As forzas de seguridade interveñen unha plantación de marihuana nas inmediacións do campo de O Leixo

 

Unha operación dirixida polos axentes do grupo 2 da UDYCO da Policía Nacional de Pontevedra, en colaboración coa Guardia Civil, permitiu intervir unha plantación con miles de plantas de marihuana nas inmediacións do campo de O Leixo, en Armenteira. A escasos metros das instalacións deportivas localizábase unha plantación que ocupaba unha extensión de terreo que superaba os 2.000 metros cadrados, onde medraban máis de 3.000 plantas de cannabis. No entorno, ademais dun semilleiro para as plantas, oculto entre as árbores e a biomasa que existe na zona, instalábase un pequeño campamento, con varias tendas de campaña, nas que se refuxiaban as persoas responsables da plantación, e nas que tamén se albergaba material de traballo, como palas, picos, arados e outros útiles de labranza, abonos químicos, produtos de xardiñeiría, xunto cunha balsa de auga á que se conectaban varias mangueiras que formaban o sistema de rego que surtía a toda a plantación. Debido ao elevado número de plantas decomisadas as autoridades xudiciais e a Policía Nacional víronse na obriga de solicitar a presenza de varias furgonetas de aluguer e dun camión de mudanzas para trasladar a mercadoría a dependencias policiais. O balbordo formado a causa da presenza dos axentes das forzas de seguridade e das furgonetas levantou unha enorme expectación entre os veciños e veciñas do lugar de O Busto, próximo ao terreo no que se cultivaban estes exemplares de substancia estupefaciente.

Aínda que non trascendeu a identidade de ningunha das persoas que puideron resultar detidas, fontes ben informadas afirman que se trataría de individuos que merodean pola zona con relativa frecuencia. Numerosos rumores relacionaban este alixo con membros do plantel do Armenteira Club de Fútbol ou do Armenteira Veteranos, cos que contactaron os diversos medios de comunicación nada máis coñecerse a noticia. Ningún dos representantes destas entidades quixo facer declaracións, alegando que xa declararían ante os xulgados pertinentes no momento no que fosen citados. Tampouco a Comunidade de Montes de Man Común Chan da Fonte, propietaria dos terreos, quixo realizar ningún tipo de declaración, desmarcándose de calquera responsabilidade relacionada con plantación decomisada. Con todo, outras fontes afirman que o cultivo de cannabis era custodiado por persoas alleas ás entidades citadas anteriormente, que non serían orixinarias da parroquia de A Armenteira nin da contorna, pero que decidiron establecer alí a súa base de operacións, dados os antecedentes relacionados co tráfico de estupefacientes dese entorno e aproveitando a constante presenza de néboa nese enclave, que lles permitiría ocultar con máis facilidade as súas actividades e actuar cunha maior discreción.

Pese a que inicialmente se especulaba con que os futbolistas tanto do Armenteira Club de Fútbol ou do Armenteira Veteranos, puidesen figurar, non tanto como responsables da plantación, senón como vendedores ou consumidores, o que explicaría os comentarios, a súa actitude desenfada ou algunhas das derrotas dos últimos partidos, fontes moi achegadas a estas entidades afirmaron que o bo humor, o carácter festeiro e divertido, xunto coas carencias futbolísticas técnicas e tácticas que poderían explicar os resultados desfavorables obtidos recentemente, nada teñen que ver co contacto co cannabis, senón que máis ben se ben á natureza propia destas xentes e aos chupitos cos que adoitan acompañar o café que se toman despois da comida anterior a cada partido.

Alarmados polo movemento producido nos arredores do campo de O Leixo, algún veciños e veciñas axiña fixeron acto de presenza no lugar dos actos. En privado, e sen querer desvelar a súa identidade, algún destes veciños aceptou atender aos medios de comunicación. Asegurando coñecer en profundidade á xente dos equipos de fútbol que utilizan de forma asidua estas instalación declarou que “son xente divertida, con bo humor, que calquera que non trate moito con ela podería dicir que anda na droga, ou incluso que poida consumila, pero, como di o outro, iso é cousa deles. Eu non digo nin unha cousa nin a outra, a ver se me entendes, pero vese que a maioría son xente con cartos e que leva boa vida, que aparentan ser felices, pero diso non digo nada, que aquí todos nos coñecemos e todo se sabe”. E para finalizar afirmou “eu veño normalmente a ver os partidos, e non sei se é culpa dos chupitos que toman co café antes dos partidos, se é culpa da marihuana ou se é culpa de non sei que, pero ultimamente resulta difícil velos ganar un partido”.

