENTEIRA C.F.:Lola; Alba, Sara Torres; Sara Rey, Anabel; e Tatiana. Tamén xogou Rocío.

ÁRBITRO: Castrelo Dabouza. Non mostrou cartóns amarelos a ningún dos dous equipos.

INCIDENCIAS: Partido da primeira xornada da primeira fase da Liga Feminina de fútbol-7, que se disputou no campo de O Leixo, ante uns quince espectadores, nunha mañá moi soleada e calorosa e sobre un terreo de xogo nunhas condicións aceptables.

CRÓNICA

O equipo feminino do Armenteira comezou cun aceptable resultado a súa segunda aventura la Liga feminina de fútbol-7. Nunhas circunstancias nada favorables, cunha notable escaseza de efectivos e no medio dunha calor abafante, sobre 30 graos durante boa parte do partido, o conxunto que dirixe por cuarta temporada consecutiva Marcial Prado logrou resistir os elementos e conseguir que un dos tres puntos en xogo se quedase en O Leixo. Comezou o cadro local con só seis xogadoras sobre o terreo de xogo, unha menos do que establece o regulamento, debido que Rocío, por motivos laborais, chegou ás instalacións deportivas do lugar de O Busto cando se levaban disputados uns cinco minutos. O colexiado Castrelo Dabouza, amparándose na normativa, non deixou que a futbolista pontevedresa se incorporase ao partido ata o segundo período. En inferioridade numérica o cadro local plantou cara ás de Caldelas de Tui, dispoñendo nos pés de Tatiana dunha das escasas ocasións deste primeiro período. Con Rocío xa sobre a superficie de terra de O Leixo, na segunda media hora de xogo mantívose a tónica da parte inicial. O fútbol disputábase basicamente na zona de mediocampo e as ocasións eran contadas. As máis claras deste segundo período foron para o conxunto visitante, sobre todo un lanzamento que, tras impactar no longueiro, caiu sobre a liña de gol da portería defendida por Lola. Todo finalizou cun reparto de puntos que, a tenor do contemplado na calorosa xornada de fútbol do mediodía deste sábaxo, foi a todas luces xusto. A próxima fin de semana o Armenteira C.F. realizará un dos desprazamentos máis longos dos que lle agardan esta temporada, concretamente ata a localidade de A Cañiza, na que se medirá, no campo de Augas Férreas, ao cadro local do A.D. Cañiza C.F. Feminino, un dos equipos que a priori está destinado a ocupar os postos altos da táboa.

A Armenteira será de novo protagonista este sábado no programa Bamboleo da CRTVG

A CRTVG emite este sábado, 14 de setembro, a partires das 22:00 horas, unha nova edición do programa Bamboleo. Pero non será un programa calquera, senón que terá un especial significado para A Armenteira, xa que nunha das seccións participará unha representación da parroquia. Ao igual que ocorrera o pasado ano, neste 2019 Asociación de Veciños e Veciñas de A Armenteira, conxuntamente co Armenteira C.F., enviaron unha delegación ao Plató 1.000, na localidade de Montouto, no Concello de Teo, para asistir a un dos programas con máis éxito da canle autonómica. Actualmente presentado por Lucía Regueiro, mentres Xosé Manuel Piñeiro se recupera duns problemas de saúde, este espazo televisivo que aúna música, baile e humor, terá entre as aproximadamente 200 persoas que ocupan o lugar de gravación a un grupo de persoas procedente de A Armenteira. Xunto á Orquesta Trébol, á cantante Lucía Pérez ou ao artista Ariel de Cuba, o nome da parroquia será un dos grandes protagonistas durante o programa. Nunha das seccións competirá un equipo representando á Asociación de Veciños e Veciñas de A Armenteira, no que destacará a presenza de Manolo Vázquez, coñecido polo seu papel de solista no grupo Los Vázquez e que nesta ocasión probará sorte ante as cámaras da Televisión de Galicia. A voz de Manolo Vázquez mesturarase coa de recoñecidos artistas a nivel galego, español e internacional e faranos disfrutar dun espectáculo televisivo que semana tras semana non defrauda á súa fiel audiencia.

O Armenteira Veteranos inicia en Castrelo a súa aventura na Terceira Galicia de Veteranos

O Armenteira Veteranos inicia este sábado, 14 de setembro, a partires das 19:30 horas, no campo Municipal de Castrelo, a súa aventura nunha nova categoría, a Terceira Galicia de Veteranos. Tras as dificultades que tivo que afrontar a pasada temporada, na que sufriu numerosas e importantes baixas, que provocaron que o equipo se presentase na maior parte dos partidos moi escaso de efectivos, o cadro verdinegro terá que participar este ano nunha categoría inferior. O descenso supoñerá ademais que teñan que realizar desprazamentos máis longos, xa que no grupo figuran conxuntos de localidades como Santomé de Piñeiro, no Concello de Marín, ou A Estrada. Pero tamén significará unha oportunidade para retomar a senda dos resultados favorables, tendo en conta ademais que para esta campaña volverá contar coa presenza de Jorge Castro, xogador franquicia e principal referencia goleadora do Armenteira Veteranos durante os últimos anos, e que, por motivos laborais, estivo ausente durante a temporada 2018/2019. Para comezar esta aventura o calendario deparou un duelo de rivalidade, ante un conxunto como o Castrelo C.F. Veteranos, un rival tradicionalmente compricado, especialmente no seu terreo de xogo, con superficie de terra, como o de O Leixo. Será nunha xornada condicionada polas tarefas de vendima, o que fará que ambos os dous equipos, pertencentes a unha comarca na que abundan as explotacións vitivinícolas, se vexan en apuros para reunir os futbolistas suficientes para disputar un encontro que nas últimas edicións destacou pola emoción e a igualdade e que medirá a dous conxuntos que aspiran a ocupar a zona media-alta da táboa.

O equipo feminino do Armenteira C.F. xa coñece o calendario para a temporada 2019/2020

A Real Federación Galega de Fútbol vén de dar a coñecer o calendario da primeira fase do grupo único da liga feminina da modalidade de fútbol-7 no que participará o equipo sénior feminino do Armenteira C.F. O conxunto que dirixirá por cuarta temporada consecutiva o meisino Marcial Prado compartirá grupo con equipos pertencentes na súa maioría á zona de Vigo e do sur da provincia de Pontevedra, co que terá que afrontar de novo longos desprazamentos nos encontros que dispute como visitante. Son rivais coñecidos polo conxunto verdinegro, pois xa se enfrontou a todos eles na pasada campaña. O comezo da liga está fixado para a próxima fin de semana, cando o Armenteira C.F. reciba ao Caldelas C.D., un equipo da localidade de Caldelas de Tui, que na temporada 2018/2019 tivo que visitar o feudo das de A Armenteira, aínda que o mal estado no que se atopaba aquel día o campo de O Leixo obrigou a que o partido se acabase disputando no campo Municipal de Meis, en O Mosteiro. Será a primeira proba para unha escadra que iniciou a pretemporada cunha notable escaseza de efectivos e que está á espera de incorporar algunhas xogadoras para poder afrontar con garantías a primeira fase dunha competición que se disputará a partido único e que finalizará o 12 de xaneiro, dando paso a unha segunda liguiña na que os equipos se distribuirán en función da clasificación acadada nesta fase inicial.