O proxecto de creación dunha nova asociación veciñal en A Armenteira bota a andar

O grupo de veciños e veciñas que promoven a creación dunha nova entidade veciñal na parroquia de A Armenteira puxo este martes na reunión que celebraron nas instalacións do campo de fútbol de O Leixo a primeira pedra para construír unha asociación que pretenden que sirva para representar á poboación desta parroquia e defender os seus dereitos e intereses ante as distintas institucións. Ante un nutrido grupo de asistentes os promotores desta iniciativa escoitaron as numerosas demandas dos alí presentes explicaron os pasos a levar a cabo para a constitución desta asociación e as funcións que cumpriría. O malestar das persoas que acudiron a O Leixo era evidente, sobre todo en relación coa imposibilidade de realizar este tipo de actos na Casa de Cultura, a cal está reservada exclusivamente para ser utilizada como albergue de peregrinos, sen que as xentes de A Armenteira poidan acceder a ela. A lentitude das obras que se están acotemento neste local, que permitiría dividir o edificio en dúas prantas, unha reservada para uso veciñal  e outra como albergue, fai que a desconfianza da veciñanza vaia en aumento. Estas e outras demandas tratarán de ser defendidas por esta nova entidade que nace coa intención de facer oír a voz das xentes dunha parroquia que, segundo eles, foi durante tanto tempo silenciada.

Emotivo relevo na xerencia do Café Bar O Comercio

O Café Bar O Comercio viviu esta fin de semana un emotivo relevo na xerencia neste local tan emblemático na vida dos veciños e veciñas de A Armenteira. María Rodríguez e Diego Dadín decidiron poñer fin a un proxecto que iniciaron fai dous anos. Neste período, María e Diego, coa súa entregada labor gañáronse o cariño e a simpatía da numerosa clientela que conseguiron atraer cara o seu local. Os bocadillos, as tapas, as copas e a atención que tan amablemente prestaban convertiu ao Café Bar O Comercio nun referente no ocio e na hostalería da contorna e, especialmente nas fins de semana e nos períodos vacacionais de Semana Santa e do verán, o ambiente deste establecemento nada tiña que envexar ao de moitos locais das principais zonas turísticas. A casualidade fixo coincidir este cambio na xerencia co cumpreanos de María, o que foi aproveitado polos seus achegados para organizar unha gran festa que congregou a un gran número de persoas. Estes veciños de Couso inician agora unha nova etapa profesional, como tamén o fará María, a outra María Rodríguez, que ocupou o cargo de camareira nos últimos meses e pola que tanto aprecio sentía a clientela. O relevo será tomado agora por Serafín Melón, un veciño de O Busto cunha ampla experiencia no mundo da hostalería, que durante anos rexentou a cafetería do Parlamento de Galicia en Santiago de Compostela.

Primeiros pasos para a constitución dunha nova entidade veciñal en A Armenteira

O grupo de veciños e veciñas de A Armenteira que promove a creación dunha nova entidade veciñal para a parroquia comeza a dar os primeiros pasos. Tras a definición das ideas iniciais e a fixación dos obxectivos de partida, os promotores desta iniciativa convocan para este martes día 31 de maio, a partires das 21 horas, no campo de fútbol de O Leixo, a todas aquelas persoas interesadas en formar parte deste proxecto. No manifesto redactado para chamar á movilización da veciñanza o autodenominado Movemento pola Unidade Veciñal afirma que pretende crear unha asociación que non só leve a cabo actitudes lúdicas, formativas e culturais, senón que tamén sirva de instrumento de defensa dos dereitos e os intereses das xentes da parroquia, e fai un alegato a prol da unidade para facer fronte aos principais problemas e preocupacións dos veciños e veciñas de A Armenteira.

Paso importante para o equipo alevín e resultados menos afortunados para os demais equipos do Armenteira C.F.

A xornada de liga desta fin de semana, a trixésimo segunda no que vai de liga para os equipos cadete e infantil e a primeira eliminatoria da promoción de ascenso para o equipo alevín, depararon uns resultados dispares para os equipos de fútbol base do Armenteira C.F.

O equipo cadete visitaba na mañá do sábado o campo Municipal de Burgáns, onde debía medirse ao C. Xuventude Cambados. O cadro dirixido por Marcial Prado non soubo adaptarse ben ao céspede de herba natural do campo de Vilariño, e cedeu dende o inicio o dominio do balón aos locais. Con todo, aínda que na primeira metade a iniciativa correspondeu ao conxunto amarelo, os visitantes gozaron de claras ocasións nos pés de Marcos Acha e de Carlos Soto. Pero un golazo de Diego Rial dende o borde da área, ante o que nada puido facer o meta Yago, servía para adiantar aos cambadeses ante a desesperación da afección que dende as bancadas non deixaba de animar aos verdinegros. No segundo período o Armenteira C.F. decidiu imprimirlle un cambio de ritmo ao encontro, impulsado pola brega e o temperamento do sempre combativo Alberto. Pecharon na súa área ao C. Xuventude Cambados, pero a falta de claridade na resolución nas xogadas e a mala fortuna impediron que o balón rematase no fondo da rede. Estas accións ofensivas, que a escadra verdinegra realizaba con máis corazón ca cabeza, foron diluíndose co paso dos minutos, permitindo que os amarelos se fosen achegando con máis frecuencia aos dominios de Yago. Foi nunha desas incursións cando Borja Cores, recolleu un rexeitamento tras unha gran parada do meta do Armenteira C.F. para anotar o dous a cero co que remataría o encontro. A próxima fin de semana os de Marcial Prado recibirán a visita do C. Xuventú Sanxenxo, undécimo clasificado con vintetrés puntos, no que se será un duelo de rivalidade que se antolla crucial para que os de O Leixo poidan asegurar o sétimo posto na clasificación final.

O equipo infantil tiña unha durísima proba este domingo no campo de O Pombal. Recibía a visita do C. Vilagarcía S.D., un conxunto que ocupa a segunda praza na clasificación e que aínda ten opción de arrebatarlle a primeira posición ao San Martín C.F. O conxunto dirixido por Martín Casais preséntase moi debilitado sobre o céspede cambadés, xa que non puido contar para esta cita con ningún dos xogadores do equipo alevín, que veñen reforzando habitualmente a este conxunto, pero que neses momentos debían afrontar a primeira eliminatoria da promoción de ascenso. Con só once xogadores na convocatoria o técnico de Vilar tratou de plantexar un partido no que puidese frear na medida do posible as acometidas dun rival tan superior como o cadro vilagarciano. O gol do centrocampista Diego Núñez aos dous minutos adiantaba aos locais e arrincaba os aplausos do público do Armenteira C.F. Pero esta alegría foi efímera, pois o C. Vilagarcía S.D. foi impoñendo o seu potencial e co paso dos minutos os goles non deixaban de adentrarse nas mallas defendidas por Santi. O resultado de un gol a dezaséis co que rematou o partido reflicte ás claras a diferenza de recursos que mostraron sobre O Pombal ambas escadras. O equipo de A Armenteira agarda resarcirse desta severa derrota acadando un resultado positivo no encontro correspondente á vixésimo cuarta xornada que fora aprazado no seu día e que disputará este mércores a partires das 19:30 horas no campo de O Leixo, no que será o último partido como local e a primeira ocasión na que este equipo pise a superficie de terra do campo de O Busto na presente temporada.

