O Armenteira Veteranos logra deter a mala xeira de resultados cun empate ante o C.D. Mosteiro

  FICHA TÉCNICA

ARMENTEIRA VETERANOS - C.D. MOSTEIRO-A BARBERÍA DE DIEGO- 2 - 2

ARMENTEIRA VETERANOS: Sirra; Jorge Dávila, Carlos Castro, Carlos Muñiz, Óscar Barreiro; Martín, Javi, José Pérez, Junior; Bambán e Jorge Castro. Tamén xogaron Marcial, Óscar Muñiz, Suso e Moncho.

GOLES: 1-0. Minuto 8. Jorge Castro. 1-1. Minuto 10. Antonio Collazo. 1-2. Minuto 29. Adrián Novelle. 2-2. Minuto 55. Carlos Castro. 

ÁRBITRO: Torres Castro. Mostrou cartón amarelo a Adrián Novelle por parte do C.D. Mosteiro-A Barbería de Diego e cartón vermello directo a Jesus Bouzón tamén por parte do C.D. Mosteiro-A Barbería de Diego.

INCIDENCIAS: Partido da oitava xornada do grupo 2 da Terceira Galicia de Veteranos da delegación de Pontevedra disputado no campo de O Leixo, ante uns quince espectadores, nunha fresca, pero despexada, e sobre un terreo de xogo cunha superficie de terra algo dura e irregular, pero aceptable para a práctica do fútbol.

  CRÓNICA

O Armenteira Veteranos logrou por fin deter a mala xeira de resultados das últimas xornadas. Tras vencer nas dúas primeiras xornadas, e cadro verde e negro levaba encadeadas cinco derrotas nos últimos cinco encontros de liga. Foron derrotas de distinto tipo, unhas en partidos máis igualados e competidos e outras excesivamente abultadas, pero todas elas contribuiron a minar a moral dun equipo que ten un dos principais sustentos no ánimo e na motivación dos seus xogadores. A ausencia de Jorge Castro ao longo do último mes resultou letal para un Armenteira Veteranos que basea boa parte da sùa estratexia ofensiva nas manobras do atacante de Vilar. E foi precisamente no momento no que regresou Jorge Castro no que os verdinegros lograron encauzar en certa maneira ese rumbo tan negativo. Cos tantos dos irmans Castro, Jorge e Carlos, os de Armenteira lograron igualar un partido con dúas partes ben diferenciadas: a primeira con claro dominio visitante e a segunda con maior dominio por parte dos locais.

Nada máis empezar o encontro, os visitantes deixaron claro cal ía ser o seu plantexamento. As combinacións e o control da zona do mediocampo, xunto cos envíos en profundidade cara aos extremos foron a estratexia a seguir polos de O Mosteiro. Pese a que a posesion correspondia aos visitantes, nun golpe franco desde o borde da área, Jorge Castro, colocaba o coiro no segundo pau, longo do alcalce de Eugenio Fernández, que unha vez máis volveu a exercer de gardamallas de circunstancias do C.D. Mosteiro. O gol, que podería axudar a que os de A Armenteira conseguirse asentarse mellor sobre o terreo de xogo e que puidesen librarse do dominio visitante, non tivo o efecto desexado polos locais. O conxunto da capital do municipio seguiu combinando e buscando as costas da zona lateral da defensa verdinegra, principal debilidade do Armenteira Veteranos este sábado. Os balóns filtrados desde o mediocentro e a velocidade e profundidade dos homes de banda do C.D. Mosteiro poñían continuamente a proba o sistema defensivo local. Nunha desas accións, Adrian Novelle chegou á liña de fondo e, desde o costado esquerdo, colocou unha asistencia cara o interior da área, onde se presentou Antonio Collazo para remachar ao fondo da rede. Co marcador igualado, os visitantes continuaron co dominio do xogo, e os avisos cara a portería defendida por Sirra repetíanse cada pouco tempo. De novo nunha xogada forxada na banda esquerda do ataque do C.D. Mosteiro-A Barbería de Diego, Adrián Novelle, despois de recibir de costas e xirarse, conectou cos seus compañeiro e iniciou unha carreira cara a portería que os defensores locais non foron quen de parar. Man a man con Sirra Adrián Novella non perdoaba e poñía aos seus en vantaxe. Intentou reaccionar o Armenteira Veteranos, impulsado fundamentalmente polo empuxe de Javi e José Pérez na liña medular e pola insistencia de Martín e Marcial polas bandas, pero a seguridade do entramado defensivo dos de O Mosteiro impedían que estas acometidas ofensivas atopasen a Jorge Castro e tivesen a fin agardada.

No segundo período a situación cambiou. O Armenteira Veteranos armouse mellor en defensa e a partir de aí, tratou de tomar o control do xogo. Aínda que os locais seguiron esforzándose por manter a posesión e por desenvolver o seu fútbol máis combinativo, a escadra local sentíase relativamente cómodo no campo. O Armenteira Veteranos comezaba a ver posible a posibilidade de empatar ou incluso de remontar, pero había un problema. Eran capaces de dominar, eran capacer de presentarse nas proximidades da meta defendida por Eugenio Fernández, pero novamente, como pasaba nos partidos anteriores, faltaba pegada. Non lograban enviar o coiro entre os tres paus. A puntería dos locais parecía cambiar, cando, nunha aproximación á área adversaria, despois dunha accion a balón parado, o coiro caía nos pés de Carlos Castro, e o central, incorporado nese lance ao ataque, enganchaba de  tesoiras unha volea que acabou no fondo da rede rival. Con todo, houbo unha xogada que resultou determinante neste segundo período. Nunha internada de Marcial polo carril esquerdo, na que o balón chegou a pés de Jorge Castro dentro da área, o colexiado Torres Castro, para sorpresa dos presentes, decidiu deter o xogo para mostrar cartón vermello directo a Jesús Bouzón, defensor do C.D. Mosteiro. Foi un comentario despectivo cara o árbitro o que motivo esta decisión tan repentina e inesperada. Cun futbolista máis sobre o terreo de xogo, o Armenteira Veteranos acentou o seu dominio, pero as ocasións máis claras das que dispuxo, principalmente con Jorge Castro como protagonista, non tiveron o acerto esperado. Parecía pasar factura ao dianteiro de Vilar o mes de inactividade. A pesar da inferioridade numérica o C.D. Mosteiro non se resistía a buscar a vitoria e en ocasions deixábase ver cerca da porteria de Sirra, aínda que a ocasión de maior claridade produciuse no último instante do partido, xusto antes de que o colexiado asubiase o final. Tras unha acción con varios despexes por parte dos defensores visitantes, un centro desde a banda esquerda remataba cun testarazo de José Pérez que impactaba no pau longueiro e íase por enriba da portería.

Co punto sumado este sábado, o Armenteira Veteranos queda na undécima posicion, con sete puntos. Na próxima xornada, o conxunto verde e negro deberá visitar ao Dorrón C.F. Veteranos, duodécimo clasificado, cun punto menos que os de A Armenteira. Será unha nova edición dun duelo de rivalidade entre dous clubes veciños pertencentes a dúas parroquias colindantes, na que o Armenteira Veteranos tratará de confimar as mellores sensacións exhibidas no partidos desta fin de semana.

Un Armenteira Veteranos falto de pegada cae en Zacande ante un Godos C.F. Veteranos máis contundente nas áreas

 FICHA TÉCNICA

ARMENTEIRA VETERANOS - GODOS C.F. VETERANOS- 0 - 2

ARMENTEIRA VETERANOS: Marcos; Moncho, Fernando, Carlos Castro, Óscar Barreiro; Óscar Muñiz, Carlos Muñiz, José Pérez, Marcial; Bambán e Rubén. Tamén xogaron Javi, Jorge Dávila, Richi, Galiñanes e Suso.

GOLES: 0-1. Minuto 10. Manuel Portas. 0-2. Minuto 48. Álvaro Abalo. 

ÁRBITRO: Caeiro Abalo. Mostrou cartón amarelo a Álvaro Abalo por parte do Godos C.F. Veteranos e a Fernando por parte do Armenteira Veteranos.

INCIDENCIAS: Partido da sexta xornada do grupo 2 da Terceira Galicia de Veteranos da delegación de Pontevedra disputado no campo Municipal de Zacande, ante uns vinte espectadores, nunha tarde cuberta e chuviosa, e sobre un terreo de xogo cun superficie de céspede artificial nunhas condicións aceptables para a práctica do fútbol.

  CRÓNICA

O Armenteira Veteranos continúa coa súa mala xeira de xogo e resultados. Tampouco o traslado do partido ao campo Municipal de Zacande serviu para cambiar a deriva negativa do cadro verdinegro nas últimas xornadas. A disputa dunha xornada da Liga Atlántica de Billarda, correspondente á Conferencia Rías Baixas, no campo de O Leixo, obrigou a variar o escenario do partido. Aínda que finalmente as malas condicións meteorolóxicas impediron que o torneo de billarda se celebrase en O Leixo, mudando este escenario por un espazo a resgardo das choivas como o Pavillón Municipal de O Mosteiro, o encontro da Terceira Galicia de Veteranos, que desde o pasado luns estaba fixado en Zacande, desenvolveuse no lugar que estaba previsto. O deste sábado foi un duelo no que o cadro que a priori partía como favorito, dada a súa situación na táboa clasificatoria, impuxo a súa lei. Moito máis contundente e efectivo nas dúas áreas, o Godos C.F. Veteranos levouse os tres puntos nun partido equilibrado en canto a xogo, pero con superioridade visitante en canto a contundencia e efectividade en ambas as dúas áreas.

