O momento para a épica

Na historia de todos os clubes figura un partido memorable, unha remontada aparentemente imposible, un momento para a épica. Con xa vintedous anos de percorrido, o Armenteira C.F. viviu moitos destes momentos. Na lembranza dos afeccionados e afeccionadas máis antigos e dos xogadores que as protagonizaron están aquelas reaccións fulgurantes nos gloriosos tempos iniciais, cando os berros, pero tamén a charla motivadora de Julio Serén, enseguida facían efecto e o equipo saía adiante de situacións máis ca compricadas. O pasado domingo, no campo de As Extremas, en Cotobade, o equipo alevín da entidade verdinegra deixou escrito para a historia un destes episodios. Cansos tras a dura xornada do día anterior, no que boa parte deles tiveron que soportar a violencia dos raios do sol mentres colaboraban no desenvolvemento da I Copa Armenteira, e afectados polo bochorno que envolvía o ambiente das terras altas da comarca de Pontevedra, os rapaces e rapazas que dirixe Luis Barral, que axiña tomaran vantaxe no marcador, foron cedendo terreo ante un rival que ía medrando en moral a medida que os erros e o desgaste ía arrebatando as forzas das pernas dos xogadores de A Armenteira. A situación acadou o máis alto grao de dramatismo cando, a falta de seis minutos para o asubío final, o C.E.D. Cotobade vencía por catro goles a dous. A lesión de Íñigo, vítima unha vez máis dos problemas nas plantas dos pés, parecía condenar ao equipo a unha derrota coa que se irían definitivamente as aspiracións ao título de liga. Pero o Armenteira C.F. non se rendiu e decidiu apostar pola épica. As indicacións de Luis Barral, sobradamente experimentado nestas lides, e os ánimos da bancada serviron de soporte para a fazaña. O ímpetu de Adri, que abandonou as posicións defensivas para converterse nun voraz dianteiro, apoiado por un excelente traballo en equipo, fixeron o resto. Un balón rebañado na área e un penalti provocado e transformado por el mesmo deron a Adri un papel protagonista nunha remontada na que a palabra final a puxo Javi. Saíndo dende a posición de lateral, o futbolista de Valboa avanzou pola banda esquerda ata enviar un balón raso que se colou tan pegado ao pau que fixo que a incredulidade nas bancadas fose aínda maior. Os gritos, os xestos, as expresións de xúbilo apropiáronse da afección visitante e dun Luis Barral que a duras penas podía conter a emoción. O que falta de intensidade, os despistes defensivos e a excelente actuación do meta Anxo Souto impediran viuse compensado cando a xustiza fixo a súa aparición de forma inesperada en As Extremas. "Eses son os xogadores que me gustan a min, os que nunca se renden". As palabras de Luis Barral quedarán na memoria duns rapaces e rapazas en formación e que de seguro que agora comprenderán que o esforzo, o sacrificio e a loita ata o último momento son premisas fundamentais para superar con éxito os obstáculos que se poden presentar na vida. Sen apenas tempo a dixerir este amplo repertorio de emocións este sábado chega outra proba. Será a esixente cita ante a E.F. Villa de Marín e será de novo o momento para que o valor e a afouteza de As Extremas volvan aflorar para manter ao Armenteira C.F. na pugna por un título de liga que non visita as vitrinas de O Leixo dende fai dezasete anos.

O San Xoán´2017 de A Armenteira vai tomando forma

A menos dun mes para a celebración da festa de San Xoán, a Asociación de Veciños e Veciñas de A Armenteira prepara xa intensamente todos os detalles dun evento que agarda que sexa tan multitudinario e exitoso como o foi no pasado ano. As sardiñas, o churrasco, a música, os sorteos, os foguetes e, como non, a fogueira co seu característico boneco, serán algúns dos elementos que volverán a convertir a A Armenteira nun dos principais focos festivos da contorna na noite do 23 ao 24 de xuño. Para animar a participación, os membros da entidade organizadora intensifican estes días a súa campaña de asociación. Lembran que as tarifas son de 10 € por unidade familiar e de 5 € a título individual para aquelas persoas que sexan veciños e veciñas da parroquia, e de 12 e 7 €, por unidade familiar e a título individual respectivamente, para aquelas persoas que residan noutros lugares, e que a condición de socio dará dereito a vantaxes como o desconto na cantidade a abonar por disfrutar do suculento menú que se vai servir nesta nova cita festiva.