Para finalizar, o equipo alevín afrontaba este domingo no campo de A Xunqueira, en Ponte Sampaio, o seu primeiro partido da eliminatoria da promoción de ascenso á Primeira Categoría Alevín, na modalidade de fútbol-8, ante a A.X.D. Verdugo. Os rapaces que adestra Jonathan Crespo partían con gran ilusión ante esta oportunidade que supón o merecido premio á excelente temporada que realizaron. O primeiro período foi de dominio alterno, e as ocasións sucedíanse en ambas áreas. O maior criterio co que os locais movían a pelota fixo que nun deses achegamentos Yahia Michamia adiantase ao conxunto laranxa. Na segunda metade a situación cambiou, e o Armenteira C.F. tomou o control do partido, demostrando ter unha mellor condición física ca o seu rival. Zubo revolvendo unha xogada na área e Adri mediante un precioso lanzamento de falta dende o costado dereito daban a volta á situación, poñendo o resultado de un tanto a dous que resultaría definitivo. Aínda dispuxeron os de O Leixo dalgunha oportunidade máis para afrontar con comodidade o partido da próxima fin de semana, pero o marcador non se moveu. O excelente espectáculo que ámbolos dous conxuntos ofreceron en A Xunqueira, no que os xogadores ofreceron unha gran entrega e mantiveron un alto ritmo de xogo, fixo disfrutar aos afeccionados que se desprazaron ata estas estas instalacións deportivas desta parroquia do Concello de Pontevedra. Todos eles agardarán expectantes o partido de volta, que se disputará previsiblemente en A Armenteira o domingo 5 de xuño.

Un gol de Portas rescata ao Armenteira Veteranos ante o Rayovedra

Un gol do central Portas nas postrimerías do encontro serviu para rescatar ao Armenteira Veteranos no encontro que disputou na tarde deste sábado no campo de O Leixo ante o Rayovedra. Nunha tarde chuviosa e desapacible, o cadro verdinegro, que volveu a contar de novo co apoio incondional dende as bancadas do capellán da Comunidade Cisterciense do Mosteiro de Armenteira, saiu ao terreo de xogo frío e apático, cunha falta de intensidade impropia nun conxunto no que soe basar o seu éxito no traballo colectivo e no alto ritmo de xogo. O rival, unha escadra que demostrou ter un potencial ao que indica a súa situación na táboa, tomou o control do partido dende o inicio, apoiado na fluidez na circulación da pelota e na calidade individual dalgún dos seus homes. E foi así como nunha na que a defensa do Armenteira Veteranos non foi quen de despexar como se adiantaron os visitantes. O esférico cruzou a área sen que ningún dos defensores puidese desviar a súa traxectoria e caiu nos pés dun dianteiro rival que, libre de marca, o introduciu no fondo das mallas. Na segunda metade, no medio dunha forte chuvia e cunha superficie do terreo de xogo cada vez máis enlameada, os locais adiantaron liñas e comezaron a cercar a portería do Rayovedra. Pero a fortuna non estaba do lado das cores verdes e negras, e nun malentendido entre o lateral Moncho e o meta Joserra, o balón acabou nas botas dun dianteiro visitante que, coa portería baleira, só tivo que empurrar a pelota. Parecía que o partido conducía de forma irremediable cara unha derrota do Armenteira Veteranos pero, Manueliño, remachando sobre a liña de gol un remate de Galiñanes, acurtaba distancias. E xa cando o encontro chegaba á súa fin, no período de desconto, o central Portas atopou un balón botando a uns vinte metros da meta do Rayovedra e. cunha perfecta bolea, conseguiu colalo pola escadra esquerda da portería dos visitantes, Un tanto digno dun xogador das ligas de fútbol profesional que, de ser anotado por calquera das estrelas das ligas de fútbol profesional, sería repetido unha e outra vez nos resumos televisivos, pero que, nesta ocasión só serviu para que o Armenteira Veteranos conseguise salvar un punto cun empate a dous final do que quizais non foi merecedor. Con este resultado o equipo verdinegro descende ata a sétima posición, con sesenta e un puntos, situación que agarda mellorar a próxima fin de semana cunha vitoria en O Leixo ante o Peña Rácing, un conxunto que ocupa a décima posición con corenta e nove puntos.

O Rayovedra visita O Leixo na antepenúltima xornada da liga de veteranos

O campo de O Leixo será o escenario este sábado, a partires das 17 horas, do partido da trixésimo sétima xornada de liga entre o Armenteira Veteranos e o Rayovedra. O equipo local quere manter a boa racha dos últimos encontros, que o auparon ao sexto posto con sesenta puntos, e confía en obter unha nova vitoria que lle permita manterse na loita por alcanzar a terceira posición na clasificación final. Para elo debe superar a un Rayovedra que se sitúa na décimo cuarta praza con trinta e dous puntos, pero que de seguro non vai ser un rival fácil para o conxunto que capitanea José Luis Galiñanes. O equipo de O Leixo tratará de ampararse de novo no potencial ofensivo que está mostrando nas últimas xornadas, apoiado fundamentalmente na figura do seu máximo artilleiro, Jorge Castro, que suma xa 29 goles na presente temporada.

Xornada de liga e promoción de ascenso para os equipo de fútbol base do Armenteira C.F.

Os equipo de fútbol base do Armenteira C.F. afrontan un nova xornada esta fin de semana, a trixésimo segunda de liga para os equipos cadete e infantil, e a primeira rolda da promoción de ascenso á Primeira Categoría Alevín da modalidade de fútbol-8 para o equipo alevín.

O equipo cadete disputará  o sábado a partires das 12 horas no campo Municipal de Burgáns, o antepenúltimo partido de liga. Será un duelo de rivalidade, dado o coñecemento mutuo entre boa parte dos xogadores do C. Xuventude Cambados e do Armenteira C.F. O conxunto local ocupa a décimo segunda posición, con dezasete puntos, mentres que o cadro verdinegro sitúase no sétimo posto con trinta e oito puntos. O favoritismo que a situación da táboa parece dar aos visitantes é tan só aparente, dada a igualdade que se ven exhibindo neste grupo durante o que vai de temporada. Os rapaces que adestran Marcial Prado e Víctor Saborido tratarán de apoiarse no reforzo moral que supuxo o triunfo da pasada fin de semana ante o Vilalonga F.C., un dos aspirantes ao ascenso, que coa derrota en O Leixo puxo en compricacións as súas opcións de cambiar de categoría.

O equipo infantil terá o seu turno o domingo a partires das 11:30 horas, cando reciba no seu feudo de O Pombal ao C. Vilagarcía S.D., unha potente escadra que ocupa a segunda posición con oitenta e dous puntos. Os rapaces que adestra Martín Casais afrontan moi mermadas esta díficil cita, xa que ás numerosas baixas que están presentando nos últimos encontros súmase que o equipo de categoría ese mesmo día o seu primeiro partido da promoción de ascenso, polo que non poderán cos reforzos que ese conxunto soe prestarlle. Con todo, o técnico local amósase esperanzado en manter a boa liña de xogo do último partido, no que conseguiron acadar un valioso empate no campo de Monte Redondo ante o E.D. Arousa "B".

Para finalizar, o equipo alevín visita o domingo o campo de A Xunqueira, en Pontesampaio, onde, a partires das 13 horas, debe afrontar a primeira eliminatoria da promoción de ascenso á Primeira Categoría Alevín na modalidade de fútbol-8. As seguras ausencias de Mosteiro e Pablo Casal, dúas pezas moi importantes no cadro que dirixe Jonathan Crespo, ás que previsiblemente se engadirá algunha máis, lastrarán a un conxunto que acude con moita ilusión a un partido que ven a ser o xusto premio á excelente campaña que realizaron. O rival, a A.X.D. Verdugo, presenta uns números similares aos do conxunto verdinegro na súa traxectora na liga, xa que foi quen de sumar 47 puntos, os mesmos ca o Armenteira C.F., aínda que disputou dous partidos máis. O adestrador local agarda acadar un resultado favorable para afrontar con tranquilidade o encontro de volta dentro dunha semana en O Leixo. A superficie de terra do terreo de xogo de ámbalas dúas formación fai que ningunha delas parta con vantaxe nese aspecto, aínda que o feito de xogar o partido de volta na casa pode significar un punto a favor das aspiracións do Armenteira C.F.