Comezou o encontro cun Armenteira Veteranos dubitativo, ao que, como acostuma ocorrer nas últimas xornadas, lle custa entrar nos partidos. O Godos C.F. facíase coa posesión do esférico e os de A Armenteira mostraban fisuras e unha debilidade na presión e na liña defensiva que facilitaban as primeiras ocasións por parte dos caldenses. Nunha desas aproximacións, un centro de Manuel Portas desde o costado dereito, acabaría colándose dentro das mallas defendidas nesta xornada por Marcos, sen que o intento de despexe de Moncho puidese evitalo. Co resultado en contra, o Armenteira Veteranos buscou a reacción. Comandados por José Pérez na zona de mediocentros, os verdinegros foron pouco a pouco equilibrando o dominio do xogo. Con todo, os locais non eran quen de achegarse con perigo á área visitante. A dificultade para combinar e trazar xogadas en ataque e a practicamente nula profundidade por banda, limitaban as accións ofensivas dos verdinegros a balóns longos en busca dun Rubén rodeado dunha maraña de defensores ou a regates e conducións que acababan empotándrose co entramado defensivo dos de Godos. Tampouco estivo afortunado o Armenteira Veteranos nas escasas xogadas a balón parado das que dispuxo.

No segundo período, no que a copiosa choiva que caera nos primeiros corenta e cinco minutos se detivo, a situación non variou en exceso. Partia o Armenteira Veteranos coa intención de pelexar pola remontada, pero os seus obxectivos axiña se truncaron. Un centro coa perna dereita do lateral esquerdo do conxunto visitante, era cabeceado ao fondo da rede verdinegra, por Álvaro Abalo, principal referencia en ataque do Godos C.F. Veteranos que, pese a estar lastrado por unhas molestias físicas, foi a principal ameaza para a zaga local ao longo dos noventa minutos. Con dous goles de desvantaxe, os de A Armenteira non cesaron no seu intento. Comezaba a mostrar certa endebleza defensiva o Godos C.F. Veteranos, que sufría nos balóns colgados á área polos de  A Armenteira, pero a falta de contundencia e de pegada dos verdinegros, que case non eran quen de enviar o balón entre os tres paus da meta visitante, anulaban o éxito das acometidas ofensivas. Javi, Carlos Muñiz ou Galiñanes tiveron nos seus pés o coiro dentro da área visitante, sen lograr artellar disparos que puxesen a proba ao gardamallas José Ferro. Incluso puido ampliar vantaxe a escadra visitante ao aproveitar os ocos que deixaba un Armenteira Veteranos que notaba desgaste físico, pero o desacerto dos atacantes rivais e as atinadas intervencións do cancerbeiro Marcos fixeron que o resultado non se alterase.

Con esta derrota, o Armenteira Veteranos baixa ata a oitava posición, con seis puntos. Na próxima xornada, o equipo verdinegro deberá visitar ao Noalla Veteranos Portaredonda, décimo terceiro clasificado con tan só un punto. Previsiblemente de novo coa ausencia de Jorge Castro, a gran referencia ofensiva dos verdinegros, o cadro de A Armenteira tratará de retomar no campo de A Lanzada o bo rumbo co que inicio a temporada.

O Armenteira Veteranos deixa escapar tres puntos en A Reiboa nos minutos finais

                                                               FICHA TÉCNICA

ATLÉTICO COMBARRO - ARMENTEIRA VETERANOS- 3 - 2

ARMENTEIRA VETERANOS: Sirra; Jorge Dávila, Carlos Castro, Fernando, Óscar Muñiz; Galiñanes, Carlos Muñiz, José Pérez, Junior; Rubén e Jorge Castro. Tamén xogaron Bambán, Richi e Suso.

GOLES: 1-0. Minuto 11. Adrián Jorge. 1-1. Minuto 61. Jorge Castro. 1-2. Minuto 69. Jorge Castro. 2-2. Minuto 81. Adrián Jorge. 3-2. Minuto 89. Ángel García. 

ÁRBITRO: Vilariño García. Mostrou cartón amarelo a Iago Martínez, Juan González, José Manuel Maquieira, Eliseo Castro, Santiago Filgueira, Diego García e Samuel González por parte do Atlético Combarro, e a Jorge Dávila, Óscar Muñiz, Fernando, José Pérez e a Carlos Castro por partida dobre por parte do Armenteira Veteranos.

INCIDENCIAS: Partido da terceira xornada do grupo 2 da Terceira Galicia de Veteranos da delegación de Pontevedra disputado no campo de A Reiboa, en Poio, ante uns trinta espectadores, nunha tarde temperada e despexada, e sobre un terreo de xogo cun superficie de céspede artificial nunhas condicións idóneas para a práctica do fútbol.

  CRÓNICA

O Armenteira C.F. Veteranos sufriu este sábado, 21 de outubro, a primeira derrota do que vai de temporada. Foi tras un encontro intenso e emocionante, que se decidiu nos dez minutos finais, xa que, no o cadro verdinegro xogaba dunha vantaxe de un gol a dous no minuto 81, despois de remontar o gol inicial dos de Combarro, e na recta final viu como os locais eran quen de darlle a volta ao marcador ata alcanzar o tres a dous co que finalizou o partido.

Coa ría de Pontevedra e a illa de Tambo ao fondo, e sobre un terreo de xogo de céspede artificial cunha abundante presenza de partículas de caucho, precisamente na semana na que se deu a coñecer a noticia pola que a Unión Europea prohibe para o horizonte de 2030 este tipo de material polo alto grao de contaminación que provoca, o encontro tivo, xa desde o inicio, unha gran intensidade. O alto ritmo de xogo que trataban de imprimir os locais sorprendeu a un Armenteira Veteranos ao que lle está custando entrar nos partidos esta temporada. Facendo circular o coiro con rapidez, actuando con enorme mobilidade e cunha presión elevada, o Atlético Combarro era claramente o dono da situación na primeira parte do duelo. Os visitantes non atopaban o seu plan de xogo, e nin o mediocampo, que contaba novamente coa presenza de José Castro na zona de creación tras unha temporada alonxado dos terreos de xogo, e tampouco a defensa, desarbolada unha e outra vez tanto polos costados como pola parcela central, eran quen de impoñerse ante as acometidas do adversario. Despois dalgún aviso dos locais, nunha acción dos de Combarro pola banda dereita, o centro é rexeitado polos defensores verdinegro, pero Adrían Jorge, o futbolista máis incisivo dos de Poio este sábado, desde a frontal da área empalma un zurdazo ante o que nada puido facer un Sirra que volvía situarse baixo paus tras recuperarse da doenza que arrastraba desde o último partido da pretemporada. Alcanzada a vantaxe no marcador, o Atlético Combarro foi reducindo pouco a pouco o ritmo de xogo, aínda se mantivo como claro dominador ante un conxunto visitante que non daba atopado a maneira de poñer en apuros a defensa dos poienses. Un lanzamento de falta de Rubén, o especialista dos de A Armenteira neste tipo de accións, foi o único disparo a porta dos verdinegros neste primeiro período.

Tras a reanudación, a situación comezou a variar. Aínda que os locais dispuxeron dalgunha acción coa que ampliar vantaxe, a medida que avanzaban os minutos o Armenteira Veteranos ía atopándose máis cómodo. Xa non sufría tanto en defensa e Carlos Muñiz e José Pérez non só resultaban vencedores na maioría das disputas na zona central do mediocampo, senón que ademais lograban conectar con Rubén e Jorge Castro na zona de ataque. No carril esquerdo, Bambán, que facía o seu debut coa elástica verdinegra, gañando os balóns divididos e combinando cos seus compañeiros, comezaba a protagonizar algunha internada pola súa banda. Nunha desas accións, Jorge Castro recibe o coiro no medio da defensa local, e tras desembarazarse de varios defensores e supera ao meta do Atlético Combarro cun disparo liso pegado ao pau dereito da portería. O tanto deu máis folgos aos visitantes, que estaban no mellor momento do encontro e víanse capaces incluso de alcanzar a remontada. E así foi. Novamente Jorge Castro, e novamente nunha acción individual na que impuxo a súa condicións física e as súas virtudes técnicas fronte aos zagueiros do conxunto poiense. o dianteiro de Vilar enviaba un balón a altura da escadra dereita da meta rival para colocar o un a dous no marcador. O resultado en contra axitou ao Atlético Combarro, que adiantou liñas e acumulou efectivos en ataque, ao tempo que aumentaba o ritmo e a intensidade do xogo. Non se caracterizaba o duelo por unha especial dureza nas disputas, pero ante os numerosos choques e lances habituais dun partido intenso como era este, a resposta do colexiado Vilariño García era unha e outra vez a sanción con cartón amarelo. Ata trece cartolinas amarelas mostrou o trencilla na tarde deste sábado en A Reiboa. Cando o Armenteira Veteranos xa soñaba cunha nova vitoria que o consolidase no liderato, nos últimos minutos o encontro deu un xiro substancial. Tras unha xogada na que os locais trataron de penetrar polo costado esquerdo, o balón chegou a pés de Adrián Jorge que, desde o borde da área, colacaba co pé esquerdo o esférico no fondo das mallas defendidas por Sirra. Non se conformaban coa igualada os de Combarro e, fronte a un Armenteira Veteranos afectado polo tanto do empate, foron a polo triunfo. Un saque de curruncho que no que os futbolistas verdinegros estiveron escasamente contundentes no despexe e nas marcaxes, Ángel García recibía o balón no segundo pau, con tempo para mirar a portería e colocar con precisión o coiro no interior da meta verdinegra. Apenas quedaba marxe de reacción para o Armenteira Veteranos, que aínda así, co partido a piques de finalizar, dispuxo dunha clara ocasión para salvar polo menos un punto tras un lanzamento de córner de Rubén que Galiñanes cabezou no segundo pau. O testarazo, que a simple vista deu a impresión de entrar, desviouse por centímetros da meta local, acabando coas esperanzas dos verdinegros, que viron ademais como as opcións se esfumaban definitivamente cando Carlos Castro recibía o segundo cartón amarelo nunha xogada na que interceptou un ataque rival curtando de forma expeditiva o coiro, e na que o colexiado decidiu castigar a violencia do impacto posterior contra o atacante dos de Combarro.

