Tres puntos máis para o Armenteira C.F. infantil, que suma en Pontecaldelas a décima vitoria consecutiva

S.C.D. PONTE CALDELAS "B"- ARMENTEIRA C.F.- 3 - 5
ARMENTEIRA C.F. Sergio; David, Víctor, Álex, Carlos; Andrés, Mateo; Ramón, Júnior, Irene Varela; e Manu Meixús. Tamén xogaron Íñigo, Irene Pesqueira, Villar e Fran.

GOLES:1-0. Minuto 2. Alejandro Vidal. 1-1. Minuto 11. Manu Meixús. 2-1. Minuto 23. Abel Franco. 2-2. Minuto 41. Iñigo. 2-3. Minuto 47. Manu Meixús. 2-4. Minuto 56. Íñigo. 2-5. Minuto 72. Íñigo. 3-5. Minuto 76. Alejandro Vidal.
ÁRBITRO: Franco Echeverri. Non mostrou cartóns a ningún dos dous equipos.

INCIDENCIAS: Partido da oitava xornada da Segunda autonómica infantil. Grupo 62, disputado no campo de Chan da Barcia, en Pontecaldelas, ante uns sesenta espectadores, nunha mañá soleada e primaveral, e sobre un terreo de xogo cunha superficie de céspede artificial notablemente gastada.

CRÓNICA

O equipo infantil do Armenteira C.F. suma e segue. Dez vitorias consecutivas son as que acumula o cadro que adestran Fran Filgueira "Pacheco" e Jorge Gómez, unha bagaxe notoria que o converte no único conxunto do seu grupo da Segunda autónomica infantil que conta por triunfos os partidos disputados. Con todo, continúa a un punto do Barro C.F., xa que aos do concello veciño aínda non pasaron pola xornada de descanso á que obriga o número impar de equipos que compoñen o grupo. No encontro encontro deste domingo o Armenteira C.F. saiu excesivamente relaxado. A situación na táboa do rival, que ocupaba a última posición, permitía afrontar a cita con relativa confianza. Con bastantes variacións no once inicial a formación verdinegra axiña se viu sorprendida. Alejandro Vidal, un corpulento e potente extremo culminaba unha xogada individual polo costado dereito e poñía por diante aos locais. Reaccionaron os de A Armenteira, pero mostrando unha das principais eivas deste partido: a falta de puntería. Dúas ocasións claras erradas polo equipo de Jorge Gómez antecederon ao tanto de Manu Meixús. O atacante de Couso lograba colar o coiro por enriba do gardamallas Bieti Durán tras un lanzamento de falta. Non houbo tempo para acomodarse e, despois dunha serie de rexeitamento da zaga verdinegra, Abel Franco colocaba o dous a un. Intentaron ralentizar o xogo os de Pontecaldelas, recurrindo a frecuentes perdas de tempo, e non sería ata a segunda metade cando chegou a agardada remontada do Armenteira C.F. Un centro de Manu Meixús era rematado por Íñigo na área pequena para situar de novo a igualada. Nunha xogada rápida de transición Manu Meixús superaba a Bieti Durán, e dous tantos máis de Íñigo, facendo valer a súa superioridade física e técnico sobre os rivais, deixaban practicamente sentenciado o encontro. Xa nos intres finais, unha arrincada de Alejandro Vidal, índose en velocidade dos centrais verdinegros, era finalizada polo propio futbolista do equipo das terras do Verdugo para colocar o resultado definitivo de tres goles a cinco. Catro disparos a portería bastáronlle á S.C.D. Ponte Caldelas "B" para anotar tres tantos, fronte ás innumerables ocasións das que dispuxo o Armenteira C.F., que ben non acertaba a enviala entre os tres paus ou ben se atopaba unha e outra vez coa envergadura do meta Bieti Durán. Con este triunfo o cadro verdinegro continúa na segunda posición, con vinteún puntos, á espera de recibir a próxima fin de semana, previsiblemente no campo Municipal de Meis, en O Mosteiro, ao Villalonga F.C., co que xa se viron as caras na primeira fase da liga, nun partido no que ambos os dous conxuntos ofreceran un espectáculo de goles, finalizando cun empate a cinco tantos.

