Festival goleador de Armenteira C.F. e Catoira S.D. en O Mosteiro

FICHA TÉCNICA

ARMENTEIRA C.F. - CATOIRA S.D. - 5 - 5
ARMENTEIRA C.F. Sergio; Víctor, Íñigo, Álex, David; Andrés, Javi, Mateo; Carlos, Irene Pesqueira e Manu Meixús. Tamén xogaron Dani Díez, Villar, Júnior, Ramón e Irene Varela.

GOLES:0-1. Minuto 9. Martín Manteiga. 1-1. Minuto 11. Manu Meixús. 2-1. Minuto 13. Manu Meixús. 3-1. Minuto 28. Manuel Meixús. 3-2. Minuto 31. Yago Mera. 3-3- Minuto 34. Minuto 34. Yago Mera. 3-4. Minuto 43. Yago Mera. 3-5. Minuto 66. Antón. 4-5. Minuto 69. Carlos. 5-5. Minuto 77. Manu Meixús.
ÁRBITRO: Núñez Caamaño. Non mostrou cartóns a ningún dos dous equipos.

INCIDENCIAS: Partido da sétima xornada da Segunda autonómica infantil. Grupo 11, disputado no
campo Municipal de Meis, en O Mosteiro, antes uns sesenta espectadores, nunha mañá fresca, nublada e chuviosa por momentos, e sobre un terreo de xogo nunhas condicións idóneas para a práctica do fútbol.

CRÓNICA

O equipo infantil do Armenteira C.F. logrou sumar un novo punto ao seu casilleiro no encontro que disputou na mañá deste domingo, 4 de novembro, no campo Municipal de Meis. Foi tras un partido intenso, emocionante e cun auténtico festival goleador por parte de ámbolos dous conxuntos. O resultado de empate a cinco goles que reflectiu o marcador final é boa mostra do espectáculo que puideron contemplar as persoas que se achegaron a contemplar este duelo entre o Armenteira C.F. e o Catoira S.D. Presumíase un encontro relativamente equilibrado, dada a situación na táboa dos equipos que se enfrontaban, aínda que con lixeiro favoritismo para os das terras do Ulla, que axiña se adiantaban mediante un lanzamento de falta de Martín Manteiga que non puido ser repelido por Sergio, que chegou a tocar o balón, pero viu como se lle acababa colando entre as mans. O corpulento futbolista visitante que poñía por diante ao seu equipo, foi sen dúbida a principal preocupación dos de A Armenteira, que se atoparon con moitas dificultades para contrarrestar o seu poderío físico e a contundencia coa que pugnaba en cada xogada. Con todo, a reacción do cadro local non se fixo agardar e a velocidade e a calidade na definición nos metros finais de Manu Meixús conseguiron revertir a situación. Tres accións do veloz atacante de Couso remataron en tres tantos que colocaban en franca vantaxe á escadra verdinegra. Pero non houbo tranquilidade para a sufrida afección local e a relaxación e os desaxustes tácticos e defensivos deron a oportunidade de ir recurtando distancias ao Catoira S.D. Cun resultado de tres a tres ao descanso o segundo período presentábase pleno de emoción. E así foi. O baixón no ritmo de xogo dos locais permitiu que o conxunto viquingo lograse dous tantos máis. Un tres a cinco en contra facía supoñer que o Armenteira C.F. infantil estaba condenado a unha nova derrota. Ante isto, o adestrador Jorge Gómez decidiu adiantar a posición de Íñigo dende o centro da defensa ao mediocampo e apostar por un plantexamento máis agresivo. Varias foron as ocasións das que dispuxeron os futbolistas do clube de A Armenteira no último treito do encontro. Manu Meixús, Júnior, Javi ou Íñigo puxeron a proba ao meta visitante Pedro López, aínda que sen o acerto desexado. Si acertaría Carlos ao recoller unha asistencia de Manu Meixús e enviar o coiro suavemente cara o fondo das mallas da escadra de Catoira. E xa co encontro a piques de rematar, unha xogada na que Íñigo foi obxecto de falta por parte dun rival, e na que o colexiado aplicou a lei da vantaxe, era culminada de forma maxistral por Manu Meixús, debuxando unha parábola sobre o porteiro rival para situar o definitivo empate a cinco no marcador. O suspense prolongouse ata os últimos segundos. Unha falta cometida por Íñigo no borde da área, na zona dereita do ataque do Catoira S.D., provocou que a tensión se extendese por unha bancada ansiosa de festexar o punto que parecía acadar o equipo local. O lanzamento iríase por enriba do longueiro e o encontro finalizaría cun xusto e meritorio reparto de puntos entre dous conxuntos modestos, que ocupan a parte media-baixa da clasificación, pero que tiveron unha notable actuación e que ofreceron un bonito espectáculo sobre a superficie de céspede artificial do campo Municipal de Meis. Con este resultado o equipo infantil do Armenteira C.F. colócase na undécima posición, con catro puntos. A próxima fin de semana será de descanso para os rapaces e rapazas que dirixen Fran Filgueira "Pacheco" e Jorge Gómez, ao retirarse da competición o rival que lle correspondía, o C. Xuventú Sanxenxo "B", e non regresarán á competición ata previsiblemente o 18 de novembro, cando van recibir a visita do San Martín C.F., cuarto clasificado, con quince puntos.