A S.D. Noalla, campiona da I Copa Armenteira

A S.D. Noalla logrouse proclamarse campión da I COPA ARMENTEIRA. Torneo Concello de Meis que se disputou este sábado no campo de O Leixo. O cadro dirixido por Pedro Vera exhibiu un excelente nivel durante toda unha competición que destacou polo excepcional ambiente que se viviu nas instalacións deportivas do lugar de O Busto. As excelentes condicións meteorolóxicas animaron a moitos a afeccionados e afeccionadas a asistir a un torneo que a Xunta Directiva do Armenteira C.F. decidiu pór en marcha esta temporada para reafirmar a súa aposta polo fútbol feminino. Encadrados en dous grupos de catro equipos, Umia C.F., C. Juventud Cambados "B", Atlético Estrada E.D., C. Juventud Cambados "A", Atlético Arousana, S.D. Noalla, C. Mamis Arnelas F.C. e o Armenteira C.F. competiron pola mañá nunha primeira fase en sistema de liguiña que deparou unhas eliminatorias que se disputaron pola tarde e nas que se mediron Umia C.F. e S.D. Noalla e  Atlético Arousana e Atlético Estrada E.D. na loita por unha plaza na final da fase de campións, mentres que o C. Mamis Arnelas F.C. e o Armenteira C.F. pasaban directamente á final da fase de consolación, na que o conxunto anfitrión conseguiría alzarse co título ao impoñerse nos lanzamentos dende o punto de penalti. Pola súa contra, S.D. Noalla e Atlético Arousana lograban acceder á final de campións, deixando ao Umia C.F. e ao Atlético Estrada E.D. pelexando por unha terceira posición que acabarían conseguindo as de terras de Tabeirós. Na gran final, a S.D. Noalla e o Atlético Arousana, que xa se atoparan na primeira fase, na que venceran as arousanas, ofreceron un bonito espectáculo, con alternativas dun lado e do outro. A calidade de futbolistas como María Otero ou Marta Arís polas de Sanxenxo e de Ana González ou María Vázquez polas arousanas deleitaron a un público que tivo que ver como os sempre crueis lanzamentos dende o punto de penalti decidirían o equipo que inscribiría o seu nome na primeira edición desta competición. O maior acerto das de A Lanzada daríalle o trofeo de campionas, que lle sería entregado de mans do alcalde do concello de Meis, José Luis Pérez. O rexidor meisino estivo á fronte dun amplo elenco de autoridades que se deron cita en O Leixo, e que participaron nunha entrega de galardóns na que, ademais dos equipos participantes, foron recoñecidos os méritos de mulleres que contribuíron coa súa labor a engrandecer a historia do Armenteira C.F. Cristina, Lucía, Pili, Lupe e Rosa, antigas directivas da entidade verdinegra, Eva López, unha das primeiras xogadoras da historia do clube, e que coa súa existosa traxectoria abriu o camiño a moitas outras e á creación dun equipo feminino na presente temporada, e Anabel Piñeiro, a futbolista que máis tempo leva militando no Armenteira C.F. das que pertencen actualmente á entidade, tamén recibiron o seu merecido galardón. A nota negativa da xornada tivo lugar cando ía dar comezo a gran final, aínda que afortunadamente só rematou nun susto. O esvaecemento dunha xogadora do Atlético Estrada levou o pánico e a preocupación ás bancadas e fixo necesaria a presenza dunha ambulancia medicalizada, que se presentou en O Leixo aproximadamente trinta minutos despois do suceso.

Cos pés na terra desembarca este martes en A Armenteira

O programa da CRTVG Cos pés na terra chega este martes a A Armenteira da man de A Horta de San Ero, un pequeno negocio rural posto en marcha por María Carramal, unha moza da parroquia que decidiu facer do campo e dos recursos locais un xeito de vida. As cámaras acompañarán a María durante toda a súa xornada laboral. O traballo na horta, a venda na praza de abastos, o reparto polos establecementos comerciais e todo un conxunto de tarefas que realiza diariamente serán gravados para un programa que se emite na noite dos martes a partires das 22:30 horas e no que tres protagonistas, tres historias e tres vidas distintas se entrelazan. Para rematar, e para tomarse un descanso tras unha dura xornada, María e os reporteiros desprazaranse ata A Peneira. Tapería Rural, un local de hostalería que abriu recentemente as súas portas na nosa parroquia, onde se elaborará un menú cos produtos de A Horta de San Ero. As hortalizas, as legumes, as froitas, as verduras, as plantas aromáticas as flores comestibles e toda a gran variedade de produtos de agricultura ecolóxica que con tanto cariño e dedicación cultiva María na súa explotación de Vilar serán os protagonistas dunha historia da que aínda se descoñece a data de emisión, pero que volverá levar a A Armenteira aos fogares de toda Galicia e de todos os recunchos do mundo a través da pequena pantalla.