Tamara Falcó protagonizará un spot publicitario que terá A Armenteira como escenario

 

Que A Armenteira está de moda é un feito indiscutible. Son varias as persoas de relevancia nos distintos eidos as que elixen a nosa parroquia para realizar a súa voda, para pasear pola Ruta da Pedra e da Auga e polos distintos enclaves do territorio, para practicar deporte en contacto coa natureza ou simplemente para visitar o patrimonio histórico-artístico e degustar unha tapa acompañada dun viño ou un refresco nun dos locais de hostalaría da parroquia. Neste caso foi a coñecida socialité Tamara Falcó a que escolleu A Armenteira para o seu próximo proxecto. A coñecida colaboradora televisiva protagonizará un spot que terá como escenario algún dos puntos máis emblemáticos deste territorio. A Ruta da Pedra e da Auga, o campo de golf de Silván, os cruceiros que se extenden ao longo dos lugares da parroquia, as terrazas dos locais de hostalaría e, por suposto, o mosteiro cisterciense, serán os lugares nos rodará un anuncio publicitario dunha coñecida firma de moda española e que mostrará a través da figura de Tamará Falcó a beleza deste lugar nas ladeiras do Monte Castrove.

A marquesa de Griñón, que cursou estudos en materia de Comunicación no Lake Forest College, de Massachusetts, é unha experta non só no mundo dos medios de comunicación, senón no mundo da moda. Realizou as súas prácticas de deseño de moda en Zara e completou a súa formación neste campo no Instituto Marangoni de Milán. Actualmente é coñecida principalmente pola súa participación nalgúns dos programas de máis éxito do panorama televisivo, como Master Chef Celebrity ou El Hormiguero no que colabora nos parladoiros sobre temas de actualidade. O seu dominio nos ámbitos da comunicación, da moda e da gastronomía foron avais máis ca suficientes para que a axencia publicitaria encargada da rodaxe decidise apostar pola VI Marquesa de Griñón como protagonista do anuncio. Tras preseleccionar varios lugares da xeografía española, a axencia, asesorada por un comité de expertos, decidiuse finalmente por A Armenteira, unha decisión na que resultou clave a opinión da propia Tamara Falcó, que se decantou por esta parroquia de O Salnés porque probablemente sexa o escenario elixido para o enlace co empresario de ascendencia galega Hugo Arévalo, parella sentimental da marquesa tras a súa tormentosa ruptura con Íñígo Onieva.

No anuncio participarán ademais rostros coñecidos da vida social de A Armenteira. Persoas relevantes do mundo relixioso, cultural, empresarial ou político ou deportivo da parroquia aparecerán en forma de cameos nun anuncio que non durará máis de tres minutos. De feito, a propia Tamara Falcó desprazouse recentemente a estas terras do municipio de Meis para supervisar os diferentes lugares nas que se desenvolverá a rodaxe. Tras consultar a dispoñibilidade da igrexa do mosteiro cisterciense para os seus plans nupciais, a marquesa de Griñón visitou persoalmente algúns dos lugares que os profesionais en materia audiovisual da axencia escolleron polo seu maior potencial visual para un anuncio no que se presentarán os modelos máis chamativos da temporada de primavera dunha das firmas de moda española máis recoñecidas a nivel internacional. Aínda que o protagonismo principal do spot correrá a cargo da filla de Isabel Preysler, a axencia publicitaria iniciará unha selección de figurantes que servirán para ambientar as paisaxes do anuncio. Por elo, todas aquelas persoas interesadas en participar na rodaxe e, ao tempo, en coñecer en persoa e fotografiarse xunto a un dos personaxes máis coñecidos do mundo mediático, poderán formular a súa petición a partir deste mércores, 28 de decembro. A través das oficinas municipais do Concello de Meis, da Comisión de Festas Santa María de Armenteira, do Armenteira Club de Fútbol ou nos locais de hostalaría da parroquia será posible anotarse para formar parte do elenco de actores ou actrices que xunto con Tamara Falcó, promocionen a moda da temporada de primavera e os valores artísticos, culturais e paisaxísticos de A Armenteira.

O Armenteira Veteranos continúa coa crise de fútbol e resultados e cede tres puntos en O Leixo ante o Campañó Veteranos

                                                                  FICHA TÉCNICA

ARMENTEIRA VETERANOS - CAMPAÑÓ VETERANOS - 1 - 2

ARMENTEIRA VETERANOS: Sirra; Jorge Dávila, Óscar Barreiro, Javi, Richi; Víctor, Martín, Júnior, Marcial; Rubén e Jorge Castro. Tamén xogaron Fernando, Suso e Carlos Muñiz.

GOLES: 0-1. Minuto 1. Armando Sabarís. 1-1. Minuto 18. Jorge Castro, de penalti.  1-2. Minuto 44. Macelino López. 

ÁRBITRO: Corredera Blanco. Non mostrou ningún cartón neste partido.

INCIDENCIAS: Partido da oitava xornada do grupo 2 da Terceira Galicia de Veteranos, da delegación de Pontevedra disputado no campo de O Leixo, en A Armenteira, ante vinte espectadores, nunha tarde soleada e temperada, e sobre un terreo de xogo de terra nunhas condicións aceptables para a práctica do fútbol.

