Dúas accións a balón parado do A. Cinania-Idago Cal Barral acaban coas opcións de ascenso do Armenteira Veteranos

 FICHA TÉCNICA

ARMENTEIRA C.F. - A.CINANIA-IDAGO CAL BARRAL - 1 - 2

ARMENTEIRA VETERANOS: Sirra; Jorge Dávila, Carlos Castro, Javi, Moncho; Marcial, Martín, Júnior, Víctor; Rubén e Jorge Castro. Tamén xogaron Suso e Galiñanes.

GOLES: 1-0. Minuto 5. Jorge Castro. 1-1. Minuto 33. Félix Santos.  1-2. Minuto 62. Javier Rico.

ÁRBITRO: García Pérez. Mostrou cartóns amarelos a Galiñanes, Moncho e Carlos Castro por parte do Armenteira Veteranos, e a Hugo Vázquez, Félix Santos, Jacobo Campo e a Fernando Carhuachín, neste caso por partida dobre.

INCIDENCIAS: Partido da cuarta xornada do grupo D1 da liga de promoción de ascenso á Segunda Galicia de Veteranos, da zona de Pontevedra, disputado no campo de O Leixo, en A Armenteira, ante uns dez espectadores, nunha moi soleada e calurosa, e sobre un terreo de xogo nunhas condicións aceptables para a práctica do fútbol.

  CRÓNICA

O Armenteira Veteranos perdeu toda opción de ascender á Segunda Galicia de Veteranos tras o partido da tarde deste sábado no campo de O Leixo. A derrota ante o A. Cinania-Idago Cal Barral puxo fin ao soño de dar o salto de categoría, unha aventura que foi posible tras finalizar a primeira fase do campionato entre os catro mellores do seu grupo. 

Foi tras un partido que se iniciou ás catro e media da tarde, no medio dun  intenso calor, e no cal a fortuna non estivo do lado do conxunto local. Sen realizar un partido brillante, o Armenteira Veteranos non foi inferior ao seu rival no plano futbolístico, pero si no acerto de cara á portería contraria. Se na pasada fin de semana a inspiración a nivel ofensivo de Rubén, autor de dous tantos, permitira desequilibrar un partido que parecía que ía rematar en táboas, nesta ocasión non tiveron demasiada puntería os atacantes verdinegros. De novo lastrado polas numerosas baixas, o Armenteira Veteranos trataba de facer fronte a esta eiva coa confianza que outorgaba a vitoria da última xornada. E nada máis comezar o encontro, unha combinación en ataque dos verdinegros deixaba a Jorge Castro ante o meta Antonio Martínez, e o dianteiro de Vilar non perdoaba. O gol fixo incrementar a confianza dos locais, que se vían dominadores do xogo e non pasaban apenas apuros en defensa. Máis contundentes na disputa do balón e buscando transicións rápidas cara a portería dos de Cangas o Armenteira Veteranos dispuxo incluso dalgunha ocasión máis para ampliar o seu rédito. Pero, tras unha serie de desaxustes defensivos, que deron lugar a unha falta ao borde da área, o A. Cinania-Idago Cal Barral acabaría logrando a igualada en torno á media hora de xogo. Javier Rico, un auténtico especialista no lanzamento de golpes francos, que xa anotaba no partido de volta, conseguiu colar o balón por entre a barreira verde e negra e, pese a estirada de Sirra logrou  deter o coiro, un atento Félix Santos recollía o rexeitamento e mandaba o esférico ao fondo das mallas. O gol, xunto coas altas temperaturas, foron mermando as ansias do Armenteira Veteranos, que pouco a pouco foi cedendo terreo. 

Esta tendencia mantívose no segundo período, no que os visitantes ían facéndose coa posesión do xogo, apoiados sobre todo na calidade do tridente ofensivo que formaban David Vizoso na media punta e Paulo Pedrosa e Javier Rico na dianteira. Ao igual que ocorrera no partido da primeira volta, tras unha falta no ángulo dereito da área dos de Armenteira, Javier Rico conectaba un potente disparo que sorprendía a Sirra. Conscientes de que este resultado dilapitada toda opción de ascenso, os futbolistas do cadro local exprimiron as súas forzas na parte final do partido. Guiados desde a liña de creación por un moi activo Júnior, que sen dúbida foi un dos futbolistas máis destacados no partido, e apostando polos balóns aéreos e o fútbol directo, o Armenteira Veteranos foi quen de xerar varias ocasións de perigo. Jorge Castro, Javi González, Rubén, Suso ou Martín tiveron nos seus pés a posibilidade de conseguir a igualada, pero parece que a fortuna non estaba este sábado do lado local. Pero a ocasión máis clara tívoa Jorge Castro. A cinco minutos do final, o dianteiro de Vilar era derrubado dentro da área por un defensor cangués. O propio Jorge Castro encargaría de asumir a responsalidade de executar a pena máxima, atopábase coas luvas do meta Antonio Martínez. Un hábil Rubén chegaría a recoller o rexeitamento, pero axiña os defensores visitantes se interpuxeron no seu camiño para evitar o gol. Á desesperada, o Armenteira Veteranos buscou o empate nos minutos finais. A fortaleza física dos defensores rivais e a sorte esquiva en ataque para os locais fixeron que estes intentos fosen infrutuosos e que o triunfo final se acabase marchando para terras de O Morrazo. 