Con esta derrota, o Armenteira Veteranos sitúase na terceira posición, con seis puntos. Na próxima xornada, os verdinegros deberán recibir en O Leixo á S.D. Puentearnelas, quinto clasificado, tamén con seis puntos, no que reeditará un duelo de rivalidade entre dous clubes veciños que se vén repetindo temporada tras temporada na liga de veteranos. Curiosamente, fai menos dun mes, no último partido de pretemporada, Armenteira Veteranos e S.D. Puentearnelas víronse as caras nunha cita de preparación que nesa ocasión deparou unha vitoria do conxunto vermello. Agora, os de A Armenteira, máis rodados e reforzados, e co aval que normalmente supón o campo de O Leixo, tratarán de reter os puntos para manterse na loita por ocupar os postos máis altos da táboa.

Recital goleador do Armenteira Veteranos para estrear a liga 2023/2024 en O Leixo

 FICHA TÉCNICA

ARMENTEIRA VETERANOS - CASTRELO C.F. VETERANOS- 7 - 2

ARMENTEIRA VETERANOS: Óscar Muñiz; Jorge Dávila, Fernando, Martín, Rubén; Galiñanes, Javi, Carlos Muñiz, Marcial; Suso e Jorge Castro. 

GOLES: 0-1. Minuto 4. José Ramón Señoráns. 1-1. Minuto 8. Rubén. 2-1. Minuto 24. Rubén. 3-1. Minuto 56. José Ramón Señoráns, en propia meta. 4-1. Minuto 69. Jorge Castro. 5-1. Minuto 75. Jorge Castro. 5-2. Minuto 75. Juanfran Somoza. 6-2. Minuto 85. Jorge Castro. 7-2. Minuto 87. Jorge Castro, de penalti.

ÁRBITRO: Otero Otero. Mostrou cartón amarelo a Jorge Velo por parte do Castrelo C.F. Veteranos.

INCIDENCIAS: Partido da segunda xornada do grupo 2 da Terceira Galicia de Veteranos da delegación de Pontevedra disputado no campo de O Leixo, ante uns quince espectadores, nunha tarde soleada e bastante calorosa, e sobre un terreo de xogo cun superficie de terra nunhas condicións aceptables.

  CRÓNICA

O Armenteira C.F. Veteranos estreábase este sábado, 14 de outubro, como local na liga 2023/2034. Nun campo de O Leixo que presentaba unha escasa afluencia o cadro verdinegro afrontaba un duelo de rivalidade ante un clube veciño e amigo, como o Castrelo C.F. Veteranos. Todo un clásico das ligas de veteranos, entre os dous únicos equipos da comarca que disputan os seus partidos como locatarios sobre un terreo de xogo cunha superficie de terra. Os enfrontamentos entre meisinos e cambadeses adoitan ser equilibrados e igualadas, e así se presumía que sería na tarde deste sábado, pero neste caso as previsións erraron e a vitoria cae de forma clara e contundente do lado verdinegro. Foi nun encontro no que os locais compareceron unicamente con once futbolistas, sen ningún recambio no banco de suplentes, pero no que souberon remontar o gol inicial dos de Castrelo e encarrilar unha cómoda vitoria que os sitúa no liderato da clasificación cando se levan disputadas dúas xornadas de liga.

Parecía que desde o inicio o Castrelo C.F. Veteranos quería tomar as rendas do encontro. O conxunto da parroquia do municipio de Cambados apostaba por un fútbol combinativo, que fluía basicamente das botas de Emilio Barrio desde a zona de mediocentros. Un envío en longo cara o centro da defensa verdinegra acabo dando lugar a un saque de curruncho no que, ante a relaxación na marcaxe da defensa local, José Ramón Señoráns remataba coa testa no segundo pau cara o fondo da rede da meta defendida por segunda xornada consecutiva por Óscar Muñiz. Negros augurios parecían extendense sobre as mentes dos futbolistas do Armenteira Veteranos, que contemplaban con resignación como o marcador se lle poñía en contra nada máis comezar o encontro. Pero non tardaron en reaccionar os verde e negros. Rubén, posiblemente o futbolista en mellor estado de forma da escadra de A Armenteira, volveu exhibir a que é unha das súas principais virtudes, o xogo a balón parado. Nesta volta postrado no lateral esquerdo, ante as numerosas ausencias no conxunto local, o futbolista de Caroi non quixo deixar de manifestar a súa faceta goleadora. Nun golpe franco desde aproximadamente vinte metros de distancia, Rubén empalmaba un pelotazo que sorprendeu ao meta Dimitar Nedyalkov e igualaba o marcador. O tanto do empate permitiu que o Armenteira Veteranos recobrase confianza no seu xogo e pouco a pouco comezou a deixarse ver con máis frecuencia polas inmediacións da área visitante. Aínda que as acometidas dos de Castrelo non cesaban, o fútbol de corte directo e transicións rápidas do equipo verdinegro ía dando resultado e as ocasións dos locais ían chegando co paso dos minutos. Pero sería de novo Rubén, e novamente nun lanzamento a balón parado, o que se encargaría de anotar o tanto do Armenteira Veteranos. Tal foi a potencia que lle imprimiu ao balón, que Dimitar Nedyalkov, que nesta ocasión se viu obrigado a exercer de gardamallas accidental, foi quen de repeler o coiro cos brazos, pero este continuou a súa traxectoria cara o fondo da rede. Coa situación encauzada, o Armenteira Veteranos trataba de contemporizar e asegurar a parcela defensiva, que se vía amenazada sobre todo polas entradas do Castrelo C.F. Veteranos polo carril dereito. 

Tras o descanso, os locais saíron coa mesmo reto dos últimos minutos do período inicial, manter a seguridade e a intensidade en defensa e buscar con transicións rápidas a presenza de Jorge Castro en ataque. E esta táctica pareceu dar resultado. Un lanzameto de falta lateral de Jorge Castro era enviado no intento de despexe por José Ramón Señoráns cara a súa propia portería. Este tanto marcou un punto e aparte no encontro, xa que a partir de aquí o Armenteira Veteranos incrementou a cofianza en si mesmo e comezou a crer máis nas posibilidades de vitoria, ao tempo que os de Castrelo foron cedendo e entrando nunha progresiva crise de xogo. Foise creando o ambiente propicio para as delicadezas e as florituras e así, tras unha asistencia en profundidade de Javi mediante unha rabona, Jorge Castro internábase polo costado esquerdo e o seu centro acababa adentrándose no interior da meta rival. Escasos minutos despois, un envío en longo de Rubén desde o centro da liña defensiva, no que Suso, de costas á portería realiza unha apertura de pernas para deixar pasar o esférico, despistando aos zagueiros adversarios, Jorge Castro, só ante o cancerbeiro do Castrelo C.F. Veteranos, coloca o que sería o cinco a un. Non se rendiron os xogadores visitantes e nunha internada de Juanfran Somoza pola banda esquerda, o seu centro impactaba nas luvas de Óscar Muñiz e acaba no fondo das mallas verdinegras. O partido estaba xa sentenciado, pero o Armenteira Veteranos aínda tivo tempo para ampliar vantaxe. Unha cabezada de Jorge Castro era sacada de dentro da liña de gol polo meta rival, decretando gol o colexiado e, nos intres finais, unha acción na que o propio Jorge Castro se plantaba nun cara a cara co gardamallas de Castrelo, o dianteiro de Vilar era derrubado cando polo cancerbeiro cando se dispoñía a driblalo. A pena máxima, transformada por Jorge Castro, servía para pechar unha vitoria abultada, na que o Armenteira Veteranos demostrou máis pegada ca fútbol, pero na que volveu demostrar que a compenetración e o espíritu de equipo, xunto coa capacidade de desequilibrio de futbolistas como Rubén ou Jorge Castro son as principais bazas de cara a esta temporada. Despois dunha xogada na que Dimitar Nedyalkov, nesta ocasión como xogador de campo, resultaba lesionado, Otero Otero asubiaba o final do partido e os xogadores encamiñábanse en dirección aos vestiarios ante o xúbilo da escasa afección que se congregou este sábado en O Leixo.

Con este triunfo, o Armenteira Veteranos sitúase á fronte da clasificación, un liderato que pode resultar anecdótico, dado que só se levan disputadas dúas xornadas de liga, pero demostran a fortaleza dun plantel moi limitado en canto a número de efectivos, pero que nesta temporada parece recobrar a confianza e a fe nas súas posibilidades que os diversos avatares da pasada temporada lle fixeron perder. Queda moita liga por diante, e moito traballo e moito esforzo por realizar para corroborar estas expectativas. Pero para elo, na próxima xornada deberá superar con éxito outro novo reto, neste caso ante o Atlético Combarro, un equipo incorporado esta temporada á liga de veteranos, que pon de manifesto o auxe do balompé na parroquia poiense, e que de momento non logrou sumar ningún punto no que se leva de liga, pero que de seguro suporá outro duro obstáculo no camiño do Armenteira Veteranos.

O Armenteira Veteranos inicia a liga cun triunfo tras unha remontada nunha recta final trepidante

                                                              FICHA TÉCNICA

XOCAS S.D. - ARMENTEIRA VETERANOS - 1 - 2

ARMENTEIRA VETERANOS: Óscar Muñiz; Jorge Dávila, Carlos Castro, Carlos Muñiz, Moncho; Galiñanes, Javi, Martín, Marcial; Rubén e Suso. Tamén xogou Jorge Castro.