Bos resultados para os equipos de fútbol base do Armenteira C.F. na trixésimo primeira xornada

Os tres equipos de fútbol base do Armenteira C.F. que disputaron partido de liga esta fin de semana, o benxamín, o cadete e o infantil, acadaron uns resultados aceptables, na que era xa a trixésimo primeira xornada dunha temporada que está chegando á súa fin.

O equipo benxamín recibía na mañá do sábado ao C. Xuventú Sanxenxo, no que representaba outra dura proba para os rapaces e rapazas que adestran Valentín Estévez e José Ramón Dacosta. As importantes baixas da gardamenta Sara Otero e do mediocampista Álex Grigorio, entre outras, lastraron aínda máis a un conxunto escaso de recursos fronte á maioría dos rivais cos que comparte grupo. Con todo, o conxunto benxamín volveu a dar mostras da súa progresión e a colocación e a orde táctica xunto co incipiente xogo combinativo que tratan que practicar son o merecido froito dos resultados que está a dar o bo traballo que se está a realizar con estes futbolistas. O gol de Brais Charlín ven a demostrar tamén que pouco a pouco este equipo é máis incisivo en ataque. O marcador final de un gol a doce non representa máis que unha nova anécdota na enriquecedora experiencia futbolística que están a vivir estes nenos e nenas. A próxima fin de semana o conxunto benxamín debe visitar o campo de Berdón para medirse ao C. Vilagarcía S.D.,que ocupa a sexta posición con sesenta e tres puntos.

O equipo cadete tamén tiña outra dura proba, Recibía no campo de O Leixo ao Vilalonga F.C., un dos cadros que ocupa a parte alta da clasificación e que se atopa en plena loitar por acadar unha das prazas que permiten o ascenso de categoría. As importantes ausencias de Bale, Villa e Alberto supoñía un durísimo contratempo para a escadra verdinegra. Pero os rapaces que adestran Marcial Prado e Víctor Saborido non se amilanaron, e prantaron cara dende o principio aos celestes. Nun encontro equilibrado, e sen demasiadas ocasións, as diferenzas marcounas o gol do central Diego Berreco no que, tras recibir unha magnífica asistencia de Carlos Soto nun saque de falta, acomodou o balón co peito e colocouno con suma destreza xunto ao pau dereito da portería contraria. O defensa de Dorrón é un deses xogadores que, condicionado pola súa demarcación no campo, marca poucos goles, pero cando o fai, soe tratarse de tantos moi decisivos para o seu equipo. A vitoria final por un gol a cero coloca aos de O Leixo na sétima posición con trinta e oito puntos, mantendo opcións de acadar aínda a quinta posición, na que se atopa a E.F.B. Vilanova con sete puntos máis, Restan tres xornadas de liga, e unha delas correspóndense coa cita que o equipo cadete do Armenteira C.F. terá a vindeira fin de semana no campo de O Pombal ante o C. Xuventude Cambados, un conxunto que ocupa a duodécima posición con dezasete goles.

Finalmente, o equipo infantil enfrontábase de novo a outro duro reto. Medíase no campo de Monte Redondo, en Corón, á E.D. Arousa S.D. "B", unha escadra formada case na súa práctica totalidade por rapazas e que destaca polo bo trato do balón e o xogo combinativo e dinámico que practica. A formación que nesta ocasión dirixiu Martín Casais presentouse moi mermada no campo vilanovés, con só once xogadores. As dificultades aumentaron cando o conxunto local se adiantou no marcador nos primeiros intres do encontro, e cando pouco despois, os mareos que sufría o extremo Davide, o obrigaron a pasar uns minutos sentado no banco de suplentes. Con tantas adversidades parecía que estaban condenados a unha nova derrota pero, estes rapaces demostraron que tamén teñen coraxe e, con entrega e con loita acabaron firmando un partido verdadeiramente notable. Un disparo de longa distancia de Jose Otero igualaba o marcador e, na segunda metada, o extremo Raúl Moldes culminaba unha bonita xogada de contragolpe cun excelente lanzamento dende o borde da área que se colaba pegado ao pau esquerdo do cadro fucsia. O desgaste físico e a intensidade que o equipo local lle puxo ao ritmo de xogo dos últimos minutos provocou que, tras un balón colgado que cruzou a zona central da defensa do Armenteira C.F.,, Uxía Dos Santos, que xa anotara o primeiro tanto do seu conxunto, enviase o esférico cara o fondo das mallas defendidas por un acertado Diego Núñez. O empate co que finalizou o partido, o segundo para os rapaces do cadro verde e negro no que levamos de temporada, contribúe a reforzar a debilitada moral deste grupo de futbolistas, que na próxima fin de semana deberán recibir no campo de O Pombal ao C. Vilagarcía S.D., segundo clasificado con oitenta e dous puntos.

Morre a trencha de A Armenteira

O falecemento este sábado día 21 de maio de Adolfo Villanueva, "O Racho", deixa á parroquia de A Armenteira sen unha das figuras máis carismáticas. Con el vaise unha parte importante da historia da parroquia nas últimas décadas. Personaxe polifacético, este veciño de O Busto destacou sobre todo como carpinteiro, labor para que contaba cunha extremada pericia. Das súas mans saíron boa parte dos elementos de carpintería do Mosteiro de Armenteira, tanto na igrexa como nas outras dependencias do convento. As súas obras tamén deixaron pegada no Mosteiro de Poiom no salón do Café Bar O Comercio e en numerososos fogares da parroquia e da comarca, nos que aínda se conservan moitos restos do seu traballo. Isto convertiuno nunha persoa moi aprezada non só polos propios veciños, senón tamén polo cura párroco da A Armenteira, Don Ramón Fernández, co que mantiña unha estreita relación, polas Irmás da Comunidade Cisterciense que habita o Mosteiro de Armenteira e polos Pais da Comunidade de Mercedarios do Mosteiro de Poio. Pero tamén moitos o recordarán como taxista e como condutor dun pequeno autobús, do que era propietario e que fora construído en parte por el, no que, ata fai aproximadamente vintecinco anos trasladaba ás xentes da parroquia polos distintos lugares da contorno. Lexendarias eran aquelas viaxes coa pasaxe completa ata a Feira do Mosteiro, entón aínda na súa época de apoxeo, á que os veciños de A Armenteira se trasladaban a mercar e vender gando, e aproveitaban para adquirir algún dos numerosos artigos que alí soían venderse e tomar unhas tapas de callos ou pulpo nos establecementos que se instalaban nos arredores. Na viaxe de regreso era común ver como as persoas compartían o desprazamento xunto coas galiñas, ovellas ou porcos que os veciños traían da feira para as súas casas. O "Racho" será enterrado na tarde deste domingo en A Armenteira, despois dunha cerimonia relixiosa que dará comezo ás 18:30 horas.