Con esta derrota o Armenteira Veteranos continúa na cuarta posición do grupo D1 da promoción de ascenso. A loita por subir de categoría estará agora entre a E.F.B. Vilanova-Caleiro, líder, con doce puntos, o A. Cinania-Idago Cal Barral, segundo, con oito puntos, e o Club Lamense-Serra do Suído, terceiro, con sete puntos, e que este sábado derrotou sorprendemente ao líder e gran favorito, a E.F.B. Vilanova, por un contundente catro a cero. Será curiosamente a formación de Vilanova de Arousa a que visite o campo de O Leixo a próxima fin de semana, nun partido no que os vilanoveses poderán certificar o seu pase á Segunda Galicia de Veteranos.

O Armenteira Veteranos inicia a promoción de ascenso á Segunda de Veteranos cunha derrota en Cangas do Morrazo

  FICHA TÉCNICA

A. CINANIA-IDAGO CAL BARRAL-ARMENTEIRA C.F. - 3 - 1

ARMENTEIRA VETERANOS: Sirra; Jorge Dávila, Carlos Castro, Marcos, Moncho; Suso, José Pérez, Júnior, Javi González, Martín; e Jorge Castro.

ÁRBITRO: García Luis. Mostrou cartóns amarelos a Paulo Pedrosa e Arturo Cordeiro por parte do A. Cinania-Idago Cal Barral e a Javi González, Moncho, Carlos Castro e Jorge Dávila por parte do Armenteira Veteranos.

INCIDENCIAS: Partido da primeira xornada do grupo D1 da liga de promoción de ascenso á Segunda Galicia de Veteranos, da zona de Pontevedra, disputado no campo das Pistas de Atletismo, en Cangas do Morrazo, ante uns cinco espectadores, nunha tarde soleada e anubrada por momentos, e bastante calurosa, e sobre un terreo de xogo cunha superficie de herba natural, pero moi irregular, e polo tanto, nunhas condicións non demasiado favorables para a práctica do fútbol.

  CRÓNICA

O Armenteira Veteranos non inicio con bo pé a súa aventura na promoción de ascenso á Segunda Galicia de Veteranos. Encadrado no grupo D1, xunto á E.F.B. Vilanova-Caleiro, ao Club Lamense-Serra do Suído e ao A.Cinania-Idago Cal Barral, o conxunto verdinegra parte coa máxima ilusión por desempeñar un papel digno nunha competición para non parte entre os favoritos a dar o salto de categoría. O partido deste sábado non se presentaba na mellor situación para os de O Leixo. Cun elevado número de baixas, o Armenteira Veteranos compareceu no campo das Pistas de Atletismo de Cangas do Morrazo con tan só once efectivos, o que sumado ás altas temperaturas que se rexistraban a esas horas, dificultaba a posibilidade de competir en igualdade de condicións fronte a un rival que finalizara na segunda posición do seu grupo da Terceira de Veteranos, e que si puido realizar cambios e repartir os esforzos dos seus futbolistas ao longo dos noventa minutos.

En canto ao encontro foi un partido equilibrado, con alternativas por ambos bandos, pero no que acabou decidindo a maior pegada e a maior adaptación á peculiar superficie do terreo de xogo por parte dos locais. Sen un dominador claro desde o inicio, o Armenteira Veteranos non parecía sentirse incómodo nos primeiros minutos. Cunha liña de medio campo bastante poboada, na que Júnior, José Pérez e Javi González ocupaban a zona de creación, o cadro verdinegro trataba de asumir o control do xogo, aínda que con demasiadas precipitacións. Cústaballe conectar cun Jorge Castro que, moi só na liña de ataque, e sempre rodeado de varios defensores, conseguía avanzar con moitas dificultades cara a meta adversaria. Non tardou en poñerse por diante o A. Cinania-Idago Cal Barral. Unha acción de contraataque, na que un futbolista local foi derrubado no borde dereito da área visitante daría lugar a unha falta que Javier Rico, o dianteiro máis incisivo dos cangueses, colocou na escadra esquerda da meta de Sirra. A desvantaxe no marcador non acabou coas ansias dos de  A Armenteira, que insistían no seu fútbol directo na procura de Jorge Castro. Tras varios avisos, á media hora de xogo, Jorge Castro era derrubado na área cando se plantaba diante do gardamallas local. O escaso público que se desprazou a animar ao Armenteira Veteranos reclamaba que a pena máxima fose executada por Júnior, que contou cunha pequena lexión de fans este sábado no campo das Pistas de Atletismo, pero sería o propio Jorge Castro o encargado de realizar o lanzamento do penalti. Logrou anotar o dianteiro de Vilar, aínda que non duraría demasiado á alegría para a parroquia visitante, pois nunha xogada na que os futbolistas verdinegros reclamaban que o adversario se axudou da man para levarse o balón, e na que, ao xeito dos xogadores do Real Madrid no recente enfrontamento co Manchester City esqueceron a intensidade defensiva para centrarse nas protestas ao colexiado, Paulo Pedrosa conectaba un disparo con exterior da súa bota dereita que ía de novo cara o fondo das mallas pola escadra da meta que defendía Sirra. Unha tangana despois dun choque entre Carlos Castro e un futbolista cangués, na que os graves insultos dun xogador local ao defensor do Armenteira Veteranos fixo elevar a tensión, con ameazas, agarróns e empurróns, apurou ao colexiado García Luis a sinalar a fin do primeiro período.

