Estando contigo, contigo...

"Estando contigo, contigo, contigo, de pronto me siento feliz. Y cuando te miro, te miro, te miro, me olvido del mundo y de mí. ¡Qué maravilloso es quererte así!Estando contigo, contigo, contigo, me siento feliz." Este estribillo pertence ao tema co que Conchita Bautista representou a España no festival de Eurovisión en 1961. Era a primeira ocasión na que este país acudía ao popular festival e a enérxica interpretación da artista sevillana recibiu oito puntos na votación, situándose no noveno posto entre os dezaséis participantes. Pois dende fai uns días "Estando contigo" convertiuse na melodía de fondo de moitos veciños e veciñas de Couso. O responsable de tal feito non é outro que Manolo García Vázquez, un afeccionado ao mundo da canción que este martes, 30 de xullo, debutará ante as cámaras da Televisión de Galicia, e que nos últimos días retransmite de forma incansable polo seu potente equipo de son as probas de ensaio. Tras unha fulgurante estrea nos escenarios, con gran éxito de público nas primeiras actuacións, este compoñente do grupo Los Vázquez viu como a súa carreira musical ía decaendo. A enorme expectación que levantou nos concertos iniciais non se puido manter, ao tempo que diversos obstáculos se interpoñían no camiño. Con todo, Manolo conservou a súa fe e, despois duns meses apartado dos escenarios, a oportunidade venlle agora da man da Asociación de Veciños e Veciñas de A Armenteira. A sociedade veciñal foi convidada por segundo ano consecutivo a unha gravación do programa da CRTVG Bamboleo, e nesta ocasión decidiu apostar por unha persoa con experiencia no mundo do cante para participar nunha das seccións. Xunto a Lucía Pérez, que representou a España no festival de Eurovisión de 2011, ao rapeiro DKB e a orquestra Trébol, o vocalista do grupo Los Vázquez será unha das principais atraccións que pasarán este martes polo Plató 1.000. Nas súas mans, ou mellor dito, nas súas cordas vogais, e no acerto que mostren el e o seu acompañante á hora de adiviñar títulos de cancións, estará o futuro da festa do San Xoán, evento que a Asociación de Veciños e Veciñas de A Armenteira aproveitará para promocionar ante as cámaras da canle autonómica. Pero Manolo non estará só. Contará co alento dunhas trinta persoas que se desprazarán dende A Armenteira ata Montouto, no Concello de Teo, nun autobús fletado pola organización. Será, sen dúbida, unha ocasión inmellorable para a promoción do San Xoán, unha oportunidade única para o relanzamento da carreira do grupo Los Vázquez e, sobre todo, unha experiencia inesquecible para todos e todas que asistan á gravación, así como para quen poida contemplar emisión do programa a través da pequena pantalla ou da páxina web da CRTVG.