GOLES: 1-0. Minuto 32. Fernando Acebedo. 1-1. Minuto 90. José Ramón Meléndez p.p. 1-2. Minuto 90. Javi. 

ÁRBITRO: Padín Ordóñez. Mostrou cartón amarelo a Sergio Falcón parte do Xocas S.D. e a Óscar Muñiz por parte do Armenteira Veteranos.

INCIDENCIAS: Partido da primeira xornada do grupo 2 da Terceira Galicia de Veteranos da delegación de Pontevedra disputado no campo de Berdón, ante uns vinte espectadores, nunha tarde soleada e calorosa, e sobre un terreo de xogo de céspede artificial nunhas condicións aceptables para a práctica do fútbol.

  CRÓNICA

O Armenteira C.F. Veteranos comeza a liga 2023/2024 da mellor maneira. Nun campo no que nunca lograra vencer, como é o campo de Berdón, o conxunto verde e negro consiguiu arrincar os tres puntos tras unha recta final apoteósica. Foi tras un encontro con dúas partes ben diferenciadas. No primeiro período o dominio correspondeu aos locais, mentres que no segundo, o Armenteira Veteranos fíxose coas control do xogo e soubo levarse o triunfo con dous tantos nos intres finais. Na memoria dos xogadores verdinegros estaban experiencias nas que o equipo verdinegro acostumaba ver como lle remontaban e se lle escapaban puntos nos últimos minutos pero, nesta ocasión, a situación foi totalmente distinta, e foron os de A Armenteira os que foron quen de arrebarlle os tres puntos ao adversario.

Tratou de asumir o dominio o Xocas S.D. desde o inicio. Mediante un fútbol combinativo desde la liña defensiva e intentando imprimirlle velocidade á circulación do coiro, o cadro vilagarcián quería deixar claro que se presenta nesta categoría coa intención de recuperar o posto na Segunda Galicia de Veteranos perdido na pasada temporada. Mentres, o Armenteira Veteranos, agardaba no seu campo, con orde e intensidade defensiva, e intentaba de vez en cando buscar a profundidade e o desborde que sempre ofrece Rubén en ataque. Non pasaba demasiados apuros a zaga do Armenteira Veteranos, que incluso puido sorprender aos de Vilagarcía a través dun disparo de Rubén que saiu desviado unha dunha acción por banda de Marcial, que acabou rematando contra o lateral da rede. Pero, ao fío da media hora de xogo, nunha acción de posible fóra de xogo, Fernando Acebedo recibiu unha pase que se colou polo medio da defensa verdinegra, e superou co seu disparo a Óscar Muñiz, meta accidental na xornada deste sábado. Parecía que con este tanto se abría camiño cara unha clara vitoria local, aínda que, mantendo a intensidade en defensa e as liñas xuntas, o Armenteira Veteranos ía recuperando a confianza nas súas opcións para traer un resultado positivo de Berdón.

O cambio definitivo deuse no segundo período, cando Jorge Castro puido incorporarse ao encontro. Co dianteiro de Vilar sobre o terreo de xogo, e co reforzo das boas sensacións da primeira metade, o equipo verde e negro foi tomando o control do xogo. A seguridade que transmitían no centro da zaga Carlos Castro e Carlos Muñiz, con Javi dirixindo o xogo desde a zona de creación, perfectamente acompañado por Martín, e, sobre todo, coa sociedade que forman en ataque Jorge Castro e Rubén, o conxunto de A Armenteira foi pouco a pouco cercando a meta rival. Con todo, ese dominio non se traducía en claras ocasións de gol e as que tiveron os atacantes verdinegros, demasiado forzadas, non tiveron o éxito agardado. Incluso tiveron a oportunidade de aumentar vantaxe os locais, a través dalgunha acción de contraataque, e, especialmente, nun lanzamento de falta que atallou Óscar Muñiz, O futbolista de Fofán, que tivo que poñerse as luvas para suplir a un Sirra que arrastra unha lesión desde o partido amigable da pasada fin de semana en Ponte Arnelas, mostrou unha notable solvencia baixo paus e resolveu con acerto as contadas ocasións nas que o Xocas S.D. o puxo a proba. Cando parecía que os tres puntos se ían quedar en terras vilagarcianas, nunha acción combinativa na que o Armenteira Veteranos conseguiu levar o balón ata a área pequena do equipo rival, José Ramón Meléndez, intentando interceptar un pase de gol, acabou introducindo o coiro na súa propia portería. O resultado poñía xustiza ao observado sobre o terreo de xogo, pero a historia non finalizara aínda e, nun saque de curruncho efectou por Rubén coa súa habitual precisión, Javi empalmaba un certeiro testarazo no segundo pau, que colocaba o un a dous no marcador e enchía de euforia aos xogadores visitantes e á escasa afección que os acompañou.

Con esta vitoria, o Armenteira Veteranos sitúase na quinta posición, con tres puntos. Na próxima xornada, a disputar o sábado, 14 de outubro, o cadro verde e negro recibirá a visita do Castrelo C.F. Veteranos, o cal tamén logrou vencer no primeiro encontro de liga, no seu caso ante o Vilagarcía Bar Madia Leva. Será o regreso da competición oficial ao campo de O Leixo tras cinco meses sen recibir un partido de liga, polo que se agarda que a expectación sexa máxima.

O Armenteira Veteranos xa coñece o calendario e a composición do grupo da liga 2023/2024

 

A delegación de Pontevedra da Real Federación Galega de Fútbol deu a coñecer nas últimas horas a composición dos grupos e o calendario da Terceira División da Liga Galega de Veteranos, na que competirá o Armenteira Veteranos, en concreto no seu grupo II. O grupo estará formado por 14 equipos, entre os cales estarán o conxunto vilagarciano do Xocas, descendido da Segunda División, e o Madia Leva, Rácing Cambados e o Atlético Combarro, tres conxuntos creados na presente temporada. Será unha competición a doble volta, con 26 de xornadas, nas que o Armenteira Veteranos repetirá interesantes duelos con clubes da contorna, como o C.D. Mosteiro, nun novo derbi municipal da liga de veteranos, ou co Castrelo C.F. Veteranos ou co Dorrón C.F. Veteranos. Cun plantel que mantén a maior parte dos efectivos da pasada campaña, con escasas e puntuais incorporación, á espera de que chegue algún reforzo máis, o cadro verde e negro quere esquecer o a experiencia da pasada temporada, na que, debido a diversas dificultades que mermaron o equipo, os resultados non cumpriron as expectativas. O retorno do goleador e futbolista referencia Jorge Castro, despois de superar unha grave lesión, será a base sobre a que se asentará unha formación que busca safisfacer o amor e a paixón polo fútbol dos seus integrantes, ao tempo que trata de competir e alcanzar os maiores éxitos posibles, representando e levando o nome da parroquia polo campos dos arredores, como o leva facendo desde fai case vinte anos.

ç

O Armenteira C.F. feminino volve ao traballo celebrando os éxitos da temporada pasada

 O proxecto do Armenteira C.F. feminino para a temporada 2023/2024 comezou a rodar este venres, 8 de setembro. Nas instalacións do campo de O Leixo congregáronse boa parte das futbolistas do cadro verdinegro, xunto co corpo técnico e representantes da Xunta Directiva, para planificar o traballo dunha temporada que se presenta de novo esixente e na que o conxunto de A Armenteira aspira, como mínimo, a repetir os éxitos da pasada campaña, no que se alzou co campionado da Copa Rías Baixas, unha competición na que tivo unha traxectoria impecable, vencendo en todos os encontros da liguiña. A clara vitoria fronte ao C.D. Mosteiro, o 21 de maio, outorgáballe matematicamente un título que engrosaba as vitrinas dun Armenteira C.F. catro anos despois do último gran éxito, o campionato de liga acadado polo equipo infantil na temporada 2018/2019. Co impulso que supón o logro da pasada campaña, o proxecto da entidade verdinegra para a nova campaña atópase plenamente consolidado, asegurando a continuidade de boa parte das compoñentes do plantel nas últimas temporadas, e coa posible incorporación dunha serie de reforzos que axuden a incrementar os recursos do equipo. Nos próximos días darase a coñecer a composición do grupo e o calendario da liga feminina de fútbol-7 que organizan as delegacións de Pontevedra e Vigo da Real Federación Galega de Fútbol, que está previsto que se inicie a comezos do mes de outubro e na que a escadra verdinegra se medirá a outros clubes da comarca como o C. Juventud Cambados ou o C.D. Mosteiro.