Tras a reanudación a situación non variou moito. Mentres o A. Cinania- Idago Cal Barral intentaba armar un fútbol combinativo desde a zona defensiva, o Armenteira Veteranos apoiábase no seu fútbol máis físico e dinámico para buscar o empate. Jorge Castro, Martín ou Suso tiveron nos seus pés a oportunidade de lograr a igualada, pero tamén puideron ampliar vantaxe os locais, principalmente cando un centro á área verdinegra impactou no cóbado de Marcos. Aínda que o central de Castrelo se atopaba sobre a liña da área, o colexiado García Luis decidiu decretar penalti. Ao lanzamento desde os once metros reaccionou Sirra cunha excepcional parada. No último tramo do encontro o Armenteira Veteranos tratou de buscar a meta local, pero o cansanzo provocaba que cada vez houbese máis espazos, o que provocaba que os de O Morrazo, guiados por David Vizoso desde a liña medular, atopasen máis vías para levar o perigo á meta de Sirra. Nunha desas accións, unha internada do lateral polo costado esquerdo, na que apenas se lle presentaron obstáculos, rematou cunha asistencia a Javier Rico que, cara a cara ante Sirra, acabaría enviando o coiro ao fondo das mallas. Era a sentenza definitiva a un partido que xa non tería máis historia e que complica enormemente as escasas aspiracións de ascenso do Armenteira Veteranos, que con este resultado finalizan a primeira xornada na cuarta posición, con cero puntos. A próxima fin de semana, a formación verde e negra deberá visitar o campo de O Terrón para medirse á potente escadra da E.F.B. Vilanova-Caleiro. O conxunto de Vilanova de Arousa liderou con absoluta autoridade a liga do grupo A, contando por vitorias todos os partidos menos un, o que o enfrontou ao Salud S.D. O enorme potencial do rival do próximo sábado e as numerosas baixas que vén arrastrando o Armenteira Veteranos converten á cita desta segunda xornada da promoción de ascenso nun reto tremendamente difícil para os de O Leixo, que buscaran exprimir ao máximo as mínimas opcións de puntuar no feudo vilanovés.

Triunfo do Armenteira Veteranos ante o AF7 Bar Madia Leva para finalizar a liga e asegurar a cuarta posición e o pase á promoción de ascenso

 FICHA TÉCNICA

ARMENTEIRA VETERANOS-AF7 BAR MADIA LEVA - 2 - 1

ARMENTEIRA VETERANOS: Sirra; Jorge Dávila, Carlos Castro, Marcos, Richi; Rubén, José Pérez, Javi González, Martín, Suso; e Jorge Castro. Tamén xogaron Martín e Galiñanes.

ÁRBITRO: Cacabelos Iglesias. Mostrou cartóns amarelos a Pablo Nine e José Luis Piñeiro por parte da AF7 Bar Madia Leva.

INCIDENCIAS: Partido da vixésimo segunda xornada de liga do grupo A da Terceira Galicia de Veteranos, da zona de Pontevedra, disputado no campo de O Leixo, en A Armenteira, ante uns dez espectadores, nunha tarde soleada e bastante calurosa, e sobre un terreo de xogo nunhas condicións aceptables para a práctica do fútbol.