Unha labor vital no funcionamento da parroquia

Nos tres anos de historia que contemplan á Asociación de Veciños e Veciñas de A Armenteira son moitos os méritos que se lle poden atribuír. A nivel mediático é un indiscutiblemente a celebración da festa do San Xoán a que vén acadando maior repercusión, pero existen moitas outras actividades e xestións non tan recoñecidas e non por elo de menor valía. Na asemblea que se celebrará este sábado, 23 de marzo, a partires das 20:30 horas, na Casa de Cultura da parroquia, farase balance do traballo realizado pola entidade ao longo do último ano. A organización da tradicional fogueira do San Xoán, na noite do 23 ao 24 de xullo terá un papel protagonista, como tamén o terán outras celebracións, moitos menos multitudinarias como a do magosto. No ámbito festivo falarase ademais da maratón de xogos populares desenvolvida durante as festas de verán, así como do parque infantil con inchables instalado pola asociación na denominada Praza de Vilar e no campo da festa nesas mesmas datas. As expedicións organizadas ao Plató 1.000 en Montouto, no concello de Teo, para asistir ás gravacións dos programas da CRTVG Land Rober Tunai Show e Bamboleo, en colaboración co Armenteira C.F., serán outro dos puntos do balance. Pendente queda a expedición ao veterano programa Luar, para a cal a asociación fai tempo que iniciou xestións. No apartado formativo a labor durante este exercicio foi igualmente intensa. Destacan neste senso a horta ecolóxica comunitaria, que agarda pola posta en marcha de forma definitiva, o curso de pilates ou o obradoiro de trampeo de vespa velutina, xunto a outras desenvolvidas de forma conxunta con outras entidades como é o caso da A.N.P.A. O´Loureiro, do C.E.I.P. de Armenteira, entre as que sobresaen as actividades en disciplinas como a zumba ou o judo. De vital importancia tamén é o traballo da sociedade veciñal como voceira das principais preocupacións das xentes da parroquia. A denuncia dos actos vandálicos sufridos polo invernadoiro e por outras dependencias do colexio durante as festas de Semana Santa permitiron dar a coñeñer un atentado contra o patrimonio común co obxectivo de concienciar á sociedade e de instar ás autoridades para que tomen medidas de cara a anos vindeiros. Do mesmo xeito, a reivindicación, o pasado 8 de marzo, do Día Internacional da Muller, contribuíu a dar maior visibilidade a un colectivo que, ao igual que noutras partes do mundo, en A Armenteira loita por defender os seus dereitos. Non se pode esquecer tampouco a labor que a asociación realiza como intermediaria entre os veciños e veciñas e as administracións públicas. Demandas como a concentración parcelaria, a reordenación do tráfico no entorno do mosteiro cisterciense, a regulación do uso do colexio para fins non educativos, os problemas relacionados co subministro de auga da traída veciñal na Casa de Cultura, no albergue de peregrinos e no colexio, a limpeza de maleza nas fincas, nas casas e nas demais propiedades en estado de abandono, as necesarias reformas no interior do local da Casa de Cultura, as deficiencias que presenta o campo de fútbol de O Leixo ou as xestións para a ampliación do cemiterio sumánse aos contidos da axenda anual da que se dará conta na asemblea deste sábado. Asimesmo, haberá lugar para mencionar logros como a instalación da rede wifi na Casa de Cultura, na que tanto se empeñou a sociedade veciñal, aínda que quizais o tema que máis atención acapare sexa probablemente o relacionado coa problemática da presenza de cabalos nas leiras de cultivo e na vía pública, que estes días aparece recollida nos diferentes medios de comunicación. En definitiva, será a recompilación dunha extensa actuación ao longo de doce meses nos que a Asociación de Veciños e Veciñas de A Armenteira estivo en permanente alerta, sempre a disposición das súas xentes, establecendo distintas canles de comunicación, como o buzón postal ou o buzón virtual, ou ben a través dos diversos medios que permitiron que todo ou case todo que ocorría na parroquia estivese supervisado dunha maneira ou outra pola súa principal entidade representativa.