San Martiño logra dar a sorpresa e asalta o título do III Campionato Interparroquial do Concello de Meis

O equipo da parroquia de San Martiño logrou alzarse do título do III Campionato Interparroquial do Concello de Meis que se disputou este sábado, 1 de xullo, no campo Municipal José Betanzos "Pepe" de O Mosteiro. Aínda que a vitoria de San Martiño podería considerarse unha sorpresa, dado que se trata dunha das parroquias con menor número de habitantes e con menor extensión do municipio, o conxunto que nesta edición vestiu con camisola laranxa conta cunha xeración de futbolistas de notable calidade, que o situaban como un claro aspirante a facerse cun título que nas edicións anteriores se levara o conxunto da parroquia de San Lourenzo de Nogueira. Os outros equipos que a priori partían como favoritos, como é o caso de San Vicente, Paradela ou San Lourenzo, dispoñían dun plantel máis amplo en comparación co de San Martiño, pero este tiña un vigor xuvenil e un talento, propios dunha parroquia emerxente a nivel demográfico, que lle permitiron avanzar sen apenas dificultades na primeira fase. Tras superar ao equipo de A Armenteira no cruce de cuartos de final, San Martiño superou ao combinado de San Lourenzo na quenda de penalties, despois de que o encontro finalizase cun cero a cero, e plantouse na final, na que se mediu a un conxunto de Paradela que para as citas da tarde perdeu a un dos seus principais efectivos, Marcos Blanco, futbolista do Villalonga F.C., que só puido participar no torneo na xornada da mañá. Na final o vento axiña se puxo de cara para os de San Martiño, pois lograba colocarse por diante por primeiros minutos, e pouco despois, Raúl Abal, ampliaba vantaxe para os laranxa co dous a cero. O partido semellaba encarrilado, pero Paradela soubo reaccionar, e antes de chegar ao descanso, conseguía igualar o encontro a dous tantos. Na segunda metade, os dous equipos contemporizaron, xa que, no medio da calor e do intenso cansanzo nas pernas dos futbolistas, un tanto do adversario podería supoñer a condena definitiva. No caso de San Martiño, futbolistas como o gardamallas Fernando, ou os xogadores de campo Raúl Abal ou Lucas, disputaran practicamente todos os minutos do campionato, poñendo ao límite as súas condicións físicas. A quenda de penaltis encargouse de decidir o campión do Interparroquial¨2023, e tras errar tres lanzamentos o conxunto de Paradela, Bruno, o futbolista de menor idade dos de San Martiño, un rapaz con raíces na parroquia de A Armenteira, da que é natural a súa familia por vía paterna, e que xa demostrara as súas dotes e a seu atrevemento ao longo do torneo, no que conseguira un precioso gol de chilena, convertiu a pena máxima que outorgaba o título ao equipo da súa parroquia. O capitán do cadro laranxa, Zoqueiro, que exerceu de adestrador na xornada deste sábado, recibiu de mans da alcaldesa Marta Giráldez o trofeo que acreditaba a San Martiño como o meritorio campión do Campionato Interparroquial do Concello de Meis.

Digna participación do equipo de A Armenteira no III Campionato Interparroquial do Concello de Meis

Finalmente foron vinte dos vintecatro xogadores inscritos, os futbolistas que representaron á parroquia de A Armenteira no III Campionato Interparroquial do Concello de Meis que se disputou este sábado, 1 de xullo, no campo Municipal José Betanzos "Pepe" de O Mosteiro. As ausencias de última hora e por diversos motivos de Junior, José Pérez, Pacheco e Iván Borrageiros non impediron que a parroquia cisterciense presentase un plantel extenso, completo e variado. Sirra, Varela, Javi González, Dani, Adrián Fernández, Manu Meixús, Chiscas, Carlos Castro, Íñigo, Carlos Muñiz, Rubén, Jorge Castro, Borja, Pellejo, Álex Rodiño, Javi Abal, Rubén, Fran Charlín, Martín, Jorge Dávila e Adrián Graña. Estes son os nomes dos vinte protagonistas dun equipo que en principio ía lucir unha camisola negra, pero ao cal a organización acabou outorgando unha elástica rosa, curiosamente a cor coa que se estreou neste torneo aló pòlo ano 2019.

Encadrado no grupo B, xunto cos equipos das parroquias de San Vicente de Nogueira, de San Lourenzo de Nogueira, e o combinado de Amigos do C.D. Mosteiro, o equipo rosa partía no grupo a priori máis complicado, xa que nel figuraban os finalistas da última edición, San Vicente e San Lourenzo, e un equipo convidado con futbolistas con longo percorrido no balompé comarcal e de contrastado nivel e experiencia neste tipo de campionatos. Pese a todo, a participación do conxunto de A Armenteira pode calificarse como digna. No primeiro dos encontros, tivo que adoptar un plantexamento máis defensivo, fronte a un equipo de San Vicente dominador da pelota e que trataba de imprimir un ritmo áxil ao xogo.Tras resistir nos primeiros minutos e gozar dalgunha ocasión de claridade, o partido rematou coa vitoria de San Vicente por dous tantos a cero. No segundo dos partidos, o máis brillante da formación de A Armenteira neste evento, no que disfrutou das mellores ocasións, e no que puido sentenciar, o gol inicial de Adrián Fernández para os de A Armenteira foi insuficiente para alcanzar o triunfo, pois o rival, San Lourenzo, lograba igualar a escasos minutos para o final. Xa no último partido da mañá, o cansanzo e a intensa calor fixeron mella no equipo rosa, que caeu con contundencia fronte ao combinado de Amigos do C.D. Mosteiro. A nota positiva deste encontro estivo no tanto conseguido por Chiscas, nun lanzamento de falta directo e por Álex Rodiño, o compoñente máis novo do conxunto de A Armenteira e que facía o seu debut no torneo, e que nos intres finais do partido cruzaba o coiro ante a saída do meta adversario para materializar o segundo dos goles do seu equipo neste encontro.

Máis difícil se presentaba a situación nas eliminatorias da tarde. O rival ao que tiña que medirse era o equipo de San Martiño, que culminara a liguiña da primeira fase como líder do grupo A. O conxunto da parroquia veciña, nesta ocasión presentábase como un dos máximos candidatos a alzarse co título. Aínda que se trata dunha das parroquias con menos poboación do municipio de Meis, con pouco máis de 500 habitantes, só por diante de San Salvador, San Martiño conta cunha xeración de futbolistas que destacan pola súa xuventude e por un nivel de calidade de fútbolística á altura de moi poucos equipos nun torneo desta categoría. Umia C.F., Sanmartín C.F. de Vilaxoán, ou Arosa SC. son algúns dos clubes nos que militan os representantes deste talentoso equipo. Fronte a ese potencial o Armenteira C.F. espuxo intensidade e motivación, e nun duelo equilibrado a balanza acabou decantándose polos de San Martiño en dous pequenos detalles. O conxunto de A Armenteira non foi quen de converter as ocasións das que gozou, mentres que San Martiño exhibiu unha maior pegada. Un lanzamento de falta de Lucas desde o borde da área adiantaba aos de laranxa e un gol pastasma, tras unha cabezada de Bruno, no que os de A Armenteira reclamaron que o esférico non traspasara a liña de gol, serviron para que a vitoria caese do lado do equipo da marxe norte do río Armenteira, o que deixaba ao conxunto rosa definitivamente fóra da competición.

Pero máis aló do eido deportivo, este sábado foi unha xornada de convivencia e de compañeirismo, que reuniu a xogadores das sete parroquias do municipio de Meis e doutros lugares da contorna, e que desde as dez da mañá ata pasadas as nove da tarde congregou a un importante número de persoas no Municipal José Betanzos "Pepe". Boa parte dos futbolistas xantaron no propio campo, co eses foron os momentos de maior distensión, no que os parladoiros, as anécdotas e os chistes fixeron esquecer, especialmente no caso dos compoñentes do equipo de A Armenteira, os resultados desfavorables. A experiencia serviu ademais para estreitar lazos entre os futbolistas e para achegar ideas e propostas de cara á participación na próxima edición, que agardan con impaciencia a maior parte dos futbolistas que representaron ás oito escadras que compareceron no III Campionato Interparroquial do Concello de Meis.

A Armenteira ultima a configuración do equipo co que participará no III Interparroquial do Concello de Meis

A menos dun mes para a celebración do III Torneo Interparroquial do Concello de Meis o equipo que representará á parroquia de A Armenteira ultima a súa configuración. Como en anos anteriores, o Armenteira C.F. está sendo o encargado de reunir ao grupo de xogadores naturais, residentes ou con vínculos moi estreitos coa parroquia. Na primeira edición, que tivo lugar no 2019, o equipo co que acudirán a esta competición resultara moi escaso en número de efectivos, o que dificultou as súas posibilidades de avanzar no torneo. No pasado ano, no que o Interparroquial volveu disputarse tras dous anos de parón obrigado a causa da pandemia da COVID-19, o Armenteira C.F. xa conseguiu xuntar un plantel amplo, situación que agardan repetir na presente edición. De feito, na listaxe provisional, na que falta por confirmar a asistencia dalgún dos futbolistas, figuran máis de vinte xogadores. Será un plantel variado, tanto en idade como nos lugares de procedencia, pois haberá representación de practicamente todos os lugares da parroquia, con xogadores que se moven nunha franxa de idade que vai desde os 17 anos dos máis novos aos corenta e cinco dos máis veteranos. Como se indicou desde a organización, que como en anteriores edicións corre a cargo do C.D. Mosteiro, os equipos participantes deben facilitar a composición do plantel co que participarán como moi tarde ao longo desta fin de semana, o que fai que os encargados de cada conxunto apuren estes días os últimos detalles da convocatoria. No caso da formación representativa de A Armenteira tratarán de formar un conxunto competitivo e equilibrado en todas as liñas que poida competir con dignidade nunha competición que nas dúas ocasións que se disputou contou co mesmo equipo gañador, a escadra que acudiu en representación da parroquia de San Lourenzo de Nogueira. A cita, será o sábado, 1 de xullo, no campo Municipal José Betanzos "Pepe" de O Mosteiro.

O Armenteira Veteranos non pode finalizar a liga cunha vitoria tras caer en Valga ante o Salud S.D. Veteranos

                                                                 FICHA TÉCNICA

SALUD S.D. VETERANOS - ARMENTEIRA VETERANOS - 2 - 1

ARMENTEIRA VETERANOS: Sirra; Jorge Dávila, Fernando, Óscar Barreiro, Moncho; Júnior, Javi, Carlos Muñiz, Víctor; e Galiñanes.

GOLES: 1-0. Minuto 54. Ricardo Cousiño. 2-0. Minuto 59. David Fragua. 

ÁRBITRO: Villalba Rodríguez-Hermida. Non mostrou cartóns amarelos aos xogadores de ambos os dous equipos.