  CRÓNICA

O Armenteira Veteranos logrou acadar finalmente o obxectivo que perseguía fervorasemente durante as últimas semanas. Tras varias semanas ocupando a cuarta posición, que dá acceso a disputar a promoción de ascenso á Segunda Galicia de Veteranos, o cadro de O Leixo viu como ese posto de privilexio se perdía tras os resultados adversos das tres últimas xornadas. Para recuperar a cuarta praza debía vencer no compromiso desta fin de semana ante o AF7 Bar Madia Leva e agardar a que o Castrelo C.F. Veteranos non lograse a vitoria na súa visita ao campo Municipal de Zacande, onde os cambadeses se medían a un dos conxuntos máis potentes do grupo, o Zacande-Terras de Curro. E cumprísonse ambas condicións. Con todo, pese a lograr o triunfo, o Armenteira Veteranos mostrou unha versión mediocre, a tono coa das últimas xornadas. O partido non foi brillante por ningún dos dous equipos. O AF7 Bar Madia Leva, en caída libre nesta segunda metade da liga, que viu como as opcións de acabar entre nas catro primeiras posicións, para as que partía como un dos favoritos, se lle foron esfumando nas últimas semanas, mostrouse en O Leixo como un conxunto con calidade e con dotes para practicar un fútbol combinativo, pero excesivamente indolente e falto de pegada nos metros finais. Son precisamente este tipo de equipos, que se plantan no terreo de xogo cun bloque medio-alto, os que mellor se adaptan á forma de xogo do Armenteira Veteranos, pois facilitan ese fútbol directo e de transicións rápidas ao que tanto proveito lle sacan os verdinegros, que teñen en Jorge Castro a unha auténtica arma letal nas accións de contraataque. O dianteiro de Vilar foi quizais de novo o gran protagonista do encontro. Ademais das numerosas intervencións no xogo e das ocasións das que dispuxo, demostrou non só a valía que o converte nun dos futbolistas máis valiosos da ligas de veteranos, senón tamén un carácter e unha personalidade á altura dun futbolista do seu nivel. Ao máis puro estilo Benzema, Jorge Castro, tras errar un penalti a inicios do segundo período, asumiu novamente a responsibilidade de executar o lanzamento desde os once metros cando minutos despois Cacabelos Iglesias volveu decretar unha pena máxima a favor do cadro local. E, ao contrario ca na primeira ocasión, neste caso o killer o Armenteira Veteranos non perdoaría. En canto ao desenvolvemento do encontro a tónica do xogo non variou substancialmente ao longo dos noventa minutos. Desde o inicio, os locais, con maior tensión e máis motivados, tomaron o control do xogo. Nun partido dominado polas imprecisións, con contantes perdas de balón e controis defectuosos, a posesión correspondía aos locais, aínda que non eran quen de xerar oportunidades de verdadeiro perigo. Aínda así, non tardou en adiantarse o Armenteira Veteranos, nunha xogada iniciada en Sirra, que sacou o balón xogado pola zona do lateral dereito, ata que o coiro chegou a pés de Rubén, que mediante un envío en diagonal atopou a Jorge Castro, e o dianteiro de Vilar, gañándolle as costas e superando en velocidade á defensa visitante, superou a saída do meta José Luis Piñeiro cunha vaselina que, a pesar de que chegou a tocar coa punta dos dedos o meta do equipo vilagarciano, acabou bicando o fondo das redes do campo de O Leixo. En vantaxe no marcador o Armenteira Veteranos foi gañando en confianza. Os escasos apuros que pasou en defensa viñan da man do bullicioso dianteiro José Luis Iglesias, pero sen inquedar demasiado ao sempre tranquilo e pausado Sirra. Na segunda metade a situación non variou. O dominio dos verdinegros ía pouco a pouco facéndose máis intenso, pero a falta de puntería dos atacantes, impedía que a vantaxe aumentase. Jorge Castro tivo nos seus pés a posibilidade de anotar catro ou cinco goles, pero tamén dispuxeron de oportunidades Rubén, Galiñanes, José Pérez ou Martín. A opción para marcar distancias tería primeiro Jorge Castro, tras ser derrubado na área por un defensor vilagarcián. Erraría a pena máxima o dianteiro verdinegro, enviando o balón contra o pau esquerdo da meta visitante, pero, minutos despois, sería derrubado de novo polo meta José Luis Piñeiro. Cacabelos Iglesias volvía a sinalar a pena máxima, e Jorge Castro, querendo resarcirse do erro anterior, tomaba a decisión de executar o penalti, logrando anotar neste caso. O treito final do encontro foi de relativa comodidade para o conxunto local, que incluso puido marcar algún gol máis, pero, debido quizais a un certo relaxamento, que provocou desaxustes e un certo descontrol no xogo dos verdinegros, o AF7 Bar Madia Leva comezou a asomarse algo máis sobre as inmediacións da meta de Sirra e, nunha desas ocasións, tras unha perda de balón na zona do mediocampo, José Luis Iglesias recibía unha perfecta asistencia ás costas da defensa e lograba cruzar o esférico ante a saída do arqueiro local. Non houbo tempo para o suspense nin para o sufrimento para o Armenteira Veteranos, pois o colexiado Cacabelos Iglesias decretou o final do partido uns intres despois. Con esta vitoria a formación verde e negra remata a liga na cuarta posición, con trinta e tres puntos, e asegura a súa participación na promoción de ascenso á Segunda Galicia de Veteranos, na que, segundo o plan de competición enviado pola delegación de Pontevedra da Real Federación Galega de Fútbol, compartirá grupo con outros tres equipos nunha liguiña a dobre volta. Entre os rivais desta segunda fase da liga estará a E.F.B. Vilanova-Caleiro, o conxunto que dominou con absoluta solvencia este grupo A da Terceira Galicia de Veteranos, e que conta nun potencial moi superior ao da maioría dos grupos da categoría. Ao longo desta semana coñecerase a composición definitiva e o calendario deste grupo de catro equipos. Ademais do notable papel do Armenteira Veteranos na liga cabe salientar as cifras goleadoras de Jorge Castro, que finaliza a liga como terceiro máxima artilleiro do grupo, con vintedúas dianas. Para celebrar a fin da liga, os futbolistas da entidade verdinegra dirixíronse ao finalizar o encontro ao Café Bar O`Comercio, un dos establecementos que patrocina ao clube, onde tivo lugar unha cea que reuniu ao boa parte do plantel do Armenteira Veteranos, unha celebración que nalgún caso de prolongou ata altas horas da madrugada.

O Armenteira Veteranos empata en As Chans e cede a cuarta posición na táboa

 FICHA TÉCNICA

S.D. PUENTEARNELAS-ARMENTEIRA VETERANOS - 0 - 0

ARMENTEIRA VETERANOS: Sirra; Moncho, Carlos Castro, Marcos, Richi; Rubén, José Pérez, Javi González, Júnior, Galiñanes; e Jorge Castro. Tamén xogaron Jorge Dávila, Manolo, Víctor e Suso.

ÁRBITRO: Corredera Blanco. Non mostrou ningún cartón durante o partido.

INCIDENCIAS: Partido da vixésimo primeira xornada de liga do grupo A da Terceira Galicia de Veteranos, da zona de Pontevedra, disputado no campo de As Chans, en Pontearnelas, ante uns quince espectadores, nunha tarde temperada, con nubes e claros, e sobre un terreo de xogo nunhas condicións aceptables para a práctica do fútbol.