Tres puntos para que o Armenteira Veteranos poida seguir soñando

O Armenteira Veteranos logrou na tarde deste sábado, no campo de O Cabalo, en Santa Cristina de Cobres, unha vitoria por un gol a cinco que lle permite seguir soñando con acadar o terceiro posto na clasificación final. O cadro verdinegro presentouse en Vilaboa coa obrigada baixa por sanción do centrocampista Cacabelos, ademais das doutras importantes pezas no equipo como as de Óscar no centro da defensa, as de Víctor, Alfonso, Pellejo ou Chicho na liña medular. Ante a evidente merma que supoñían estas ausencias o conxunto de O Leixo prantouse no terreo de xogo coa intención de levar o control dende o inicio. O rival, o Peña Rácing, un clube que tradicionalmente soe poñer en dificultades aos de Armenteira, asumiu o seu papel de actor secundario no argumento do encontro, e tratou de repregar liñas e agardar algunha perda de balón do rival para lanzar os seus contragolpes. Nos primeiros minutos a posesión do Armenteira Veteranos non se traducía en ocasións claras. O cadro visitante insistía unha e outra en vez recurrir aos lanzamentos en longos buscando os movementos en ataque de Manueliño e Galiñanes. E foi este último o encargado de abrir a lata. Recibiu un balón na área, controlou e axustou a pelota lonxe do alcance do porteiro local. Co resultado a favor a escadra verde e negra continuou co control da situación, pero a falta de puntería e a boa actuación dun polivalente gardamallas do Peña Rácing, que ademais de defender a portería tiña que exercer de líbero, impediron que as ocasións acabasen en gol. A insistencia dos visitantes tivo o seu premio nas botas de Jorge Castro que, coa mestría que o caracteriza, puxo a cero a dous co que se chegou ao descanso. Na segunda metade o Armenteira Veteranos seguiu ampliando a súa vantaxe, e así, Manueliño en xogada individual despois de recibir un pase en longo, Marcial cun disparo dende fóra da área aproveitando que o porteiro se atopaba adiantado e, de novo Jorge Castro, tras recibir unha perfecta asistencia do central Portas, completaron os cinco tantos cos que os de O Leixo quixeron reafirmar a súa superioridade en Santa Cristina de Cobres. Só a relaxación e o cansanzo dos minutos finais permitiron aos locais lograr o tanto da honra. Con este triunfo o Armenteira Veteranos ascende ata a sexta posición, con sesenta puntos, e a falta de tres xornadas para que remate a liga, mantén intactas as súas opcións de alcanzar o terceiro posto na clasificación final. A próxima fin de semana o conxunto verdinegro recibirá a visita do Rayovedra, un equipo que ocupa a décimo cuarta posición con trinta e tres puntos, e espera acadar unha nova vitoria coa que refrendar a súa excelente campaña que, entre outros xogadores, está personificada na figura de Jorge Castro. O dianteiro de Vilar suma xa 29 dianas, que o converten nun dos xogadores máis determinantes dos que militan nos distintos clubes deste grupo da liga de veteranos.

O C.D. Ribadumia impón en A Senra a súa superioridade sobre o equipo infantil do Armenteira C.F.

O equipo de categoría infantil do C.D. Ribadumia impuxo este luns no campo de A Senra 2 a súa superioridade futbolística sobre o Armenteira C.F. O conxunto aurinegro saiu ao terreo de xogo a contemporizar, sabedor das súas maiores capacidades, mentres que o conxunto de O Leixo trataba de manter a orde táctica e incluso lanzaba de vez en cando algún contraataque, principalmente a cargo do punta Piñeiro, que chegou a asustar aos afeccionados locais. Pero aos doce minutos de xogo Joel Carballa xa daba vantaxe ao C.D. Ribadumia. Esta situación facía que o cadro local se sentise aínda máis cómodo e pouco a pouco foi aumentando a diferenza no marcador ante unha escadra verdinegra que aguantaba o tipo e mostraba certa seriedade fronte a unhas circunstancias tan adversas. A fortaleza de Álex Ruel en defensa, a loita de Jose Otero do mediocentro, os toques de calidade de Diego Núñez na media punta e o pundonor de Piñeiro en ataque foron algunhas das notas máis significativas dun equipo que deu unha aceptable imaxe en A Senra e que resiste en base ás gañas e a ilusión polo fútbol e por defender unhas cores nunha temporada tan difícil como a que lle tocou vivir. O esgotamento físico de Íñigo e a lesión de Xoán debilitaron aínda máis ao conxunto, o que foi aproveitado polo C.D. Ribadumia para deixar claro o seu potencial co nove a cero co que finalizou o encontro. Na próxima fin de semana o equipo infantil do Armenteira C.F. deberá visitar o campo de Monte Redondo, en Corón, para medirse á E.D. Arousa "B", unha escadra formada fundamentalmente por rapazas, que destaca polo estilo de fútbol combinativo que practica e que ocupa a décimo terceira posición con vintesete puntos.

O triunfo resísteselle aos equipos de fútbol base do Armenteira C.F. nesta fin de semana

Os equipos de fútbol base do Armenteira C.F. que disputaron partidos de liga esta fin de semana, a trixésima no que levamos de liga, non tiveron demasiada fortuna en canto a resultados e non conseguiron acadar a vitoria en ningún dos casos.

O equipo benxamín medíase na mañá do sábado á S.D. Pontearnelas, un difícil rival que se atopa en plena loita polo campionato de liga. O cadro que adestran Valentín Estévez e José Ramón Dacosta saiu ao terreo de xogo con orde e ben prantado sobre un campo de As Chans que presentaba un aceptable ambiente. Nos primeiros minutos os rapaces e rapazas do conxunto verde e negro mostráronse como unha escadra seria que ofrecía relativa resistencia a un rival cuns recursos bastantes superiores. Pero co paso dos minutos a S.D. Pontearnelas foi impoñendo a súa maior fortaleza  e acabou derrotando aos de O Leixo por catorce goles a cero. Con todo, a imaxe do equipo benxamín do Armenteira C.F. foi máis que aceptable dadas as circunstancias e segue dando mostras de progresión partido a partido. A próxima fin de semana a formación que dirixe Valentín Estévez recibirá a visita do C. Xuventú Sanxenxo, un equipo que ocupa a décimo terceira posición con vintecinco puntos.

O equipo cadete tiña esta fin de semana un enfrontamento directo ante a A.D. Arousa F-7. Os rapaces que dirixen Marcial Prado e Víctor Saborido precisaban non saír derrotados do campo de Berdón para non verse superados polo seu rival deste sábado. As cousas non comezaron ben para os verdinegros, xa que aos 21 minutos de encontro Sergio De Lima adiantaba aos locais. Non sería ata os primeiros intres da segunda metade cando o central Carlos Soto conseguía a igualada para os de O Leixo. A partir de entón mantíveronse as alternativas dun e outro conxunto, pero o resultado xa non se movería. Con este empate o equipo cadete do Armenteira C.F. manten o sétimo posto, con trinta e cinco puntos, un posto por enriba e cun posto máis ca a A.D. Arousa F-7. Na próxima fin de semana o cadro verdinegro recibirá no campo de O Leixo ao Vilalonga F.C., segundo clasificado con cincuenta e tres puntos, pero que ten disputado dous partidos menos ca o líder, o San Martín C.F.

Para finalizar a fin de semana, o equipo infantil recibía no seu feudo de O Pombal, en Cambados, á C.D, Portas. Tratábase dun enfrontamento directo entre os dous conxuntos que ocupan as últimas prazas do grupo, polo que o resultado presentábase como trascendental de cara á clasificación final de ámbolos dous equipos. A formación que dirixen Martín Casais e Jonathan Crespo saiu ao campo falto de ritmo e veuse superado dende o primeiro momento por un rival con máis ritmo, tanto a nivel físico como futbolístico. Pero un lanzamento de falta dende uns trinta metros de Álex Ruel servía para adiantar aos locais e parecía que podería ser un soplo de aire para mellorar o nivel de xogo que ata ese momento estaban mostrando. Non foi así, e a C.D. Portas seguiu levando o control da situación e nese contexto apareceu a figura de Fran Vega, un rapaz miúdo pero de gran calidade, que foi un verdadeiro pesadelo para a defensa verdinegra pola banda esquerda. En dúas xogadas individuais o xogador de Portas deulle a volta ao partido, na segunda delas culminando unha bonita acción individual cunha perfecta vaselina. Nada máis comezar o segundo período Jorge Ferreira volvía a anotar para os granates, deixando a un Armenteira C.F. anímica e fisicamente derrotado, sen marxe para a reacción nos minutos que restaban de encontro. O un a tres co que finalizou o partido volve a colocar aos de O Pombal na última posición, da que aínda teñen esperanzas de saír no que queda de competición. E non terán tempo para lamentarse desta derrota, pois este luns, a partires das 18 horas, deben visitar o campo de A Senra 2 para enfrontarse a outro esixente contricante, o C.D. Ribadumia, que se sitúa na cuarta posición con sesenta e un puntos. Trátase dun encontro correspondente a vixésimo novena xornada, que foi aprazado a pasada fin de semana polo pasamento do pai do xogador do equipo infantil do Armenteira C.F. Kevin Domínguez.