Vitoria do equipo alevín do Armenteira C.F. ante o Indepo nun partido moi deslucido

O equipo alevín do Armenteira C.F. conseguiu unha clara vitoria por catro goles a un ante a Integración Deportiva Pontevedra C.F. no partido disputado na tarde deste sábado no campo de O Leixo. Con todo, foi unha vitoria non demasiado brillante e bastante deslucida. Deslucida pola choiva, polo deficiente estado do terreo de xogo, cuberto pola lama, e pola escasa inspiración que mostraron os rapaces e rapazas que dirixe Luis Barral. O técnico de Barrantes presentou un sete inicial con Sergio Matilde baixo paus, Fran e Adri como centrais, Javi por diante da defensa, Manu Meixús e Junior polos costados, Íñigo no mediocentro e Brais Santamaría como xogador máis avanzado. Non comezaron ben as cousas para o cadro local. Co vento en conta, e aproveitando as imprecisións que acompañaron aos locais durante os cincuenta minutos, a I. Deportiva Pontevedra C.F. parecía tomar a iniciativa. Fronte a elo, os contraataques do Armenteira C.F. servían para contrarrestar o infructuoso dominio dos da capital de provincia. No primeiro deles Manu Meixús atopouse coa acertada saída de Jonatan Pombo. Non perdoaría o extremo de Couso na seguinte oportunidade da que dispuxo. Unha internada súa pola banda dereita era culminada por el mesmo case sen ángulo con gran sutileza. Unha arrincada co balón de Fran, que partindo da defensa levouse o balón como se dun extremo dereito se tratase, deu lugar ao segundo tanto para os de A Armenteira. Jonatan Pombo non puido atallar o potente disparo de Fran e Brais Santamaría, moi atento, recolleu o rexeitamento e puxo o segundo tanto no marcador para a formación local. Tras o descanso, agora coa forza do vento do seu lado, o Armenteira C.F. asumiu claramente o mando do xogo. As accións trasladáronse á metade do terreo de xogo defendida polos de Pontevedra. As ocasións de gol sucedíanse, pero a axilidade de Jonatan Pombo e o escaso acerto dos locais, impedíanlles marcar distancias. Unha ben trazada xogada colectiva foi culminada dentro da área por Íñigo, cun tiro que se colou uns centímetros por debaixo do pau longueiro. A habilidade de Junior, especialmente activo na tarde deste sábado, quedaría patente no cuarto tanto para os seus. Un contragolpe do Indepo deixaría o coiro nas botas de Adrián Vázquez, un dos máximo artilleiros do grupo, e que tamén quixo deixar constancia en O Leixo do seu potencial goleador. Habería máis ocasións para o Armenteira C.F. pero a falta de puntería e a axilidade do meta visitante impedirían que o marcador se movese. Esta vitoria por catro tantos a un mantén ao conxunto alevín do Armenteira C.F. na segunda posición, a un punto do líder, o C. Xuventú Sanxenxo. O cadro que adestra Luis Barral deberá aparcar de forma momentánea a atención ao campionato de liga, pois o luns terán que visitar o campo Municipal de Monteporreiro para enfrontarse na primeira rolda da Copa Deputación á E.F. Portero 2000, una potente escadra, que ocupa a primeira posición no grupo 62A.

Lama e choiva na primeira rolda da Copa Deputación para o equipo benxamín do Armenteira C.F.