  CRÓNICA

O Armenteira Veteranos logrou un empate con sabor amargo no campo de As Chans. O cadro de O Leixo, que partía antes de iniciarse a xornada na cuarta posición, que dá acceso a disputar a promoción de ascenso á Segunda Galicia de Veteranos, viu como ese posto de privilexio pasaba a mans do Castrelo C.F. Veteranos. Xa non depende de si mesmo o conxunto que capitanea José Luis Galiñanes, pois, pese a que tanto os de Castrelo como os de Armenteira contan ambos os dous con trinta puntos, o golavage é favorable aos da parroquia cambadesa, xa que venceron por dous tantos a cero no seu feudo, mentres que en O Leixo foron derrotados por un tanto a cero. Foi o partido deste sábado en As Chans un partido espeso, con escasa calidade futbolística, pero equilibrado e con bastante emoción. Se ben é certo que a igualada ten para o Armenteira Veteranos un sabor a derrota, o resultado aínda puido ser peor, posto que nos minutos finais os locais dispuxeron das que quizais foron as dúas ocasións máis claras do encontro. Segue coa mala xeira o cadro verde e negro, que suma tres xornadas consecutivas con derrota e sen ser quen de anotar ningún gol neses tres últimos partidos. A seca goleadora, sumada á falta de fluidez e confianza no seu xogo, están lastrando a un equipo que parecía que tiña todo a favor para finalizar a liga entre os catro primeiros clasificados, pero que agora ve como esta opción se complica de forma notable. Con todo, nos primeiros minutos do partido daba a impresión de que o Armenteira Veteranos ía retornar á súa mellor versión, esa que mantivo durante varias xornadas, con triunfos de mérito, como o logrado ante o Zacande-Terras de Curro, pero, co paso dos minutos, esas esperanzas foron esmorecéndose. Cunha S.D. Puentearnelas asentada en bloque baixo, que trataba de non deixar espazos ás costas da liña defensiva e que cedía a iniciativa do xogo aos de  A Armenteira, os visitantes asumían a posesión do coiro, aínda que non eran quen de utilizala dun xeito práctico. Apenas descolgaban futbolistas en ataque os locais, centrados máis en taponar as entradas polos costados, en cubrir as entradas de José Pérez desde a zona de mediocampo e, sobre todo, en neutralizar as accións ofensivas de Jorge Castro. O dianteiro de Vilar, principal referencia en ataque dos verdinegros, vixiado moi de preto polos zagueiros vermellos, case non tivo marxe de maniobra ao longo dos noventa minutos. Pola contra, máis aló dalgún saque de curruncho e dalgunha xogada a balón parado, case non pasou apuros en defensa o Armenteira Veteranos neste primeiro período, a pesar de que o vento sopraba a favor da S.D. Puentearnelas. As ocasións de maior claridade estiveron nos pés dos xogadores do equipo de A Armenteira. Suso, mediante unha veloz arrincada polo extremo esquerdo, na que o seu envío non atopou a Jorge Castro no interior da área e pasou rozando o pau dereito da meta local, e José Pérez, cun disparo desde o borde da área, ao que respondeu o meta Julio Cores cunha gran parada, dispuxeron das mellores oportunidades dos primeiros corenta e cinco minutos. Tras a reanudación, o Armenteira Veteranos, xa co vento a favor, foi caendo pouco a pouco na espesura. O seu fútbol, falto de fluidez, alternaba intentos de combinacións en curto e de triangulacións por banda con pelotazos sen moito sentido que non chegaban a inquedar á sólida zaga local. Sen espazos na liña do mediocampo e sen os metros necesarios para avanzar cara a portería dos de Puentearnelas, o Armenteira Veteranos non daba coa solución para lograr o gol que lle abrise o camiño do triunfo. José Pérez, Jorge Castro e Manolo polo extremo dereito, mostrábanse como os futbolistas máis activos dos de O Leixo. Pero co paso dos minutos, o cadro local foi deixando a un lado a timidez inicial e comezou a achegarse con maior frecuencia polas inmediacións da meta defendida por Sirra. Unha veloz acción pola banda esquerda do ataque da S.D. Puentearnelas, na que o atacante local quedou só diante do gardamallas de Couso, aínda que bastante escorado, fixo que cundise o pánico entre os futbolistas verdinegros. Por fortuna para os visitantes o dianteiro da S.D. Puentearnelas enviou o balón por fóra. O mesmo ocorreu noutro desaxuste da defensa verdinegra, despois dunha perda na liña defensiva, que deixou de novo a un atacante local ante Sirra. Tampouco acertou neste caso o futbolista da S.D. Puentearnelas. Tratou de reactivarse nos últimos minutos o Armenteira Veteranos, ao tempo que o partido se abría, e os locais ían atopaban cada vez máis vías para chegar ata a meta de Sirra. Ante as protestas dos futbolistas de ambos os dous conxuntos, que reclamaban un maior tempo engadido, debido a que o encontro tivo que interromperse polas lesións sufridas por dous xogadores locais, o colexiado Corredera Blanco decretou o final do encontro, engadindo unicamente dous minutos aos corenta e cinco de rigor. Con este empate o Armenteira Veteranos descende ata a quinta posición. Na próxima fin de semana o conxunto verde e negro recibirá no campo de O Leixo ao Bar Madia Leva-Arousa F7, sexto clasificado con vintecinco puntos. Estarán moi pendentes os verdinegros do que ocorra no Municipal de Zacande, onde se medirán Zacande-Terras de Curro e Castrelo C.F. Veteranos. Os de Zacande, segundos na clasificación, parten a priori como favoritos, pero atoparanse cun Castrelo C.F.-Veteranos ultramotivado, que ven de vecer a Os Raposos, terceiro clasificado, cun gol de Dioni no minuto 90. Para recuperar a cuarta praza, o Armenteira Veteranos deberá sumar un punto máis do que sumen os de Castrelo en Zacande, e para elo tratará de facer valer o factor campo e demostrar a súa fortaleza como local, pois unicamente a E.F.B. Vilanova-Caleiro, líder e campión de grupo, e o Noalla Veteranos lograron levarse este temporada os tres puntos de O Leixo.