Remontada para curar os males do Armenteira Veteranos ante o Salud S.D.

O Armenteira Veteranos conseguiu no partido que disputou na tarde deste sábado no campo Municipal de Campaña, en Valga, ante o Salud S.D. Veteranos, unha importante remontada que lle permite manterse con opcións de alcanzar os postos altos da táboa. Nun escenario que antaño pertenceu ás escolas de formación de fútbol base do Real Madrid, o cadro de O Leixo saiu ao campo aqueixado dunha apatía que permitiu aos locais adiantarse nos primeiros intres de encontro aproveitando un balón en profundidade cara o centro da defensa que o dianteiro centro valgués soubo conducir con éxito cara o fondo das mallas defendidas por Joserra. Os males do Armenteira Veteranos foron en aumento cando Richi tratou de despexar un centro do Salud S.D., con tan fortuna que o introduciu dentro da súa propia portería. A crítica situación na que se atopaban os verdinegros parecía cambiar cando o porteiro dos de Valga saiu a cortar coas mans fóra da área un balón en longo e o colexiado decidiu mostrarlle o cartón vermello. Con xogador máis sobre o campo os de A Armenteira comezaban a ter esperanzar de revertir a situación, pero cando se estaba a piques de chegar ao descanso, unha pelota roubada dos pés da defensa visitante foi habilmente trasladada cara o o fondo da rede do Armenteira Veteranos por un dianteiro do conxunto de Valga e parecía asestar aos visitar unha ferida que aparentaba ser mortal. O Salud S.D. víase xa gañador pero o Armenteira Veteranos decidiu cambiar a súa disposición táctica sobre o campo deixando só tres xogadores na liña defensiva e adiantou liñas para buscar con máis insistencia a meta local. Un centro de Galiñanes que se foi envelenando supoñía o primeiro paso cara a esperanza, que se veu refrendada cun balón colgado que Marcos soubo colocar no fondo das mallas e, a falta de cinco minutos, un balón cruzado, que tras tocar nas mans dun defensa do equipo de Valga que o árbitro non viu ou non quixo ver, caiu nos botas de Jorge Castro que, coa frialdade que o caracteriza, definiu con éxito colocando a bola pegada ao pau esquerdo do cadro local. Non houbo tempo para que a recuperación do Armenteira Veteranos fose absoluta, pero tendo en conta o discurrir do encontro o punto acadado no Municipal de Campaña deixa un bo sabor de boca para os de O Leixo. Este resultado final de empate a tres goles deixa ao Armenteira Veteranos no sétimo posto con cincuenta e sete puntos con opción aínda de loitar polo terceiro posto. Na próxima fin de semana o Armenteira Veteranos deberá visitar o campo de O Cabalo, en Santa Cristina de Cobres, para medirse ao Peña Rácing, décimo clasificado con corenta e dous puntos.

Salud S.D. Veteranos e Armenteira Veteranos cítanse no campo Municipal de Campaña

O campo Municipal de Campaña, no concello pontevedrés de Valga, acolle este sábado a partires das 17 horas o encontro que medirá ao cadro local do Salud S.D. Veteranos e ao Armenteira Veteranos. O conxunto de O Leixo agarda coa progresión das últimas xornadas e poder escalar algunha posición na táboa. A sexta posición con sesenta e dous puntos dos verdinegros outórganlle o papel de favorito ante unha escadra valguesa que se atopa no décimo sexto posto con vintecatro puntos. Pero os xogadores que capitanea José Luis Galiñanes queren fuxir de calquera tipo de favoritismo e buscarán un novo triunfo nun partido para o que non poderán contar con algunhas pezas clave do equipo como é caso do mediocentros Javi e Martín e dos interiores Marcial, Alfonso e Chicho.

Os equipos de fútbol base do Armenteira C.F. afrontan esta fin de semana unha nova xornada de liga

Os equipos de fútbol base afrontan esta fin de semana unha nova xornada de liga, a trixéxima no que vai de liga, na que unicamente o equipo infantil, que finalizou a liga fai un mes, poderá gozar dun merecido descanso durante este sábado e domingo.

O equipo cadete desprázase ata o campo de Berdón, en Vilagarcía de Arousa, onde a partires das 10 horas se vai medir á A.D. Arousa F-7, coa arbitraxe de Díaz Jiménez. Trátase dun duelo directo entre o cadro local, oitavo clasificado con trinta e tres puntos, e o conxunto de O Leixo, sétimo clasificado con trinta e catro puntos. Polo tanto, trátase dun encontro vital para os rapaces que adestran Marcial Prado se non queren verse superados polos vilagarcianos e de cara a manter as súas aspiracións de alcanzar o quinto posto, que actualmente ocupa a E.F.B. Vilanova.

O equipo benxamín, pola súa contra, visita o campo de As Chans, para enfrontarse o sábado a partires das 10:30 horas, coa arbitraxe de López Pedreiro, a un máis que compricado rival, a S.D. Pontearnelas, un conxunto que está situado na terceira posición con setenta e catro puntos, e que está en plena loita polo campionato de liga e polo ascenso á Primeira Categoría Benxamín. O cadro técnido da formación verdinegra contará de novo coas baixas do defensa Ramón, do mediocampista Antonio e do dianteiro Brais Charlín, que suporán unha dificultade engadida para unha cita tan esixente como a deste sábado. Con todo, os rapaces e rapazas que dirixen Valentín Estévez e José Ramón Dacosta irán coa ilusión de seguir progresando e aprendendo desta nova experiencia.

Para finalizar os encontros desta fin de semana para o Armenteira C.F. o equipo infantil recibe no seu feudo do campo de O Pombal, en Cambados,  a visita da C.D. Portas. O encontro, que será arbitrado por Solla Placer, medirá aos dous últimos clasificados do grupo, xa que ámbolos dous conxuntos suman unicamente un punto no que levamos de temporada e agardan con ansia a primeira vitoria. Será un encontro trascendental de cara á clasificación final dos dous conxuntos, polo cal o cadro técnico que forman Martín Casais e Jonathan Crespo centrouse esta semana en tratar de concienciar aos seus xogadores da importancia deste partido. A falta de confirmación oficial a escadra verdinegra parece que non vai poder contar de novo con todos os seus efectivos, polo que se verá obrigada a recurrir á convocatoria de algún xogador do equipo alevín.