O equipo benxamín do Armenteira C.F. viviu na tarde deste sábado o partido correspondente á primeira rolda da Copa Deputación de Pontevedra 2017. O cadro que dirixen Luis e Alba Barral medíronse no campo de O Leixo á E.F.B. Vilanova nun encontro marcado polas condicións meteoróloxicas adversas. A choiva e a lama que se se formando sobre o terreo de xogo convertíronse nas principais protagonistas e desluciron unha cita que congregou a un importante número de asistentes no campo situado no lugar de O Busto. A formación verdinegra presentou un equipo inicial formado por Sara Otero en portería, Saray, Ramón e Lucas Otero en defensa, Uxía, Óscar e Brais Charlín na liña medular e Ainoha en ataque. Nada máis comezaron a transcurrir os minutos o conxunto visitante xa tomaba vantaxe. Foi tras un saque de córner que non acertou a despexar a defensa local e que rematou de forma irremediable no fondo das mallas defendidas por Sara Otero. A superioridade da escadra vilanovesa foi evidente e pouco podía facer o Armenteira C.F. para deter as acometidas do rival. Só cando a E.F.B. Vilanova baixo o ritmo os nenos e nenas baixo a dirección de Luis Barral puideron merodear a área do seu contricante. A máis clara ocasión para os de O Leixo estivo nos pés de Brais Charlín, nun dobre remate no que se interpuxeron a defensa e o porteiro do equipo visitante. Na segunda metade a tónica continuou sendo a mesma. O cambio táctico que situou a Sara Otero na posición de mediocentro, e a Óscar coma gardamallas, apenas tivo efecto ante un conxunto vilanovés moi superior que acabaría vencendo por cero goles a trece. Con este resultado remata a experiencia do equipo benxamín do Armenteira C.F. na presente edición da Copa Deputación, mentres que a E.F.B. Vilanova continuará a súa aventura nesta competición, na que agardan na seguinte rolda o equipo que saia da eliminatoria entre a A.X.D. Verdugo e o Barro C.F. Pero tampouco haberá tempo de descanso para a escadra verde e negra, que este mércores se desprazará ata o campo de Berdón, en Vilagarcía de Arousa, para disputar o II Torneo Pazo da Golpelleira.

Proba superada polo equipo alevín do Armenteira C.F. en Corón para seguir na loita polo título

O equipo alevín do Armenteira C.F. conseguiu superar unha nova proba na loita polo título que lle permite seguir na dura pugna co C. Xuventú Sanxenxo que parece que vai deparar unha intensa e emocionante recta final do campionato ligueiro. O escenario non foi outro que o campo de Monte Redondo, en Corón, onde a escadra de O Leixo logrou vencer por dous goles a oito. O cadro técnico que forman Luis e Alba Barral presentou un cinco inicial con Sara Otero na portería, Fran e Adri como centrais, Javi por diante da defensa, Manu Meixús e Junior polos costados, Íñigo no mediocentro e Brais Santamaría en ataque. A principal novidade era a presenza baixo os paus da xogadora de categoría benxamín Sara Otero, unha rapaza á que sen dúbida se pode aplicar un dos substantivos de moda, afouteza, xa as gañas e o atrevemento que sempre mostra a fixeron progresar e de seguro que a farán chegar lonxe no mundo do fútbol feminino. Axiña tomaría vantaxe o conxunto verdinegro. Foi nunha gran xogada individual de Junior na que se plantou diante do meta Cibrán Santorum e o bateu con gran frialdade. Apenas dous minutos despois Brais Santamaría aproveitaría un erro defensivo da S.D. Chispa para, só ante o meta dos Corón, enviar o coiro ao fondo das mallas. Unha cabezada de Íñigo, outra xogada individual culminada por Junior e unha internada por banda dereita de Manu Meixús, na que cruzou con sutileza o balón ao interior da portería rival, porían un cero a cinco no marcador co que se chegaría ao descanso co encontro prácticamente resolto para os de A Armenteira. Á volta do tempo de lecer un libre indirecto colgado por Adri non puido ser despexado pola defensa celeste e acabou batendo a Iria Ferreiro, que ocupou a portería local durante este segundo período. A relaxación do Armenteira C.F. e o aumento da intensidade do conxunto de Corón permitiron que estes se fixesen co dominio durante os minutos finais, e froito dese dominio Cristian Diz acadaría dous tantos que ergueron os ánimos da decaída bancada local. Pero non houbo marxe á emoción e Íñigo empalmando unha excepcional volea e logo mediante unha acción individual na que deixou atrás a varios rivais completaría o seu particular hat-trick e fixaría o resultado de dous goles a oito co que remataron os cincuenta minutos. Con este triunfo a escadra que comanda Luis Barral continúa na segunda posición, con corenta e tres puntos, a un do C. Xuventú Sanxenxo. A próxima fin de semana estes rapaces e rapazas terán unha nova proba ante a Integración Deportiva Pontevedra C.F., un equipo que se sitúa na undécima posición con nove puntos.