INCIDENCIAS: Partido da vixésimo sexta e última xornada do grupo 2 da Terceira Galicia de Veteranos da delegación de Pontevedra disputado no campo Municipal de Campaña, en Valga, ante uns dez espectadores, nunha tarde con nubes e claros, e lixeiramente calorosa, e sobre un terreo de xogo de céspede artificial cunha superficie bastante desgastada e cunha concentración das partículas de caucho moi desigual.

  CRÓNICA

O Armenteira C.F. Veteranos non puido finalizar a liga 2022/2023 co mellor sabor de boca. Cun equipo moi mermado polas numerosas e importantes ausencias, o cadro verde e negro presentouse no campo Municipal de Campaña, en Valga, nunhas condicións nada favorables para afrontar o reto de lograr a terceira vitoria consecutiva. Con todo, e pese ás dificultades, o Armenteira Veteranos deu a cara e competiu dignamente, conseguindo manter a igualada ata o descanso. Pero, tras a reanudación, o cansanzo e a falta de efectivos de recambio, acabaron condenando aos verdinegros fronte a un rival que daba entrada a xogadores do banco unha e outra vez.

O encontro empezou con relativo equilibrio. En base a un ritmo de baixo pouco acelerado, o Salud S.D. Veteranos trataba de levar a iniciativa e combinaba desde a liña da defensa, aínda que sen demasiada profundidade. Agardaba no seu campo o Armenteira Veteranos, que xa nos primeiros minutos dispuxo dunha clara ocasión nos pés de Galiñanes, que recibiu en velocidade pero que, ante a saída do meta rival, enviou o coiro por enriba do pau longueiro. Pese á merma de efectivos, non sufriu en exceso o conxunto de O Leixo nestes primeiros corenta e cinco minutos, e incluso foi quen de tocar e construír xogadas, a través dun fútbol máis elaborada có que habitulamente practica. Un lanzamento de falta de Fernando e outra ocasión na que Galiñanes recibe na área, e na que, tras acomodarse o balón, ve como o seu disparo se foi por fóra, pegado ao pau esquerdo da meta dos de Valga.

No segundo período, xa se fixeron máis notables os desaxustes no equipo visitante. O cansanzo comezaba a facer mella nas pernas dos futbolistas verdinegros, que mostraban máis distancia entre liñas, unha maior lentitude nos repregues e menos intensidade na presión e na recuperación. Os ataques do Salud S.D. Veteranos empezaron a ser máis frecuentes e o Armenteira Veteranos confiaba as súas operacións ofensivas a algunha arrincada de Fernando desde a liña defensiva ou aos constantes movementos de Javi na zona de mediocampo que, acompañados dos seus destellos de calidade, permitían trenzar algunha acción de relativo perigo. Ricardo Cousiño, despois de recibir un envío raso en longo, que se colou polo medio da defensa verdinegra, emprendou carreira cara a meta de Sirra e bateu ao gardamallas de Couso cun disparo a media altura. Sen tempo case a recuperarse, unha saída de Sirra fóra da área para interceptar un ataque adversario, remata cunha perda de balón na zona do mediocentro, que permitiu que David Fragua, desde a media lúa da área, aproveitando que o cancerbeiro abandonara a portería, trazase unha volea directa ao fondo das mallas. Con dous tantos de desvantaxe, o partido parecía xa definitivamente sentenzado. Sen efectivos que desen aire ao equipo desde o banco, o Armenteira Veteranos resistía como podía e buscaba combinar, triangular e trazar algunha xogada que o achegase á área rival, pero a disposición do equipo no campo cada vez era máis desordeada e os problemas físicos nos xogadores comezaban a aflorar. Nun saque de curruncho do Salud S.D. Veteranos, no que os defensores verdinegros non deron despexado o esférico con contundencia, un atacante valgúes era derrubado na área. Nese momento volveu emerxer a figura de Sirra, que se lanzou ao chan para deter a pena máxima e, aínda que o balón saiu despedido desde as luvas do meta de Couso cara o longueiro, acabaría retornado cara as mans do gardamallas. A excelente intervención de Sirra, quizais o futbolista máis destacado dos verdinegros nesta xornada, impediu o tres a cero para un Armenteira Veteranos que dispoñería da ocasión máis clara neste segundo período nun lanzamento de falta executado por Junior, no que o coiro, dirixido con colocación, pero sen excesiva forza, ía directo ás mans do meta Jeremy Blessin. Non houbo moito máis que reseñar nesta parte final do encontro, agás un golpe á altura do pescozo de Moncho, que obrigou a deter o xogo durante uns intres, pero que finalmente non tivo maior consideración.

Con este resultado, o Armenteira Veteranos finaliza a liga na décima posición, con dezaoito puntos, unha clasificación que pode resultar decepcionante tendo en conta as expectativas coas que partía o equipo a inicios de temporada, pero que, tendo en conta as numerosas continxencias ás que tivo que enfrontarse o conxunto verde e negro, o posto logrado pode ser ata certo punto comprensible. Queda por disputar a Copa Rías Baixas á que, nesta ocasión, dadas as previsibles baixas, parece que vai renunciar o Armenteira Veteranos. Haberá que agardar entón á próxima temporada para ver vestidos de novo de curto aos futbolistas dun cadro verdinegro que buscará reforzar o plantel e iniciar un proceso de renovación ao longo do próximo verán.

Triunfo axustado do Armenteira Veteranos ante o Castrelo C.F. Veteranos para despedir oficialmente a temporada en O Leixo

 FICHA TÉCNICA

ARMENTEIRA VETERANOS - CASTRELO C.F. VETERANOS - 2 - 1

ARMENTEIRA VETERANOS: Sirra; Jorge Dávila, Carlos Castro, Óscar Muñiz, Óscar Barreiro; Galiñanes, Javi, Junior, Víctor; Rubén e Suso. Tamén xogou Carlos Muñiz.

GOLES: 1-0. Minuto 25. Rubén. 1-1. Minuto 40. Óscar Chaves. 2-1. Minuto 50. Rubén.

ÁRBITRO: Carballal Pérez. Non mostrou cartóns amarelos aos xogadores de ambos os dous equipos.

INCIDENCIAS: Partido da vixésimo quinta xornada do grupo 2 da Terceira Galicia de Veteranos da delegación de Pontevedra disputado no campo de O Leixo, en A Armenteira, ante uns trinta espectadores, nunha tarde co ceo cuberto, con néboa, e lixeiramente calorosa e sobre un terreo de xogo de terra nunhas condicións aceptables para a práctica do fútbol.

  CRÓNICA

O Armenteira C.F. Veteranos continúa nunha boa xeira de resultados. Dúas vitorias consecutivas encadea o cadro verde e negro. Tras a vitoria da pasada fin de semana en As Chans, ante a S.D. Puentearnelas, este sábado volveron repètir triunfo, e de novo ante un equipo veciño e sobradamente o coñecido, o Castrelo C.F. Veteranos. E, como nas últimas xornadas o triunfo verdinegro ten un nome propio: Rubén. O atacante de Caroi atópase nun espléndido momento de forma e tras a baixa pòr lesión de Jorge Castro, principal referencia ofensiva do Armenteira Veteranos nas últimas temporadas, decidiu asumir os galóns de líder no ataque do equipo. Ao igual que na pasada xornada, Rubén foi o autor dos dous tantos que permitiron que os tres puntos se quedaran en A Armenteira. Foron dous tantos, que ben puideron ser máis de ter a fortuna de cara nas diversas ocasións das que gozou, nun encontro que foi en xeral equilibrado e no que a diferenza a marcou a mordente nos metros finais de Rubén.

Desde o inicio xa se auguraba un partido igualado. O Castrelo C.F. Veteranos quería apostar por un fútbol máis combinativo, aínda que pecaba de falta de profundidade en ataque. Pola contra, o Armenteira Veteranos agardaba a presión tras perda para armar accións de contragolpe que conectasen coa velocidade e coa capacidade de desborde de Rubén nas proximidades da área rival. No medio deste equilibrio, ningún dos dous conxuntos non era quen de xerar ocasións claras de gol. Pero unha acción puido variar o rumbo do encontro. Nun penalti sinalizado por Carballal Pérez, Dioni, tantas veces verdugo do Armenteira Veteranos cando se atopaban cos de Castrelo, enviou o coiro por fóra, á dereita do pau da meta defendida por Sirra. O erro de Dioni na pena máxima supuxo un alivio para os locais, que viviron uns momentos de desconcerto, que lograron superar tras unha combinación polo costado dereito, no que unha precisa asistencia de Galiñanes permitiu a Rubén recibir en carreira e bater ao gardamallas Juan Carlos Insua. Cando parecía que os verde e negros encarrilaban o encontro, nunha falta colgada na área dos de A Armenteira, sen aparente perigo, o despite na marcaxe, facilitou que Óscar Chaves controlase o balón, se xirase e enviase un preciso disparo contra a rede da portería local. Restaban apenas cinco minutos para o descanso e non houbo tempo de reacción para o Armenteira Veteranos.