A asociación veciñal convoca á veciñanza para a asemblea do próximo sábado

A Asociación de Veciños e Veciñas de A Armenteira celebra este sábado, 23 de febreiro, a Asemblea Xeral Ordinaria correspondente ao ano 2019. Constituída no ano 2016, a entidade veciñal máis representativa da parroquia tivo que agardar ata o ano seguinte para comezar oficialmente a súa andaina, tras dar por finalizados os trámites burocráticos e administrativos. Dende entón convertiuse nun referente no tecido asociativo non só a nivel parroquial, senón tamén a nivel municipal e comarcal. A súa labor social, cultural, formativa e de promoción económica, así como o seu papel como interlocutora entre a veciñanza e as administracións públicas fan imprescindible a existencia dunha sociedade que se mantén firme grazas á persistencia da Xunta Directiva e duns veciños e veciñas que ano tras ano renovan o seu compromiso con este proxecto. Por estes motivos a asemblea deste sábado cobra aínda máis importancia. Na orde do día figuran entre outros puntos a aprobación das contas e o balance das actividades realizadas durante o exercicio de 2018, a aprobación das cotas de asociación para o presente exercicio ou o rexisto e renovación dos carnets das persoas que o desexen. Especial relevancia terá a presentación dos proxectos e actividades que a entidade vai desenvolver durante o ano 2019, pero un dos puntos máis candentes do acto será previsiblemente a análise da problemática relacionada coa presenza de cabalos salvaxes nas leiras de cultivo e na vía pública. De feito, foron varios os medios de comunicación, de carácter local ou estatal, os que, nada máis ter coñecemento da convocatoria da asemblea, se dirixiron aos representantes da asociación para informarse respecto dun feito que levanta tanta alarma entre as xentes de A Armenteira. Ao acto tamén están convidados os dirixentes das distintas agrupacións políticas que existen no Concello de Meis, que sen dúbida tomarán nota das queixas, das demandas, das propostas e das suxestións que este 23 de abril se fagan públicas no local da Casa de Cultura de A Armenteira e que tratarán de recoller para incluír nos programas electorais de cara ás comicios municipais que terán lugar o próximo mes de maio.

Resultados desiguais para os equipos de fútbol de A Armenteira nesta fin de semana

A xornada desta fin de semana deparou uns resultados e unha fortuna desigual para os equipos de fútbol de A Armenteira. Foi unha xornada intensa de fútbol no campo de O Leixo e concentrada no sábado, no que, especialmente durante a tarde, se viviu un excepcional ambiente, grazas á numerosa afluencia de público e aos berros de ánimos se escoitaban dende a bancada. Houbo resultados mellores, regulares e peores, aínda que a sensación foi pouco agradable, agás no caso do equipo infantil, que continúa coa súa xeira vitoriosa, nada máis e nada menos que nove nove triunfos consecutivos son os que acumula o conxunto que dirixen Fran Filgueira "Pacheco" e Jorge Gómez.

A fin de semana comezou co partido que disputou o equipo sénior feminino fronte ao San Roque Casablanca. O cadro que dirixe Marcial Prado levaba unha victoria e unha derrota nesta segunda fase da Liga Feminina de fútbol-7 e recibía e afrontaba un duro reto: a visita do líder do grupo. O encontro foi equilibrado con maior posesión das viguesas aínda que con ocasións claras repartidas por ambas as dúas partes. Na recta final do partido as visitantes incrementaron o ritmo do xogo, guiadas pola calidade e a capacidade de desborde de Elisa Martín-Casal e, cando só restaban catro minutos, unha internada pola banda esquerda, que saiu a cortar Anabel, rematou co balón no sobre a liña de gol para que Sara Fernández o empurrase ao fondo da rede. A derrota por cero a un coa que se pechou o encontro deixa ás mozas verdinegras na sexta posición, con tres puntos, á espera da cita da próxima fin de semana nas instalacións deportivas de O Lourambal ante o conxunto do Porriño F.C., que ocupa a cuarta praza cun punto máis cás de A Armenteira.