O Armenteira Veteranos remonta tres goles nun partido tolo en Zacande

O Armenteira Veteranos conseguiu remontar tres goles no partido disputado na tarde deste sábado no campo Municipal de Zacande ante a S.C.D. Terras de Curro ata rematar cun empate a tres. No que foi o último encontro da liga 2016/2017 o cadro verdinegro presentou un once inicial con Joserra en portería, Jorge Dávila, Portas, Carlos e Richi en defensa, Marcial, Martín, Rafa e Joseíño na liña de medios e Jorge Castro e Galiñanes na dianteira. O encontro caracterizouse polo seu tono gris, pola falta de intensidade e polos numerosos erros tanto en ataque como en defensa. No minuto 10 unha recuperación de balón dos locais na zona esquerda da defensa do Armenteira Veteranos remataba nos pés de Roberto Palacios, que enganchou un potente zapatazo ante o que nada puido facer Joserra. A apatía dos verdinegros, que parecía non atoparse a si mesmo sobre o céspede artificial de Zacande, permitiu que nunha nova xogada pola banda dereita da S.C.D. Terras de Curro Javier García lograse un novo tanto. Preto xa do descanso un balón en profundidade cara a David Ventura, que pillou despistada unha vez máis á defensa visitante, foi culminada en gol polo extremo esquerdo dos de Curro tras superar a saída de Joserra. Pero cando todo parecía sentenciado apareceu a figura de Jorge Castro. Primeiro tras unha asistencia de Joseíño e logo recuperando el mesmo o coiro na zona defensiva local, o dianteiro de Vilar anotaba dous tantos que levaban con vida ao seu equipo ao período de lecer. Na segunda metade a tónica seguiu sendo a mesma. Ritmo baixo, moitas imprecisións e dous equipos cada vez máis rotos que deixaban amplos espazos entre liñas. As molestias físicas do colexiado García Pousada estiveron a piques de retiralo do terreo de xogo, pero, tras varios minutos de parón, decidiu continuar tras ser convencido polos xogadores de ámbolos dous conxuntos. Coa condición de que as protestas dos futbolistas cesasen García Pousada, pouco firme e moi inseguro durante os noventa minutos, resistiu co seu trote lento e dificultoso unha recta final dun encontro na que a S.C.D. Terras de Curro puido ampliar a súa bagaxe. pero na que se volveu atopar con Jorge Castro. Un penalti cometido sobre o temible atacante verdinegro, que el mesmo transformou, poñía o resultado definitivo de empate a tres ante os laios dunha escadra local que pagaba a súa desesperación co colexiado. Trinta e catro goles en vintesete partidos, unha cifra tremendamente meritoria, e que colocan a Jorge Castro no terceiro posto na táboa de goleadores do grupo, noutra temporada na que este futbolista volveu ser o xogador franquicia dun Armenteira Veteranos que finaliza o campionato nunha aceptable décima posición, con trinta e oito puntos. Con todo, o peche deste campaña aínda virá coa disputa da Copa Deputación, na o cadro verdinegro coñecerá o rival da primeira eliminatoria nos próximos días.

A mala fortuna e os erros penalizan ao equipo infantil do Armenteira C.F. en As Lampáns