O Armenteira C.F. comeza a distribuír as entradas para o partido entre Galicia e Venezuela

O Armenteira C.F. comezou este venres a distribuír as entradas para o partido que disputarán o venres 20 de maio no Estadio Municipal de Riazor, de A Coruña, as seleccións de Galicia e Venezuela. As localidades, correspondentes ao Fondo de Pavillón, teñen un prezo de 10 €, e permitirán aos afeccionados que as adquiran contemplar un encontro no que se enfrontan dous equipos con xogadores de nivel internacional entre os que destacan Denis Suárez, Santi Mina, Lucas Pérez ou Iago Aspas polo combinado galego e Miku, Peñaranda ou Salomón Rondón polo venezolano. A expedición do clube verdinegro que irá ata A Coruña irá nun autobús que sairá dende A Armenteira, dos arredores do colexio, ás 17:30, e que pasará pola rotonda de Os Castaños, en Barrantes, para recoller ás persoas que desexen unirse ao grupo nese lugar. Os trámites que a Xunta Directiva do Armenteira C.F. realizou coa Federación Galega de Fútbol permitiron que esta entidade se fixese cargo dos gastos do desprazamento, co que os afeccionados que decidan ir ao partido soamente terán que abonar o prezo da entrada. Ademais, para premiar o esforzo dos seus xogadores e xogadoras durante a temporada que está a piques de finalizar o clube de O Leixo conseguiu negociar co Pontevedra C.F. a entrega de 30 invitacións para o partido que o conxunto granate disputará o próximo domingo a partires das 18 horas ante o Burgos C.F. Estas entradas permitirán o acceso gratuito aos compoñentes do plantel do Armenteira C.F. que teñan entre 6 e 13 anos. Dende a Xunta Directiva da entidade verdinegra animan a todas aquelas persoas que estean interesadas en adquirir tanto as entradas para o encontro do día 20 en Riazor como o do vindeiro domingo en Pasarón a que se poñan en contacto co clube coa maior brevidade posible.

O alcalde promete que o problema da Casa de Cultura estará solucionado en dous meses

A reunión que o alcalde de Meis, José Luis Pérez, tivo cos veciños e veciñas da parroquia de A Armenteira no ximnasio do colexio saldouse coa promesa de que o problema en relación co uso da Casa de Cultura estará solucionado nos meses xullo ou agosto. A tensión que presidiu a asemblea da A.V.R.C. Valdedeus do pasado sábado, na que tamén estivo presente o propio rexidor, e tras a que se decidiu citar de urxencia ao alcalde para aclarar un tema que tanto preocupa aos veciños, fixo que o alcalde iniciase a súa intervención cun discurso no que trataba de enfriar os ánimos do numeroso público que se congregou no C.E.I.P. de Armenteira. Ante a insistencia dos asistentes José Luis Pérez tivo que pasar a explicar a cuestión pola que foi citado e facer fronte ás preguntas que querían unha aclaración acerca da situación da Casa de Cultura e da xestión que se está a facer co albergue de peregrinos alí instalado. A falta de transparencia coa que se levou a cabo a transformación deste local en albergue, para o cal non foron informados nin consultados os veciños, e as discrepancias coa labor da persona encargada das tarefas de limpeza e xerencia deste establecemento foron as principais cuestións que se lle plantexaron ao alcalde. Ademais quixeron deixar claro o malestar que causa na parroquia a imposibilidade de usar estas instalacións así como as dúbidas respecto do control de rexistro dos peregrinos que se aloxan no albergue. Ante isto, o rexidor tratou de convencer a uns incrédulos asistentes, afirmando que as obras da parte baixa do local serán acometidas proximamente e que está previsto que nun prazo de dous meses estean finalizadas. Para entón farase un reparto dos usos das dependencias, quedando a pranta superior para uso da veciñanza, mentres que a pranta inferior quedará habilitada como albergue. O falecemento no pasado mes de decembro do xerente deste local fixo que o clima de aparente tranquilidade que se vivía na parroquia comezase a romperse e que asuntos como a xestión da Comunidade de Montes Chan da Fonte, da A.V.R.C. Valdedeus ou da Casa de Cultura, todas elas baixo o control da mesma persoa, e contra as que ata ese momento non existía un movemento de oposición, se convertesen en obxecto de polémica nunha parroquia que comeza a demandar un cambio e esixe un maior protagonismo na toma de decisións en aspectos nos que, como os que citamos, se ve tan directamente afectada.

A polémica coa Casa de Cultura cita ao alcalde e aos veciños no ximnasio do colexio

A polémica situación da Casa de Cultura levou a un grupo de veciños e veciñas de A Armenteira a convocar ao alcalde de Meis, José Luís Pérez, a unha reunión que terá lugar este xoves a partires das 20:30 horas. A habilitación da Casa de Cultura ou Local Social de Vilar, como tamén é coñecida, como albergue para os peregrinos que realizan a Variante Espiritual do Camiño Portugués que conduce a Santiago de Compostela, xerou unha agria polémica entre a veciñanza da parroquia e a xerencia deste alonxamento. Os veciños denuncian que esta medida foi tomada sen informar nin consultar a opinión da parroquia. Ata fai uns meses ambos usos viñan sendo compatibilizados, pero, segundo argumentan, o uso deste local estáselle restrinxindo pouco a pouco ata o punto de ultimamente non poden realizar alí ningúna reunión nin actividade, véndose obrigados a trasladar estes actos ao ximnasio do colexio, co conseguinte malestar para a comunidade educativa do C.E.I.P. de Armenteira, que xa expresou as súas queixas ante os problemas de limpeza que ocasiona este feito e o risco que supón ter aberto o centro a persoas alleas ao mesmo fóra do horario lectivo. Cabe recordar que a aula que se usa como ximnasio, que orixinariamente estaba destinada a usos múltiples e non conta coas características axeitadas para estas tarefas, está no interior do centro, e que para acceder a ela é necesario entrar pola entrada principal, que tamén da acceso ás demais partes do centro. As obras que están en marcha na pranta baixa da Casa de Cultura, que dotarían aos veciños dunhas instalacións para o seu uso, continuando a pranta principal como albergue, servirían para poñer fin a esta polémica, pero a lentitude coa que se están levando a cabo provocan que as queixas da veciñanza vaian en aumento, sobre todo cando se comezou a extender o rumor de que este pranta superior local, a única que está actualmente en uso, foi cedida á institución que xestiona os albergues de Galicia, impedindo totalmente a súa utilización por parte dos veciños.

Dúas derrotas nunha xornada luctuosa para os equipos de fútbol base do Armenteira C.F.

A xornada desta fin de semana, a vixésimo novena no que vai de liga, deparou para os equipos de fútbol base do Armenteira C.F. un balance de dúas derrotas. Foron unhas derrotas ata certo punto agardadas, xa que os rivais aos que se enfrontaron contan cun potencial bastante superior ao dos conxuntos verdinegros. Pero, con todo, a xornada estará para sempre marcada polo tráxico falecemento nun accidente de tráfico do pai do xogador do equipo infantil Kevin Domínguez, que conmocionou a toda a comunidade que forma parte do Armenteira C.F. e que obrigou a suspender o encontro que o conxunto infantil debía disputar no campo de A Senra 2 ante o C.D. Ribadumia. Ademais, en cada un dos encontros que disputaron os equipos do Armenteira C.F. decidiuse gardar un emotivo minuto de silenzo.

O equipo benxamín recibía na mañá do sábado, no campo de O Leixo, á S.D. Amanecer. O cadro meco enseguida quixo impoñer a súa superioridade e xa se puxo cunha clara vantaxe no marcador nos minutos iniciais. Os rapaces e rapazas que adestran Valentín Estévez e José Ramón Dacosta pouco podían facer ante un rival que, alentado polo seu adestrador, non baixaba a intensidade no xogo, e apuraba a presión cara a saída do balón dende a meta defendida unha vez máis por Sara Otero, afogando o inicio da xogada do conxunto verdinegro. Unha das escasas notas positivas para os locais estivo nunha clara ocasión da que dispuxo Brais Santamaría na segunda metade, pero na que non foi acompañado pola fortuna. O cero a trece reflicte claramente o visto sobre a superficie de terra de O Leixo, e non deixa de ser unha anécdota máis no proceso formativo no mundo do fútbol que está a vivir este grupo de nenos e nenas. Na próxima xornada o equipo benxamín do Armenteira C.F. deberá visitar o campo de As Chans para medirse á poderosa escadra da S.D. Pontearnelas, que ocupa o segundo posto na clasificación con setenta e catro puntos.