Houbo que agardar ao comezo do segundo período para que os de O Leixo tomasen de novo vantaxe. Unha rápida transición en ataque fixo chegar o coiro a Rubén, que empalmou un potente lanzamento que colocou no fondo da portería do Castrelo C.F. Veteranos. De novo nunha situación favorable, o Armenteira Veteranos non podía permitirse errar. Con todo, os locais non acababan de facerse co control do xogo no mediocampo e recurrían con exceso aos balóns e elevados e a un fútbol directo. Nesas circunstancias, as xogadas que atopaban a Rubén en ataque non acadaban a precisión necesaria, xa que, ademais, o dianteiro de Caroi tiña que facer fronte a solidez dos defensores cambadeses nos envíos frontais. Si podía superalos en velocidade, pero faltaba conexión entre a liña de creación e a punta de ataque. Tampouco inquedaron demasiado os de Castrelo neste segundo período, e os principais apuros para os verdinegros estiveron nos lanzamentos a balón parado, nos que as dúbidas á hora de despexar posibilitaron que o rival tivese algunha opción de empatar. Tamén dispuxo de ocasións para ampliar vantaxe o Armenteira Veteranos, pero nin Galiñanes, nin sobre todo Rubén, tiveron o acerto suficiente para lograr o que sería o tanto da igualada. Un choque no que o centrocampista dos de Castrelo Miguel Pazo caeu desvanecido sobre o terreo de xogo, causándolles dificultades para respirar durante uns intres, xa nos últimos minutos, foi o acontecemento máis reseñable da recta final dun partido no que o Armenteira Veteranos volvía alcanzar os tres puntos en O Leixo, despois de varios meses sen conseguilo.

Con esta vitoria, a escadra verde e negra sitúase na décima posición, con dezaoito puntos. Á espera do que ocorra cos corenta e cinco minutos que faltarían por disputar do encontro ante o Salud S.D. Veteranos, que fora suspendido debido á lesión do colexiado, e que, en principio ía xogarse este luns, 1 de maio, quedaría unicamente un partido en xogo. Se finalmente non se disputa o partido do próximo luns, o Armenteira Veteranos poñería o colofón á liga 2022/2023, tamén ante o Salud S.D. Veteranos, pero neste caso visitando o campo Municipal de Campaña, en Valga, a onde os verdinegros deberán desprazarse na xornada do sábado, 6 de maio, para medirse de novo a un rival directo, ao que superarían na táboa que traer os tres puntos das terras do Ulla.

Dous goles de Rubén dan o triunfo ao Armenteira Veteranos en As Chans nun partido condicionado polo intenso vento

 FICHA TÉCNICA

 S.D. PUENTEARNELAS - ARMENTEIRA VETERANOS - 0 - 2

ARMENTEIRA VETERANOS: Sirra; Jorge Dávila, Carlos Castro, Óscar Muñiz, Óscar Barreiro; Manuel, Javi, Carlos Muñiz, Víctor; Rubén e Suso. Tamén xogou Galiñanes.

GOLES: 0-1. Minuto 5. Rubén. 0-2. Minuto 38. Rubén. 

ÁRBITRO: Padierna Quintero. Mostrou cartón amarelo a Rafa Barreiro, Sergio Blanco e Manuel Mouriño por parte da S.D. Puentearnelas e a Carlos Castro por parte do Armenteira Veteranos.

INCIDENCIAS: Partido da vixésimo cuarta xornada do grupo 2 da Terceira Galicia de Veteranos da delegación de Pontevedra disputado no campo de As Chans, en Pontearnelas, ante uns vinte espectadores, nunha tarde con nubes e claros e lixeiramente calorosa, e sobre un terreo de xogo de céspede artificial notablemente desgastado e bastante seco e lento para a circulación do balón.

  CRÓNICA

Por fin se atopou de novo co triunfo o Armenteira Veteranos. Desde finais do pasado mes de febreiro o cadro verde e negro non lograba levarse os tres puntos. Daquela fora a domicilio, no campo de A Lanzada, en Noalla, e neste caso tamén foi lonxe de O Leixo, no campo de As Chans, en Pontearnelas. A localidade na que conflúen os municipios de Ribadumia, Cambados e Vilanova de Arousa estivo de actualidade ao longo desta semana polo estado da denominada Ponte de Santa Marta que, quince anos despois da súa contrución presenta graves danos estruturais que poñían en perigo a circulación rodada e obrigaron a que as administracións competentes procederan a pechala. Pero máis aló do suceso da ponte, en Pontearnelas a noticia desta fin de semana, polo menos para o Armenteira Veteranos, foi o logro dunha tan ansiada vitoria. Foi un triunfo baseado no esforzo, compromiso e na entrega colectiva dun equipo que se presentou de novo tremendamente mermado en canto a efectivos, e que tivo a Rubén, novamente cunha actuación estelar, como o seu principal estilete. O forte vento que soprou durante os noventa minutos do partido condicionou en gran medida o fútbol que puideron practicar ambas as dúas escadras.

A fortuna deparou que no primeiro período o Armenteira Veteranos tivese o vento a favor. Nun encontro a priori tan equilibrado, entre dúas formacións cun potencial e cuns recursos similares, as condicións meteorolóxicas resultaron decisivas. Trataba de contruír desde a defensa a S.D. Puentearnelas, pero os de A Armenteira, ben plantados no seu campo, e aproveitando as imprecisións que propiciaba o vento no xogo combinativo que pretendían os locais, agardaban a recuperar o coiro para desenvolver a estratexia que mellor dominan, o fútbol de contragolpe. Foi nunha acción deste tipo na que Rubén, tras recibir en carreira, se presentou ante o meta Julio Cores para empalmar unha volea cara ao fondo da rede. Levábanse unicamente cinco minutos de xogo e o Armenteira Veteranos víase nunha situación favorable das que poucas veces puido gozar esta temporada. Coa axuda do vento, o Armenteira Veteranos confiaba incluso en poder ampliar a vantaxe. O talento de Javi na zona de creación e a velocidade e o remate de Rubén en ataque eran fortalezas que máis confianza lles podían transmitir. Fronte a elo, o control e a calidade de Pablo Arosa, eixo fundamental do fútbol dos de Pontearnelas, constitúan a ameaza de maior seriedade para os verdinegros. Tras uns minutos de desconcerto, sobre a media hora de xogo, na que a S.D. Puentearnelas estivo preto de igualar o encontro e no que os de As Chans viron como o colexiado Padierna Quintero lles anulaba un tanto por fóra de xogo, nun libre directo, desde o borde esquerdo da área rival, Rubén exhibía por enésima vez a que quizais sexa a máis destacadas das súas numerosas virtudes: o lanzamento a balón parado. O atacante de Caroi imprimiulle tanta forza ao balón que, pese a que o chegou a tocar o gardamallas Julio Cores e chegou a impactar contra os postes da portería, o balón acabou adentrándose no fondo das mallas do conxunto vermello.

O dous a cero era un valioso botín para que o Armenteira Veteranos puidese afrontar a segunda metade, á que saíron os verdinegros con certo descontrol. Agora o vento sopraba en contra e impedía trenzar xogadas, sobre todo se se elevaba o coiro, práctica moi habitual no fútbol dos verde e negros. As dificultades para manter a posesión e os desaxustes tácticos permitiron que a S.D. Puentearnelas apretase aos de Armenteira cara a meta de Sirra. Pero tampouco estaban demasiado precisos os locais, que vían dificultados os pases, os controis e os disparos a portería pola intervención dun vento que en teoría ía resultar favorable neste segundo período. Ordenados, e tratando de manter a intensidade na presión e a disposición táctica, os futbolistas do Armenteira Veteranos souberon resistir. Só algunha acción illada, como un tiro de Jorge Carballo ao lateral do pau dereito da meta verdinegra e algunha cabezada Carlos Millán nos saques de curuncho fixeron sufrir en momentos concretos a un equipo que se mostrou cohesionado e deu mostras dun espíritu solidario e dun compromiso colectivo que o conduciron a unha vitoria que era moi necesaria para o moral do conxunto de cara ao final da presente campaña para os plans de futuro en relación coa próxima temporada.

Cos tres puntos do partido deste sábado, o Armenteira Veteranos sitúase na décima posición, con quince puntos. Restan dúas xornadas para finalizar a liga, e na próxima fin de semana o equipo verde e negro recibe no campo de O Leixo ao Castrelo C.F. Veteranos, un conxunto que actualmente ocupa o último posto da táboa, pero que sempre se mostra como un esixente adversario cando se mide aos de Armenteira. Será outro enfrontamento clásico das ligas de veteranos da comarca de O Salnés, entre dúas formacións que se coñecen ben e sempre adoitan ofrecer duelos entretidos nos partidos nos que se ven as caras.

O acerto en ataque de Rubén resulta insuficiente para o Armenteira Veteranos ante o Godos C.F.

FICHA TÉCNICA

 ARMENTEIRA VETERANOS - GODOS C.F. VETERANOS - 2 - 5

ARMENTEIRA VETERANOS: Sirra; Moncho, Fernando, Óscar Muñiz, Óscar Barreiro; Jorge Dávila, Javi, Carlos Muñiz, Junior; Rubén e Suso. Tamén xogou Galiñanes.

GOLES: 0-1. Minuto 12. Álvaro Abalo. 1-1. Minuto 47. Rubén. 1-2. Minuto 56. Álvaro Abalo. 1-3. Minuto 63. Álvaro Abalo. 1-4. Minuto 66. Álvaro Abalo. 2-4. Minuto 69. Rubén. 2-5. Minuto 80. Álvaro Abalo.

ÁRBITRO: Cacabelos Iglesias. Non mostrou cartóns aos xogadores de ningún dos dous equipos.

INCIDENCIAS: Partido da vixésimo terceira xornada do grupo 2 da Terceira Galicia de Veteranos da da delegación de Pontevedra disputado no campo de O Leixo, en A Armenteira, ante uns dez espectadores, nunha tarde soleada e lixeiramente calorosa, e sobre un terreo de xogo de terra nunhas condicións aceptables para a práctica do fútbol.