O Armenteira C.F. feminino prepara xa a competición de Copa 2022

O equipo feminino do Armenteira C.F. afrontará nas próximas semanas a recta final da temporada 2021/2022. Na mañá deste martes, 19 de abril, a Real Federación Galega de Fútbol, deu a coñecer os grupos e o calendario da competición de Copa da modalidade de fútbol-7 que disputarán os equipos encadrados na delegación de Vigo. Os trece equipos participantes repartíronse en catro grupos, un formado por catro equipo e os tres grupos restantes con tres equipos. No caso do cadro verde e negro a sorte foi desigual. O conxunto que dirixe Marcial Prado figura no grupo GD, xunto ao Chapela C.F. e o Cultural Areas. Son dous rivais, a priori, dun potencial moi desigual. O Chapela C.F. vén de proclamarse campión do grupo 1A, no que tivo unha traxectoria impecable, con dez vitorias, un empate e unha derrota, sumando un total de 31 puntos. Na primeira fase da liga, disputaba a unha soa volta, o Chapela C.F. xa visitara o campo de O Leixo, onde vencera por un contundente cero a seis. Pola contra, o Cultural Areas, que compartiu liga co Armenteira C.F. na segunda fase da competición, no grupo 1B, finalizou o campionato na última posición, con dous puntos. Nos partidos nos que se mediron a formación verde e negra e o conxunto ponteareán o triunfo correspondeu ás de  A Armenteira. No encontro da primeira volta o Armenteira C.F. venceu por dous tantos a cero, mentres que na cita da segunda volta o resultado foi de dous tantos a seis a favor das verdinegras. Esta competición de Copa disputarase en sistema de liguiña, a unha soa volta, e comezará a próxima fin de semana, na que, curiosamente ao Armenteira C.F. lle tocará descansar. Será na seguinte xornada cando a formación verdinegra debute no torneo, visitando o feudo do Cultural Areas. Na última xornada as mozas do Armenteira C.F. terán que recibir en O Leixo ao teórico "coco" do grupo e principal favorito para alzarse co título de Copa, o equipo redondelano do Chapela C.F. As aspiracións das rapazas que adestran Marcial Prado e Júnior Tirado pasan por acceder á seguinte eliminatoria que, segundo as bases aprobadas pola delegación de Vigo da Real Federación Galega de Fútbol, para o cal terán estar entre os oito conxuntos que máis puntos sumen na liguiña. A partir de entón terán lugar as elimatorias, que se establecerán mediante sorteo, con cabezas de serie, e que se disputarán a partido único, que se desenvolverán ata que o 12 de xuño se celebre a gran final. Para a entidade verdinegra a Copa representa unha oportunidade para refrendar a progresión que o equipo feminino leva experimentando desde que se iniciou a liga e para, ao mesmo tempo, relanzar e revitalizar o proxecto de cara a próxima temporada.

O Noalla Veteranos sorprente ao Armenteira Veteranos en O Leixo

 FICHA TÉCNICA

ARMENTEIRA VETERANOS-NOALLA VETERANOS - 0 - 1

ARMENTEIRA VETERANOS: Sirra; Moncho, Carlos Castro, Javi González, Richi; Manolo, José Pérez, Júnior, Marcial; Galiñanes e Jorge Castro. Tamén xogaron Rubén, Óscar Barreiro, Víctor, Joseíño, Jorge Dávila e Suso.

GOLES: 0-1. Minuto 31. Javier Lima. 

ÁRBITRO: Leirós Brea. Mostrou cartón amarelo a Moncho por parte do Armenteira Veteranos e a Sergio Padín e Daniel Durán por parte do Noalla Veteranos.

INCIDENCIAS: Partido da vixésima xornada de liga do grupo A da Terceira Galicia de Veteranos, da zona de Pontevedra, disputado no campo de O Leixo, en A Armenteira, ante uns trinta espectadores, nunha tarde soleada e bastante cálida, e sobre un terreo de xogo nunhas condicións aceptables para a práctica do fútbol.