Pola súa contra, o equipo cadete disputaba a segunda eliminitaria da Copa Deputación ded Pontevedra, na que lle tocaba recibir a un dos conxuntos con maior potencial no fútbol base a nivel provincial, a E.D. Arousa S.D. O técnico local, Marcial Prado, decidiu apostar pola contención no sue plantexamento táctico, e decidiu formar cunha defensa de cinco xogadores e sen ningún punta de referencia en ataque. Aínda que a disposición do equipo variou, non ocorreu o mesmo cos nomes que presentou sobre O Leixo o adestrador de San Salvador. O conxunto verde e negro presentouse con Yago na portería, cunha zona defensiva con Sergio Nogueira e Diego Berreco como centrais,  con Carlos Soto como líbero, con Roberto polo carril dereito e Javi Moimenta no carril esquerdo; un mediocampo con Bale como pivote defensivo e con Jose Piñeiro e Mathias como organizadores; e con dous homes tirados aos costados, Villa no dereito e Alberto no esquerdo. O cadro visitante, como era de prever, fíxose co dominio do balón dende o primeiro minuto, e trataba de facelo circular a gran velocidade nunha superficie nada favorable para o fútbol polo que se aposta na escola deportiva vilagarciana. Unha clara ocasión que Alberto tivo nos seus pés, tras unha asistencia de Bale, pero que o dianteiro de Vilariño estrelou contra as luvas do meta rival, puido adiantar ao Armenteira C.F. e cambiar o rumbo do encontro. Pero o entramado defensivo plantexado por Marcial Prado comezou a romperse cando Marcelo Abalo colocaba coa testa o balón do fondo das mallas de Yago tras un saque de córner. Uns minutos despois o propio Marcelo Abalo volvía a marcar para o cadro visitante ao tocar con sutileza ante a saída do porteiro un balón que recibiu en profundidade de Martín Diz, que se mostrou como o xogador máis desequilibrante dos que compareceron sobre o campo de A Armenteira, Xa na segunda metade os vilagarcianos lograban dous novos tantos, un mediante un lanzamento directo de córner que Roberto non deu despexado e outro combinando unha bonita xogada combinativa. A boa imaxe que deu o equipo cadete do Armenteira C.F. foi agradecida polo público, que loubou a súa actitude, e que agarda que este nivel de xogo se manteña a próxima fin de semana, na que debe visitar á A.D. Arousa F-7, que atopa na oitava posición con trinta e tres puntos, unha posición menos e cun puntos menos cós de O Leixo.

Tensa reunión da A.V.C.R. Valdedeus

A Asociación Veciñal Cultural e Recreativa Valdedeus celebrou este sábado no ximnasio do C.E.I.P. de Armenteira unha tensa reunión. Na orde do día figuraban, entre outros aspectos,  a proposta de cambios a realizar na Xunta Directiva, a modificación dos Estatutos e a inclusión de novos socios na entidade. Dende o principio as discrepancias entre os compoñentes do Xunta Directiva puxéronse de manifesto, ante o asombro de parte dos asistentes. A lentitude nos trámites e a denuncia de irregularidades administrativas fixeron que o ambiente se fose enturbiando a medida que a xuntanza avanzaba. Só a mediación do alcalde, José Luis Pérez, que estaba entre os convidados á reunión, contribuiu a calmar os ánimos. A dimisión de varios representantes do comité de goberno, que se queda unicamente con tres membros, e a solicitude da devolución da cota por parte de varios socios que piden a súa desvinculación da asociación deixan a esta entidade moi debilitada. Ante renuncia da Xunta Directiva a acceder ás peticións de cambio de boa parte da masa social, a corrente crítica que foi xurdindo nos últimos meses, plantéxase agora a creación dunha asociación veciñal alternativa para a parroquia de A Armenteira.

Prosegue o abandono de cans na parroquia de A Armenteira

O abandono de cans segue a ser unha práctica habitual na parroquia de A Armenteira. A creación do centro CAAN, unha canceira impulsada dende a Deputación Provincial de Pontevedra, da que forman parte 50 concellos, non conseguiu disuadir desta cruel costume a moitos desaprensivos que deciden desprenderse das súas mascotas. Os veciños da parroquia seguen denunciando a presenza de cans abandonados polos camiños e as leiras, e incluso se ven obrigados nalgún caso a acoller no seu propio fogar a estes animais. Dende as asociacións protectoras recordan que levan anos loitando contra esta práctica delictiva e animan a aquelas persoas que poidan ser testemuñas dun acto deste tipo a que acudan a presentar a perminente denuncia.

Cómodo triunfo do Armenteira Veteranos ante o Cafetería Pasaje

O Armenteira Veteranos logrou na tarde deste sábado, no encontro disputado ante o Cafetería Pasaje un cómodo triunfo por cinco goles a un. O partido axiña se lles puxo de cara ao conxunto que capitanea José Luis Galiñanes, que logrou ir ao descanso cunha vantaxe de cinco goles a cero. Os cambios tácticos na segunda metade, na que os locais colocaron só tres homes na liña defensiva, non deron os resultados agardados, e iso, unido á relaxación que lles provocaba a ampla vantaxe, deron a oportunidade aos de Moraña de achegarse con máis frecuencia á meta defendida unha vez máis por Joserra. Foi nun deses achegamentos no que os visitantes conseguiron o seu único tanto. De novo foi determinante a actuación de Jorge Castro, autor de catro dos goles do Armenteira Veteranos, desta vez perfectamente asistido entre outros por Marcial e Manueliño. Para enmarcar tamén o gol de Javi dende máis de corenta metros de distancia. O centrocampista de Couso volveu a levar con éxito o timón do cadro verdinegro e tivo tempo para deleitar ao público que se congregou en O Leixo cos seus detalles técnicos, entre os que nunca faltan as súas habituais rabonas. O gran nivel da primeira metade, na que destacou a solidez defensiva, a resolución en ataque e as numerosas incursións por bandas, polas que estivo especialmente activo o lateral Portas, que conseguiu desbordar en máis dunha ocasión, demostran o excelente nivel que pode acadar un Armenteira Veteranos que con este triunfo continúa na oitava posición con cincuenta e seis puntos e mantén intactas as súas aspiracións de situarse nos postos altos da táboa. Na próxima fin de semana o equipo de O Leixo debe rendir visita ao conxunto valgúes do Salud, décimo sétimo clasificado con vintedous puntos.

Cafetería Pasaje e Armenteira Veteranos danse cita en O Leixo este sábado

O campo de O Leixo acollerá este sábado, a partires das 17 horas, o encontro corresponde á trixésimo terceira xornada de liga do grupo 4A da liga de veteranos entre o Cafetería Pasaje e o conxunto local do Armenteira Veteranos. A diferenza na clasificación entre ámbolos dous conxuntos, co equipo verde e negro na oitavo posto con cincuenta e tres puntos, e os morañeses no décimo cuarto con vintenove, fan que o equipo de O Leixo parte co claro papel de favorito. As baixas seguras de Richi e de Martín, ás que se podería sumar algunha máis, supoñen un contatempo que o Armenteira Veteranos tratará de superar para lograr un novo triunfo que o achegue á zona alta da táboa e, de paso, homenaxear ao seu capitán e presidente, José Luis Galiñanes, que celebrou o seu cumpreanos esta semana.

Os equipos benxamín e cadete do Armenteira C.F., protagonistas da xornada desta fin de semana

A nova luctuosa do falecemento nun tráxico accidente de tráfico ocorrido na parroquia meañesa de Padrenda do pai do xogador do equipo infantil do Armenteira C.F. Kevin Domínguez, que obrigou ao aprazamento do partido que este conxunto ía disputar no campo de A Senra 2 ante o C.D. Ribadumia, converte aos equipos benxamín e cadete nos únicos equipo do clube verdinegro que terán partido esta fin de semana.