Xa á tarde correspondíalle o turno ao equipo infantil, que recibía ao C. Juventud Cambados"B". Os rapaces e rapazas que dirixen Fran Filgueira "Pacheco" e Jorge Gómez partían coa idea de lograr un novo triunfo para manterse nunha pugna polo liderado na que dende fai semanas vén competindo co Barro C.F., coa vantaxe para este último de ter disputou unha xornada de liga máis. Non tardou en adiantarse o equipo verdinegro. Íñigo, rompendo a defensa cambadesa, en dúas accións similares, poñía en franca vantaxe ao conxunto local. Co marcador a favor Jorge Gómez puido ir dosificando o seu plantel e facendo probaturas para rodar un equipo ao que lle agarda un final de temporada tremendamente esixente. Na segunda metade o Armenteira C.F. refrendou a súa superioridade, como soe ocurrir na maior parte dos encontros, e tres goles de Manu Meixús e un de Júnior, con asistencia do propio Manu Meixús solventaron o cómodo triunfo da formación verdinegra. Esta vitoria, que ao final foi de seis tantos a cero, mantén ao equipo infantil de O Leixo na segunda posición, con dezaoioto puntos, unicamente a un do Barro C.F. A próxima fin de semana terá que visitar o campo de Chan da Barcia, en Ponte Caldelas, onde os agarda a S.C.D. Ponte Caldelas "B", un equipo que aínda non conseguiu puntuar no que levamos da segunda fase da liga.

Pechouse a xornada co partido entre o Armenteira Veteranos e o Godos C.F. Veteranos. Era unha cita aparentemente propicia para que os locais acadasen un triunfo, algo que esta temporada se lle está resistindo ao cadro que capitanea José Luis Galiñanes. Nun encontro sen excesivo ritmo e no que escasearon as ocasións claras de gol serían os de Caldas de Reis os que tomarían vantaxe. Ramón Ares poría por diante aos visitantes xa no primeiro período. Non sería ata a segunda metade cando reaccionaron os de A Armenteira e primeiro Manueliño, índose en velocidade e batendo ao gardamallas José Carballo e logo Javi, no tempo engadido, ao enviar ao fondo da rede un potente testarazo, daban á volta ao marcador. Apresurábase a afección local a celebrar o triunfo, pero a decisión do colexiado Lorenzo De la Torre de alongo o desconto permitiu que o Godos C.F. Veteranos, tras unha internada pola súa zona de ataque esquerda, colocase o coiro no centro da área para que Diego Pérez puxese a igualada coa que finalizaron os noventa minutos de xogo. Con este reparto de puntos o Armenteira Veteranos continúa na décimo quinta posición, con catorce puntos, á espera de rendir visita, o próximo sábado ao campo de A Reiboa, no concello veciño de Poio, onde se medirá ao Raxó C.F., sexto clasificado, con trinta e sete puntos, pero ao que xa venceu na primeira votla da liga.