  CRÓNICA

O Armenteira Veteranos perdeu a oportunidade de asegurar a cuarta posición na liga, e polo tanto a última praza da promoción de ascenso que falta por adxudicar no grupo A da Terceira de Veteranos da delegaciñon de Vigo da Real Federación Galega de Fútbol. Nun partido que debía terse disputado na pasada fin de semana, e que foi aprazada a petición de conxunto rival, o Noalla Veteranos, o cadro de O Leixo puido sentenciar o seu pase á fase de ascenso. Foi unha semana complicada para o Armenteira Veteranos, que o mércores tivo que medirse no campo de O Terrón, ao equipo que lidera con solvencia o campionato desde o inicio, a E.F.B. Vilanova-Caleiro, xa matemicamente campión, nun encontro que tamén fora aprazado, neste caso a petición dos de A Armenteira. A clara e contundente derrota en Vilanova de Arousa, por outro lado agardada, non debía afectar á moral dos xogadores verdinegros, que sabían que o partido clave para consolidar o cuarto posto era o que medía este sábado ao Noalla Veteranos. Pero do que non puideron librarse os futbolistas locais foi do cansanzo aínda presente nas súas pernas tras enfrontarse a unha sucesión de partidos propia da Champions League, xogando mércores e sábado, algo á que non están demasiado acostumados os corpos destes deportistas afeccionados. Ademais, o ambiente festivo que estes días se vive na parroquia de A Armenteira, que celebra a popular e multitudinaria Romaría da Virxe das Cabezas, puido distraer a mente duns futbolistas que comparten o seu gusto polo deporte co apego á festa e a celebracións de gran arraigo nesta terra como a Romaría das Cabezas. A tenor da traxectoria na liga, todo parecía indicar que se daría un triunfo cómodo para o Armenteira Veteranos. O Noalla Veteranos, pechacancelas do campionato, apenas fora quen de gañar dous partidos no que vai de temporada e, no encontro de ida, os de A Armenteira lograran unha vitoria abultada, pese a presentarse no campo de A Lanzada unicamente con once futbolistas. A vitoria dos de Sanxenxo na última xornada fronte ao Bar Madia Leva-Arousa F7, un equipo da zona media alta da táboa, debeu servir de advertencia ao Armenteira Veteranos. Tardou en reunir once xogadores o Noalla Veteranos, o que fixo retrasar o inicio do encontro uns minutos, ante a exasperación do sempre estricto colexiado Leirós Brea. Con todo, esa actitude relaxada dos de Noalla, con moito menos en xogo ca os locais, non lles afectou en exceso durante os noventa minutos. Desde o pitido inicial víanse claramente as intencións de cada un dos conxuntos. Mentres o Armenteira Veteranos trataba de facerse co control do xogo, e debatíase entre o dilema de apostar por un fútbol máis combinativo ou por un fútbol máis directo, o Noalla Veteranos tiña ben decidido cal sería o seu papel en O Leixo. Os visitantes agardaban no seu campo, ao tempo que o Armenteira Veteranos se ía consumindo pola ansiedade ao comprobar o tanto que abriría a lata non daba chegado. E ese nerviosismo, que impedía que asumisen o control e plasmasen a diferenza de calidade entre os dous equipos foi o que provocou que nunha acción de ataque dos de Noalla, aproveitando a falta de contundencia defensiva dos locais, Javier Lima puxese por diante aos seus cun gol de bonita factura. A partir de entón o Armenteira Veteranos xa non xogaba só en contra da ansiedade, dos nervios, do cansanzo nas pernas e dos múltiples factores que aparecían no camiño, senón que tiña que xogar tamén en contra do marcador. Intentando elaborar un fútbol máis directo, que atopase a velocidade e o desborde de Manolo ou Rubén por banda, ou a presenza sempre intimidatoria en ataque para os rivais de Jorge Castro, os de O Leixo tiñan a percepción de que o tempo discorría demasiado rápido. Entretanto as continuas acometidas locais non se materialiaban en ocasións claras. Non tiñan o día os futbolistas verdinegros. Coa defensa plantada na área e coas liñas moi xuntas, o Noalla Veteranos non sufría en exceso ante os balóns frontais enviados polos defensas e centrocampistas dos de A Armenteira. Tampouco José Pérez e José Castro, posiblemente os dous xogadores máis desequilibrantes dos verdinegros, non parecían moi inspirados este sábado. Un potente disparo de José Pérez, que sacou da escadra o gardamallas Cristian Otero, moi atinado ao longo do partido, e varias ocasións de Jorge Castro, entre elas un posible penalti sobre o dianteiro de Vilar, que Carlos Leiros sancionou cunha falta desde o borde da área, foron o principal repertorio ofensivo do Armenteira Veteranos. Pero o asedio local non deu os seus froitos, e incluso algunha acción de contragolpe dos de Noalla fixo extender o susto entre a afección verde e negra. Ante a desesperación dos futbolistas verdinegros Leirós Brea daba por finalizado o encontro, e na primeira das tres finais que terá o Armenteira Veteranos no que resta de liga, os tres puntos fuxían de O Leixo. Ademais do moito que había en xogo, o partido era unha cita especial para os locais, pois supoñía o regreso á competición oficial de José López "Joseíño", un dos poucos superviventes daquel equipo do Armenteira Veteranos que comezara a súa aventura na liga fai máis de quince anos. Catro anos levaba sen calzar as botas o extremo de O Busto. Circuntancias laborais, que o obrigaron a residir lonxe da súa terra, impediran que puidese disfrutar do deporte do balompé cos seus compañeiros. Unicamente Galiñanes, Moncho, Rafa e Cacabelos resisten actualmente como representantes daquel equipo inicial. Tras esta derrota o Armenteira Veteranos mantense na cuarta posición, con vintenove puntos, dous de vantaxe sobre o Castrelo C.F. Veteranos, e catro sobre o Bar Madia Leva-Arousa F7 e o Salud S.D. Veteranos, os seus principais rivais na loita pola cuarta praza. Na próxima xornada o cadro de O Leixo deberá desprazarse ata o campo de A Chan, en Pontearnelas, para enfrontarse á S.D. Puentearnelas, noveno clasificado, con dezanove puntos.

O Armenteira C.F. pecha a liga cunha goleada ante o Marín C.F., líder e campión do grupo 1B

                                                                      FICHA TÉCNICA

ARMENTEIRA C.F.-MARÍN C.F.- 4 - 1

ARMENTEIRA C.F: Lola; Sara Torres, Ana; Anabel, Cris, Carla; e Luci. Tamén xogou Antía.

GOLES: 0-1. Minuto 1. Anabel, en propia meta. 1-1. Minuto 12. Cris. 2-1. Minuto 32. Cris. 3-1. Minuto 42. Cris. 4-1. Minuto 55. Cris. 

ÁRBITRO: Chan Pérez. Non mostrou cartóns ás xogadoras nin ao corpo técnico de ningún dos dous equipos.