O equipo infantil do Armenteira C.F. caiu derrotado por tres goles a un ante a S.D. Amanecer no partido correspondente á vixésimosétima xornada, que fóra aprazado fai dúas semanas, e que se disputou na tarde deste mércores no campo de As Lampáns, en San Vicente de O Grove. O encontro estivo marcado de inicio polo sentido minuto de silenzo que se gardou na honra do pai da xogadora verdinegra Anabel, falecido a pasada fin de semana nun tráxico accidente de tráfico en Valladolid. A futbolista cambadesa, que exerceu de capitana do seu equipo, formou parte dun once inicial no que Valentín Estévez "Tilín" situou a Santi baixo paus, Migui, Xoán, Sebas e a propia Anabel en defensa, Mosteiro, Carlos, Jose Otero e Andrés Liu no mediocampo, Álex Ruel na mediapunta e Piñeiro como home máis adiantado. A S.D. Amanecer, que partía co cartel de favorito, e que se atopa en plena loita pola segunda praza, que da dereito ao ascenso de categoría, asumiu ese favoritismo e tomou a iniciativa dende o principio. Pero a orde e a disciplina táctica do Armenteira C.F., que mostraba poucas fisuras, impedía que os locais chegasen con claridade aos dominios de Santi. Nas poucas ocasións que crearon o meta de Santo Tomé actuou con gran seguridade. Foi nunha xogada xurdida das botas de Ángel Fernández, o futbolista máis desequilibrante da formación meca, na que o balón partiu do flanco esquerdo do ataque dos de San Vicente e, tras superar as sucesivas barreiras defensivas que os visitantes ían presentando, alcanzou o outro flanco, onde Lucas Gondar, un dos futbolistas máis habilidosos dos grovenses, terminou por bater a Santi. O técnico visitante tratou de voltear a situación e situou a Mosteiro na mediapunta, a Álex Ruel na punta de ataque, mandando a Piñeiro ao interior dereito. Entón a reacción do Armenteira C.F. non se fixo agardar, e Álex Ruel colocou con extraordinaria mestría un lanzamento de falta na escadra defendida por Diego Garrido. No segundo período o ritmo dos locais parecía relaxarse, o que deu certa comodidade aos de O Leixo. O rumbo do partido puido variar se Álex Ruel finalizase en gol unha internada polo centro da defensa rival na que se plantou só ante o meta Jairo Lis, pero o centrocampista de Meaño enviou o coiro pola parte exterior do pau esquerdo. O infortunio para o conxunto de "Tilín" non se quedaría aí, e nun libre indirecto colgado por Ángel Fernández á área Piñeiro meteu a cabeza para despexar, con tan mala sorte que o balón colleu forza e seguiu en dirección á meta de Santi que, tras palmear varias veces, non puido evitar que acabase no fondo das mallas. Nunha xogada iniciada no costado esquerdo da S.D. Amanecer, que os defensores verdinegros non deron parado, o coiro finalizaría nos pés de Lucas Gondar que, con calidade, burlou á defensa e puxo o tres a un final no marcador. Non houbo posibilidades de remontada para o Armenteira C.F., no que ademais de Hugo, que entrou no terreo de xogo nos primeiros minutos da segunda metade, tamén tiveron a súa oportunidade Jeffrey, Enilson e Perla. Este resultado deixa ao conxunto verde e negro na oitava posición, con corenta e cinco puntos, á espera do partido que o próximo domingo, a partires das 10:00 horas, no campo de O Leixo, disputará ante a E.D. Arousa S.D. "B", un equipo que ocupa a quinta posición con cincuenta e nove puntos, e que tratará de esgotar as súas últimas opción de ascenso.

San Xosé Obreiro volve vestir de festa a A Armenteira

Pouco máis dunha semana despois de que se deran por finalizadas as festas de Pascua A Armenteira volve estar de festa. Agora é no lugar de Cabeza de Boi, pero tamén en As Pereiras e Gondes, na zona situada noroeste da parroquia, onde se celebran as tradicionais na honra de San Xosé Obreiro. Esta celebración, que leva máis de medio século realizándose, incluso antes da construción da capela que se atopa ao pé da estrada que conduce dende Barrantes e San Martiño cara o mosteiro cisterciense, é xa unha costume moi arraigada entre os veciños e veciñas destes lugares. Xeración tras xeración estas xentes vanse organizando para preparar un festexo que senten tan propio e polo que mostran verdadeira paixón. A alborada, a misa solemne, as ofrendas, a procesión e, como non, as verbenas, forman parte dun programa festivo que coordina a comisión que dende fai varias décadas preside Álvaro Martínez. Este ano decidiron volver apostar forte. O telón abriuse na noite do domingo 30 de abril, coa verbena amenizada polas orquestras Gran Parada e Pontevedra. O día grande, o 1 de maio, os actos comezarán co pasarrúas que percorrerá todos os recunchos da parroquia, que virá seguida dunha misa cantada a partires das 13:30 horas, e dunha serie de concursos cos seus correspondentes agasallos. Como colofón, o peche correrá a cargo do Dúo Arena, que volverá traer a A Armenteira os seus pegadizos ritmos.