Unha fábrica de campionas

Cando vén de celebrarse este 8 de marzo o Día Internacional da Muller e son tantas as demandas e reivindicacións que este colectivo segue reclamando, e cando ao mesmo tempo son moitos os logros e os méritos dos que todos e todas podemos sentirnos orgullosos, o Armenteira C.F., dende a súa discreción e a súa humildade, quere ver recoñecida unha pequena cota de protagonismo. En base á tradición e a mentalidades absolutamente retrógradas, había quen consideraba ao fútbol coma un deporte de homes e para homes, no que as mulleres ocupaban un papel secundario, limitándose a acudir como simples afeccionadas ou a exercer de asistentas en funcións de escasa relevancia. Nese contexto, xa dende os seus inicios, o Armenteira C.F. foi pioneiro en asignar tarefas de responsabilidade ao colectivo feminino. Nos primeiros anos, con Julio Serén á fronte, Pili Muñiz e Cristina Pérez incorporáronse á Xunta Directiva. Ambas as dúas continuarían na dirección do clube cando, a partires do 2005, se puxo en marcha un equipo sénior masculino, ocupando Cristina o cargo de presidenta. Uns anos despois sería relevada no cargo por Lucía García e, en épocas máis recentes, Marga Barral e Mónica Castro collerían as rendas da entidade. Na actualidade outra muller, Nuria González, encárgase da coordinación do equipo sénior feminino. Nos terreos de xogo a situación foi parella. Varias foron as rapazas que se uniron, fai máis dunha década, a aquel conxunto benxamín co que Martín Casais inaugurou o proxecto para as categorías base que continúa vixente. De todas elas sería Eva López a que acadaría logros máis importantes. Convocada en varias ocasións coa selección galega a futbolista de O Busto abriu camiño a moitas outras nenas que quixeron probar fortuna no balompé coa camisola verdinegra. A ela seguiríana unhas cuantas mozas competindo en equipos de formación mixtos ata que, no verán de 1995, o Armenteira C.F. se lanzou a unha arriscada aventura: a creación dun equipo sénior feminino. Tras dúas temporadas competido, este conxunto conseguiu resistir a unha chea de adversidades e continúa o seu rumbo na Liga Feminina de fútbol-7 baixo da dirección de Marcial Prado. Mentres, no equipo infantil, Irene Varela e Irene Pesqueira manteñen vivo o espírito feminino no conxunto referencia do clube nas etapas de formación. Son méritos que se veñen conseguindo día a día, con enorme esforzo e sacrificio, cunha intensa dedicación por parte de todas e cada unha das persoas que representan a unha entidade pola que, a pesares dos disgustos e decepcións, seguen profesando unha fe e unha devoción verdadeiramente meritorias. Estes días algúns medios de comunicación, a páxina na internet da Real Federación Galega de Fútbol ou as redes sociais dalgúns clubes veciños alardean da noticia do triunfo do equipo feminino na categoría sub-12 co que a delegación de Pontevedra da Federación competiu no campionato galego. Un triunfo do que o Armenteira C.F. se sente tremendamente orgulloso, non só pola súa decidida aposta e polo seu indiscutible compromiso co deporte de féminas, senón porque nesa escadra figuraban dúas rapazas formadas na escola de O Leixo. Sara Otero, gardamallas desa selección, que dende a temporada 2015/2016 pertenceu ao clube de A Armenteira e que, dende este verán pasou a formar parte do Umia C.F., e Estela Castro, que se iniciou no fútbol vestindo de verdinegro na pasada campaña, e que na actualidade, obrigada por un cambio de residencia, milita na A.J. Lérez, eran dúas das compoñentes dese conxunto que logrou de forma brillante un título tras impoñerse na final ao equipo da delegación de A Coruña por cero goles a catro. Dous exemplos que, en definitiva, son froito dun longo traballo dun clube que, nunhas circunstancias nada favorables, conseguiu converterse nunha fábrica de campionas e que demostran que tanto o Armenteira C.F. como as mulleres, no fútbol e na vida, por moitas dificultades que xurdan, poucas metas existen que non poidan superar.

Unha horta con moito futuro

Dende fai séculos a agricultura convertiuse nunha actividade básica na vida e na economía dos seres humanos. Por moito que a ciencia avanzase e por moito que a tecnoloxía se apropiase de practicamente todas as actividades que realizamos, seguimos precisando do campo e de todo o que produce para sobrevivir. Na época industrial e capitalista as técnicas agrarias foron transformándose para adaptarse ás necesidades do mercado. Os modernos métodos de cultivo, os fertilizantes químicos artificiais e unha explotación intensiva do solo, que van irremediablemente unidos ao progreso, conlevan unha serie de efectos colaterais, en forma de residuos e contaminación, que se incorporan á cadea trófica e que poñen en risco a propia sáude humana. Contra isto, nos últimos tempos están xurdindo iniciativas que apostan por un agro sostible e máis respectuoso co medio ambiente, unha reacción que ten, sen lugar a dúbidas, entre os seus mellores exemplos ás hortas ecolóxicas. Son espazos nos que se cultivan prantas hortícolas, pequenos frutais ou especies aromáticas sen utilizar produtos químicos e sempre baixo os principios que rexen a agricultura ecolóxica. Desterrados os pesticidas e os abonos artificiais esta modalidade aposta por técnicas como a asociación e a rotación de cultivos, o uso do compost e outros fertilizantes de orixe natural ou a loita integrada para a eliminación de pragas. Unha característica básica destes espazos é a biodiversidade. É moi importante que haxa distintos tipos de plantas, para que desta maneira haxa máis polizadores, abellas por exemplo, e o solo conserve a salubridade e a riqueza grazas ás rotacións e ás asociacións e aproveite as vantaxes que lle aporta cada cada especie. Tamén é frecuente que na horta se liberen insectos beneficiosos ou incluso sapos, que ademais de non supoñer ningún risco medioambiental son tremendamente eficaces na loita contra as pragas. Outros métodos típicos nesta modalidade agraria son a reciclaxe, que vai dende os recipientes ata os restos vexetais cos que se elabora o compost, a utilización de sementes que non foron manipuladas xeneticamente e o aforro de auga, ben reutilizándoa, ben recurrindo ao rego por goteo ou ben regando ás horas máis axeitadas para non malgastar este recurso tan necesario.