INCIDENCIAS: Partido da décimo cuarta xornada da segunda fase do grupo 1B Liga Feminina de Fútbol-7 que organiza a delegación de Vigo da Real Federación Galega de Fútbol, disputado no campo de O Leixo, en Armenteira, ante uns vinte espectadores, nunha tarde soleada e despexada, cunha temperatura temperada, e sobre un terreo de xogo nunhas condicións aceptables para a práctica do fútbol.

  CRÓNICA

O equipo feminino do Armenteira C.F. pechou a liga 2021/2022 da mellor maneira posible. Tras vencer na xornada do venres ao Cultural Areas por dous goles a seis, nun partido que fora aprazado no seu día debido aos numerosos casos positivos en COVID no conxunto ponteareán, este sábado, sen apenas tempo a descansar, tiña un difícil duelo ante o líder e campión desde fai unhas semanas do grupo 1B da liga feminina de fútbol-7 que organiza a Real Federación Galega de Fútbol. Coas baixas de última hora de Alba e Paula Sineiro, que se unen ás de longa duración de Rocío, Noelia e Sara Rey, todas elas con diversos problemas físicos, o cadro verde e negra tiña ante si un reto tremendamente complicado. Nunha tarde agradable, na que o ambiente e a temperatura acompañaban especialmente, Marín C.F. e Armenteira C.F. ofreceron un bonito espectáculo nun partido entretido no que as locais estiveron bastante máis atinadas. Con todo, non comezaron ben as cousas para o conxunto que dirixe Marcial Prado. No minuto 1, unha internada pola banda dereita do Marín C.F. sorprendía á defensa e á gardamallas Lola, e Emerly, sobre a liña de fondo, enviaba o balón cara a portería, ante o que nada puido facer Anabel, que se lanzou ao chan para evitar o gol, e acabou empurrando o coiro aínda máis cara cara o fondo da rede. Co marcador a favor, todo parecía favorable para as de Marín, que se crían superiores e intentaban plasmar o seu dominio sobre o terreo de xogo. Pero, pouco a pouco, o Armenteira C.F. foi gañando terreo, e comezou a deixarse ver polas proximidades da meta defendida por Elena Soto. A sociedade Cris-Luci, que tantos réditos está dando neste final de temporada ao conxunto verde e negro, non quería pasar tampouco desapercibida neste último partido de liga. E así foi como Cris, no minuto 12, conectaba un certeiro disparo desde o borde da área, co que colocaba o un a un no casilleiro. Houbo que agardar á segunda metade para que o Armenteira C.F. fose marcando distancias. Cando se prevía un final de partido igualado, primeiro Cris, cun potente zapatazo desde a zona de mediocampo, e despois a propia Cris, nunha xogada de contragolpe conducida por ela mesma, ditaron sentenza a un partido, no que tamén Cris, cun lanzamento de media distancia, poría o colofón a unha vitoria contundente e claramente merecida por parte das locais. Un triunfo que puido ser máis abultado, de non ser polas acertadas intervencións da meta marinense Elena Soto, que tivo que repeler en varias ocasións os poderosos disparos de Cris. Nas escasas oportunidades das de Marín, a zaga verdinegra mostrouse sólida e intensa, o que se uniu á seguridade que excibiu este sábado Lola entre os tres paus. Un lanzamento ao traveseiro e un balón que quedou morto tras unha parada de Lola, foron os apretos máis grandes polos que pasaron as de A Armenteira C.F. nunha recta final do partido que foi plácida e relativamente cómoda para un equipo que foi quen de sumar seis puntos na fin de semana na que se escribiu o epílogo na liga 2021/2022. Queda aínda por dilucidar quen finalizará como máxima goleadora do grupo. De momento ten vantaxe Cris nesta clasificación, pois a futbolista do Armenteira C.F. ocupa o primeiro posto, con 25 goles, fronte aos 22 de Carla Sieira, xogadora do C.D. Mosteiro, que este domingo se enfrontará ao C.D. Agaela. Independentemente do resultado final deste duelo, as cifras goleadoras da futbolista do Armenteira C.F. son enormemente meritorias, xa que conseguiu anotar ese número de goles en tan só seis partidos, cunha media de máis de catro tantos por encontro. O rendemento e a calidade da xogadora pontevedresa chamaron a atención dalgún clube da comarca, que a través dalgún representante se puxo en contacto coa propia futbolista, á marxe da Xunta Directiva do Armenteira C.F., un feito que provocou as evidentes molestias no seo da entidade verdinegra, á que lle fai lembrar algún dos episodios máis escuros das últimas temporadas, nas que accións deste tipo, totalmente censurables e reprochables, case levan ao total desmantelamento do clube. Foi este un triunfo, efusivamente celebrado nas horas posteriores ao encontro, tanto no campo de O Leixo, como no Café Bar O`Comercio, un dos principais espónsors do equipo, nunha celebración na que, ademais de festexar a vitoria deste sábado, se aproveitou para despedir a liga e para agasallar á futbolista Sara Torres cun agasallo polo seu aniversario. Finaliza o Armenteira C.F. a liga 2021/2022 na cuarta posición, con desazete puntos. Queda esperar agora a que a delegación de Vigo da Real Federación Galega de Fútbol sortee os grupos da Copa e dea a coñecer os rivais contra os que competirá a escadra verde e negra. Como se estableceu no plan de competición enviado a principio de temporada, conformaranse grupos de tres ou catro equipos, de entre os catorce que participaron na liga de fútbol-7 da delegación viguesa, que se medirán nunha liguiña a partido único, clasificándose os oito mellores para segunda fase, nunha competición que se iniciará a partir da fin de semana do 24 de abril.