  CRÓNICA

O Armenteira Veteranos non termina de levantar cabeza. Moitas son as dificultades ás que ten que facer fronte nesta temporada, principalmente ás importantes e numerosas ausencias, un feito que se ve claramente reflectido na clasificación do equipo. Se a temporada pasada o cadro de O Leixo estaba a estas alturas da campaña loitando por meterse nas prazas que daban acceso á promoción de ascenso, na actualidade atópase na parte baixa da táboa, afundido na clasificación, sen mostrar practicamente ningún atisbo de reacción. No encontro deste sábado, ante o Godos C.F. Veteranos, a situación non variou respecto das anteriores citas. O equipo tratou de manter o tipo, cunha actitude digna e resistiu ata que as dificultades fixeron imposible seguir competindo por obter un resultado postivo. Nin sequera o acerto ofensivo de Rubén, principal referencia dos verdinegros en ataque esta temporada, serviu para conservar polo menos algún punto.

Desde o inicio, o Godos C.F. Veteranos asumiu a súa condición de favorito. Fíxose co control da posesión, mentres o Armenteira Veteranos agardaba agazapado no seu campo, coa esperanza de artellar unha acción de contragolpe que contactase coa velocidade e a pegada de Rubén na zona de vangarda. Non houbo ocasións claras de gol ata que, nun balón perdido polos verdinegros ao realizar un saque de banda, Álvaro Abalo irrumpe polo centro da defensa local para presentarse ante Sirra e bater ao gardamallas de Couso. Tratou de sobrepoñerse a este mazazo o cadro verdinegro, pero as súas debilidades impedían modificar a disposición táctica e o plantexamento, polo que de novo fiaba o seu porvir no encontro ao éxito dalgunha acción de contragolpe. Só en accións illadas, ou en xogadas a balón parado puido poñer en apretos aos caldenses, que tampouco dispuxeron de oportunidades de certo perigo nos minutos restantes deste primeiro período.

Tras o descanso, a coxuntura complicábanse tremendamente para o Armenteira Veteranos. As obrigas laborais e de índole persoal obrigaban a Sirra e a Fernando a abandonar o encontro, deixando desguarnecido ao seu equipo para a segunda metade. Óscar Muñiz poñía as luvas e colocábase baixo paus, unha improvisada defensa de tres, con Javi como líbero e Moncho e Óscar Barreiro como marcadores, eran o parapeto ao que un conxunto con dez futbolistas sobre o campo confiaba a súa sorte para os últimos corenta e cinco minutos. Con todo, a capacidade de resistencia do Armenteira Veteranos púxose de manifesto nada máis comezar o segundo período. Unha recuperación de balón cando os de Godos intentaban iniciar o xogo pola zona do lateral esquerdo rematou co coiro nos pés de Rubén, que recibiu en velocidade e empalmou un potente disparo desde o lado dereito do ataque ante o que nada puido facer o meta Manuel González. O empate non era un mal resultado para o Armenteira Veteranos, que intentaba contemporizar e manter polo menos o punto. Pero nunha acción na que os locais mostraron certa endebleza defensiva, un atacante do Godos caía na área tras recortar a Óscar Barreiro. Por fortuna para os verdinegros a pena máxima decretaba polo colexiado grovense Cacabelos Iglesias impactaba co pau dereito da meta defendida por Óscar Muñiz. Pero a resistencia dos de A Armenteira, en inferioridade numérica e afectados polo cansanzo nunha tarde no que o sol apretaba con bastante intensidade, viuse abaixo cando Álvaro Abalo aproveitou a falta de contundencia en defensa dos locais para colocar o un a dous. De novo en accións similares, o propio Álvaro Abalo anotaría dous tantos máis, que deixaban sentenciado o partido. Rubén, nunha xogada individual, na que se desfixo de varios adversarios, e na que se atopou cunha parada do cancerbeiro Manuel González en primeira instancia, remachaba o esférico cara ao fondo da rede para situar o dous a catro. Non había apenas opcións de remontada para un Armenteira Veteranos que administraban as escasas forzas que lle quedaban para tratar de maquillar o máis posible o resultado. Pero co equipo envorcado sobre a área rival, novamente Álvaro Abalo recibía en profundidade, e rompendo a liña do fora de xogo dos locais, emprendía unha carreira cara a meta de Óscar Muñiz, ao superaba con medido lanzamento que poñía o dous a cinco que resultaría definitivo.

Esta derrota deixa o Armenteira Veteranos na undécima posición, con doce puntos. Na próxima fin de semana a escadra verde e negra deberá visitar o campo de As Chans, para medirse á S.D. Puentearnelas, no que será un novo duelo de rivalidade entre dous conxuntos veciños e sobradamente coñecidos, no que de os de A Armenteira tratarán de recuperar algún efectivo para poder competir nas mellores condicións posibles ante os da ribeira do río Umia.

O Armenteira C.F. feminino xa coñece a composición dos grupos e o calendario da Copa Rías Baixas`2023

 A delegación de Pontevedra da Real Federación Galega de Fútbol deu a coñecer na tarde do xoves, 13 de abril, a composición e o calendario dos grupos da edición 2023 da Copa Rías Baixas. No caso do equipo feminino do Armenteira C.F, o conxunto foi encadrado no grupo dous, xunto co Tyde F.C., co C.D. Mosteiro e co Sporting Club San Mateo. A renuncia a participar na competición por parte do Marín C.F. e do C. Juventud Cambados, obrigou a reformular a composición e o formato de competición previsto iniciamente. Despois de contactar con todos os clubes que participaran na liga regular de fútbol-7 feminino nas área de Vigo e Pontevedra, para coñecer a intención de cada un deles de cara a parte final da temporada, o delegado da Federación en Pontevedra, Jaime Otero, estivo traballando intensamente nos últimos días para configurar o campionato, que deseñou baseándose fundamentalmente en criterios como a clasificación na primeira fase da liga e a proximidade entre os equipos participantes. O Armenteira C.F., que sempre manifestou a súa disposición de continuar participando na competición oficial que se establecese ata final de temporada, parte coas máximas aspiracións nun torneo que dará comezo a fin de semana do 22 de abril e que finalizará a fin de semana do 27 de maio, coincindo curiosamente coa celebración das eleccións municipais. A primeira cita para as mozas que dirixen Marcial Prado e Junior Tirado será ante o cadro ponteareán do Sporting Club San Mateo, a priori o rival de menor potencial do grupo, mentres o último partido da competición para o conxunto verdinegro será en Tui, onde se medirán ao que, en principio, parece como o adversario máis complicado, o Tyde F.C. Con todo, aínda que os pronósticos poden situar ao Armenteira C.F. como o principal favorito a alzarse co título, desde a entidade de A Armenteira apelan á prudencia e á cautela, dado que a inactividade das últimas semanas e os problemas físicos que arrastra algunha das xogadoras poden condicionar o rendemento do equipo.

O Armenteira C.F. lanza a súa propia colección de cromos dixitais

 

Por antiga que parece, a colección de cromos é unha costume que se resiste a pasar de moda. Desde fai décadas, a rapazada tivo esta afección entre as preferidas. Nos patios dos colexios, nos parques, nas rúas ou nos domicilios os nenos e nenas pegaban nos seus álbumes cromos que adquirían nos quioscos e librarías ou que se agochaban nos envases dos diversos tipos de chucherías que tanto gustan á mocidade. As negociacións volvíanse complicadas cando se trataba de intercambiar aqueles cromos que estaban repetidos e a competitividade era máxima por encher e completar os álbumes e por adquirir aqueles cromos que se retrasaban en saír á circulación. Hai quen afirma que a historia dos cromos remóntase á Francia do século XVIII, cando Luis XIV, o monarca absolutista coñecido como o Rei Sol, puxo de moda na corte de Versalles coleccionar gravados de personaxes populares da época. Pero non sería ata o século XIX cando se comezaron a comercializar. Eran unha especie de estampas en branco e negro, que os nenos e nenas mercaban para colorear. Coa chegada da técnica da cromolitografía ao mundo da imprenta a produción de cromos experimentou unha revolución. De fabricalos de forma artesanal pasaron a ser fabricados de forma mecánica, o que se traduciu nun aumento da produción e no abaramento dos custos e, polo tanto, tamén do seu prezo. Esta moda non chegaría ao fútbol ata 1961, cando Giuseppe Panini e os seus irmáns fundaron en Módena a súa mítica compañía, a través da que lanzaron unha colección de cromos baseada no campionato italiano de fútbol. Houbo que agardar ata 1970, co motivo da celebración da Mundial de México, para que a moda dos cromos de fútbol acadara unha dimensión internacional.

Seguindo a estela de Panini e da variedade de empresas, clubes ou colectivos que se dedican a poñer á disposición do público estas imaxes ilustradas, o Armenteira C.F. decidiu lanzar a partir deste mes de marzo a súa propia colección de cromos. Trátase neste caso dunha colección en formato dixital, elaborada en base ás fotografías tomadas durante os partidos do equipo feminino da entidade verdinegra e do Armenteira Veteranos. Día tras día, a través dos perfís das redes sociais do clube de A Armenteira, iranse publicando estas particulares estampas que terán como protagonistas os e as futbolistas de ambas os dous equipos. Cunha información básica, entre a que está o nome deportivo, a posición, o equipo e a temporada, desfilarán pola pasarela das redes sociais compoñentes dos planteis verdinegros. Todo elo estará aderezado con música e cunha breve descrición das cualidades e do papel e relevancia no equipo e no clube de cada futbolista. Unha iniciativa que aposta pola creatividade e a innovación e que, dependendo da aceptación que teña por parte do público, podería ampliarse co lanzamento de futuras coleccións, como por exemplo con cromos vintage con fotografías dos xogadores e xogadoras que militaron no Armenteira C.F. e no Armenteira Veteranos desde que en 1995 o fútbol de competición oficial desembarca na parroquia cisterciense. Pero para comezar, a partir deste luns, 27 de marzo, os e as amantes do balompé, e os seguidores e seguidoras dos clubes de fútbol e de todo o relacionado coa parroquia de A Armenteira, xa poderán gozar desta colección de cromos dixitais.