No seu afán por defender e difundir o coidado do medio ambiente ao tempo que se aproveitan os recursos propios e naturais a Asociación de Veciños e Veciñas de A Armenteira pon en marcha o seu proxecto de horta ecolóxica comunitaria. Nunha parcela que reúne as condicións idóneas, cun solo fértil, con bos accesos, soleada e cun manancial de auga próximo a sociedade veciñal impulsará esta primavera unha actividade á que convida a participar a aquelas persoas da parroquia e arredores concienciadas coa ecoloxía e coa nutrición sá e de calidade. Lembran que é unha forma excelente de disfrutar da natureza, ademais de facer exercicio físico de forma moderada mentres se adquiren uns coñecementos de gran validez e utilidade e se favorece a socialización a través da comunicación, do compañeirismo e do traballo en equipo. Os tempos mudaron e as actividades agrarias arcaicas e escasamente rendibles que constituían a base das economías familiares no pasado foron desaparecendo da paisaxe de A Armenteira, pero eses recursos, tan abundantes e tan insuficientemente explotados, atopan agora a súa oportunidade coa agricultura ecolóxica, unha opción para o presente e, industiblemente, a máis viable e lóxica para o futuro. 

Á caza da velutina

A primavera comeza a deixarse ver na paisaxe de A Armenteira. Follas que agroman nos salgueiros ou nos ameneiros, vistosas flores que locen xa nas amexeiras e moitas outras prantas dan mostras dun cambio que nos anuncia a chegada dun novo tempo. É nesta época cando tamén unha ameaza se cerne un ano máis sobre o noso ecosistema. As raíñas da vespa velutina, unha especie invasora que nos últimos anos se expandiu practicamente por toda Galicia e por boa parte de España, saen do seu seu cobixo invernal na procura de pole co que alimentarse e iniciar a elaboración dos seus niños. Co aumento das horas de luz e coa suba das temperaturas daranse as circunstancias propicias para que a vespa asiática se reproduza. Por este motivo, trátase dunha época crucial para levar a cabo as estratexias de trampeo. Segundo sinalan algúns estudos, por cada raíña capturada, eliminaranse a presenza posterior de 47.000 velutinas. A Asociación de Veciños e Veciñas de A Armenteira está desenvolvendo unha intensa actividade neste senso. A sociedade que preside Martín Casais, que o pasado 16 de febreiro un obradoiro de trampeo, quere permanecer alerta ante esta ameaza e promove unha campaña de colocación de trampas e de aplicación de diversas estratexias de loita contra esta especie invasora. Deste xeito, e sen tempo que perder, fai un chamamento á veciñanza para que informe dos lugares nos que se detectara a existencia de niños en anos anteriores, ou para comunique a aparición dalgún niño primario ou dalgún exemplar de vespa velutina. A preservación das abellas domésticas, principais afectadas por esta praga, pero tamén a conservación dos cultivos tradicionais e das árbores froiteiras son razóns máis ca suficientes para colaborar nesta interesante iniciativa.