O equipo benxamín recibe no campo de O Leixo, o sábado a partires das 11:30 horas, á S.D. Amanecer, coa arbitraxe de Santiago Garrido. O corpo técnico que forman Valentín Estévez e José Ramón Dacosta non poderá volver a contar con todo o seu plantel, e contará con baixas tan importantes como a de Andrés Fernández na zona defensiva. Con todo, na convocatoria de once xogadores destaca a presenza dalgún dos pesos pesados do equipo como os gardametas Sara Otero e Sergio Matilde, o defensa Mateo, o mediocampista Brais Santamaría ou o dianteiro Brais Charlín. A dificultade do rival, que ocupa a décima posición, con corenta e un punto, suporá outra dura proba para este conxunto que pretende continuar coa súa lenta progresión na formación como futbolistas.

O equipo cadete, pola súa contra, recibe na mañá, do domingo, a partires das 11:30, no campo de O Leixo, á E.D. Arousa S.D. na que será a segunda eliminitario na Copa Deputación de Pontevedra. Tras superar á S.D. Chispa nunha agónica quenda de penalties, o conxunto que adestran Marcial Prado e Víctor Saborido terá agora en fronte a un cadro de enorme potencial, ao que a maioría dos entendidos sitúan como o principal favorito a facerse co título desta competición. A escadra vilagarciana, que ven de finalizar a liga a pasada fin de semana, realizou unha excelente campaña, na que finalizou como líder destacado na Primeira Autonómica Cadete, conseguindo o ascenso á Liga Galega con varias semanas de antelación. Os datos dan o papel de claro favorito á E.D. Arousa, pero os rapaces do conxunto verdinegro queren apelar ao seu espíritu competitivo e pretenden convertir ao Leixo nun fortín para facer fronte a tan duro opoñente. Ao vencedor deste encontro, que arbitrará o colexiado González Fervenza, agardarao á S.C.D. Pontecaldelas, que ven de eliminar nesta segunda rolda ao Atlético Cuntis.

A A.V.C.R. Valdedeus convoca unha reunión extraordinaria para este sábado

A Asociación Veciñal Cultural e Recreativa Valdedeus convoca para este sábado día 7 de maio, a partires das 21 horas, a unha reunión extraordinaria que se celebrará no C.E.I.P. de Armenteira. Á mesma están chamados todos os socios e socias da entidade veciñal así como todas aquelas persoas que desexen asociarse para o presente ano. Segundo a orde do día que se nos facilitou dende a entidade na reunión trataranse, entre outros asuntos, os cambios nos cargos da Xunta Directiva, a modificación dos Estatutos, a aceptación de novos socios e socias, ademais do correspondente turno de rogos e preguntas. O descontento coa xestión da actual presidenta e as desavenencias que nos últimos tempos se están a dar dentro da Xunta Directiva e da masa social da entidade, fixeron xurdir unha corrente crítica que demanda un cambio de rumbo e unha xestión máis transparente e aberta. Por este motivo convidan a todos aqueles veciños e veciñas que estean interesados en formar parte e participar das actividades da A.V.C.R. Valdedeus a que acudan a esta xuntanza. Cabe recordar que esta é a única asociación deste tipo que existe na parroquia de A Armenteira e que, dende a súa creación, fai aproximadamente un ano, os problemas internos e a falta de identificación coa mesma de parte dos veciños impediron que este proxecto puidese acadar os propósitos cos que naceu.

Xornada de goles para os equipos de fútbol base do Armenteira C.F.

A xornada desta fin de semana, a vixésimo oitava no que vai de liga, foi para os equipos de fútbol base do Armenteira C.F. unha xornada goleadora, de goles a favor, especialmente no caso do equipo cadete, e de goles en contra, no caso dos equipos de categoría benxamín e infantil.

O equipo cadete recibía na mañá do sábado no campo de O Leixo ao C.D. Bamio. Os rapaces que dirixen Marcial Prado e Víctor Saborido non quixeron ningún tipo de confianzas ante un rival que ocupaba a última posición da táboa cun único punto e saíron por intensidade para poñer o encontro ao seu favor dende os primeiros minutos. E así foi, nada máis comezar Mathias adiantaba aos verdinegros, e enseguida virían outros dous tantos, co que puideron xestionar o resto do partido con relativa tranquilidade. O equipo alevín apostou entón por un xogo máis combinativo e trataba de profundizar polas bandas que ocupaban Villa e Marcos Acha. O cinco a cero co que o conxunto verdinegro se foi ao descanso fixo que na segunda parte entrase nun clima de relaxación, do cal non saiu ata os minutos finais cando Mathias volveu a tomar o timón do mediocampo e se deixou ver a capacidade resolutiva de Alberto. O marcador final de nove goles a cero, con catro tantos de Mathias, tres de Alberto, un de Villa e outro de Gulte reflicten a clara superioridade que os de O Leixo mostraron sobre os vilagarcianos. A próxima fin de semana, o cadro adestrado por Marcial Prado terá que facer fronte a un duro reto, xa que ten que disputar a segunda rolda da Copa Deputación de Pontevedra ante o E.D. Arousa S.D., unha escadra pertencente a unha das escolas de fútbol base da provincia e á que moitos sinalan como máximo favorito a alzarse co título de campión desta competición.

O equipo benxamín afrontaba outra esixente visita esta xornada. Debía desprazarse ata o campo do Monte da Vila para medirse á U.S.D. de O Grove. Ás múltiples dificultades que está sufrindo esta temporada este grupo de rapaces e rapazas que adestran Valentín Estévez e Pol Dacosta sumábase este sábado algunhas ausencias de última hora. Con estas circunstancias tan adversas o corpo técnico tratou de plantexar un encontro no que frear na medida do posible o potencial ofensivo dos mecos. Pero pouco puideron facer os compoñentes da formación verdinegra, que viron como de forma implacable os locais perforaban unha e outra vez as mallas defenderon Sara Otero e Sergio Matilde. Ben sabedores son os pacientes afeccionados do Armenteira C.F. que os resultados son un aspecto máis dos moitos que compoñen o proceso formativo do fútbol base, e que gañar ou perder deben ser considerados un aspecto secundario neste proceso, e que un resultado de vinteún goles a cero como o deste sábado quizas non sexa o máis edificante nin para os que se levaron os tres puntos nin para aqueles que non. A próxima fin de semana o equipo benxamín debe recibir a visita no campo de O Leixo da S.D. Amanecer, outro conxunto da península de O Grove, que ocupa a décima posición con corenta e un puntos.

Para finalizar, o equipo infantil disputaba no campo de O Pombal unha novo partido como local. O rival era o difícil conxunto do Unión Dena C.F. Os rapaces que dirixiu Jonathan Crespo volveu saír ao terreo de xogo sen a intensidade necesaria e, xa no minuto un os visitantes tomaban vantaxe. A partires de entón a debilitada moral destes xogadores fíxose aínda máis endeble e o Unión Dena C.F. ía pouco a pouco marcando distancias. O gol do xogador de categoría alevín Adri, que nesta ocasión formou na punta de ataque do conxunto infantil, ao culminar con acerto un contragolpe, supuxo unha das poucas alegrías que os verdinegros puideron dar aos seus seguidores. O fútbol de toque co que os de Jonathan Crespo trataron de recompoñerse na última parte do encontro viuse laminado por unha ofensiva final dos de Meaño, ante a que pouco puido facer Álex Ruel, que de novo tivo que exercer de meta ocasional nos últimos minutos. A vitoria por un gol a dez que se levaron os de Dena supón outro duro revés para un grupo de xogadores que mantén o tipo con mérito nunha situación tan compricada como a que lle tocou vivir esta temporada. A próxima fin de semana o equipo infantil deberá rendir visita ao C.D. Ribadumia, unha potente escadra que ocupa a cuarta posición con cincuenta e oito puntos.