  CRÓNICA

O Armenteira Veteranos continúa coa súa mala xeira de fútbol e resultados. Desde o 22 de outubro, cando lograra vencer en O Leixo ao Noalla Veteranos Portaredonda, o cadro verde e negro non sabe o que é unha vitoria, e non só iso, senón que nin sequera logrou puntuar durante todo ese tempo. As importantes baixas, sobre todo na liña defensiva, unidas a unha evidente falta de confianza e de autoestima en relacións coas súas posibilidades futbolísticas están afectando gravemente a un equipo que se mostra impreciso, falto de fluidez e que comete erros que non eran habituais nos seus futbolistas, e que ademais está saíndolle moi caros os de O Leixo. No encontro deste sábado, 26 de novembro, ante o Campañó Veteranos, se ben é certo que non tiveron unha actuación demasiado brillante os futbolistas verdinegros, a derrota tampouco pareceu xusta a tenor do observado sobre a superficie de terra do campo do lugar de O Busto. Especialmente no segundo período, os locais mereceron máis e, de existir a xustiza no mundo do fútbol, polo menos deberían ter rescatado un punto.

Todo comezou en contra do Armenteira Veteranos. Nada máis iniciarse o encontro, no minuto 1, un fallo nun despexe na zona defensiva, deu lugar a unha rápida acción polo costado dereito dos de Campañó, que centraron á área para que Armando Sabarís, pillando desprevenidos a uns defensores verdinegros que aínda viñan de aterrar no partido, enviou o coiro ao fondo da rede diante case sobre a liña de gol. Trataron de reaccionar os de A Armenteira que, pese á falta de creatividade e fluidez no seu fútbol, conseguían cercar a meta visitante e pechar ao adversario no seu campo. A base de impulsos, o traballo de Jorge Castro en ataque, e os desbordes e os lanzamentos de media distancia de Rubén facían crer que era posible darlle a volta a un resultado ante un rival que ademais demostraba non ter argumentos superiores aos do Armenteira Veteranos. Nunha xogada individual de Jorge Castro, o dianteiro de Vilar era claramente derrubado na área por un defensor do conxunto de Campañó. O propio Jorge Castro encargaría de transformar a pena máxima e de colocar a igualada no marcador. A partir de entón o partido foi entrando nunha especie de zozobra no que as imprecisións e a falta de intensidade foron a nota dominante. A falta de xogadas de certa brillantez, a situación era favorable para quen menos erros cometese. Nunha falta lateral executada polo Campañó Veteranos e posta sobre o centro da área local, Marcelino López recolle un rexeitamento desde o pau dereito da meta local para enviar o balón ao fondo da portería. Restaba soamente un minuto para o descanso e, ao igual que ocorría co tanto anotado no primeiro minuto, pódese considerar como un gol dos que denominan como psicolóxicos, e máis para un equipo de moral fráxil como está demostrando ser ultimamente o Armenteira Veteranos. 

Tras a conxura do descanso, e á chamada á reacción en base á intensidade e a unha maior motivación, os futbolistas verdinegros saíron dispostos a remontar. Con Carlos Muñiz agora no centro da defensa e Javi liderando a liña de creación, o Armenteira Veteranos mudou a súa faciana na segunda metade. Fíxose dono do xogo, súas foron as ocasións máis claras e unicamente sufría con contragolpes que os de Campañó trataban de armar con envíos en diagonal para intentar gañar as costas aos zagueiros locais. A pelexa constante de Jorge Castro, que volveu ser o principal recurso ofensivo dos de A Armenteira, non era suficiente. A solidez exhibida polos defensores de Campañó, unida á falta de inspiración dos atacantes verdinegros chocaban coas ansias renovadas dos locais neste segundo período. Algunha ocasión errada por Jorge Castro e, sobre todo, un excepcional lanzamento dun golpe franco por parte de Rubén, que se atopou coas luvas do gardamallas Pedro José Pérez, foron as opcións máis claras dos locatarios para amarrar polo menos un punto. De nada valeu emborcarse cara a meta visitante nos últimos minutos e o encontro chegaría ao seu fin cos tres puntos no casilleiro do conxunto da parroquia no municipio de Pontevedra, no que curiosamente milita Valentín Sartal, o que fora o adestrador do equipo sénior do Armenteira C.F. na súa primeira singladura pola Terceira Autonómica, aló pola temporada 2005/2006, e que anos despois formaría parte tamén do plantel do Armenteira Veteranos.

Con esta derrota a formación verde e negra descende ata a décima posición, con seis puntos. Na próxima fin de semana o Armenteira Veteranos repite partido como local e recibe en O Leixo ao Carballo da Portela A.C.D., undécimo clasificado, con catro puntos. Co desexo de poder recuperar efectivos, os de A Armenteira tratarán de retomar o bo rumbo co que comezaran a temporada e tratarán de ir escalando puntos na clasificación para situarse en posicións máis acorde co potencial e coas expectativas coas que partía o Armenteira Veteranos nesta campaña.

O Armenteira C.F. feminino derrota ao Marín C.F., líder e invicto no que ía de temporada

                                                                   FICHA TÉCNICA

ARMENTEIRA C.F.- MARÍN C.F. - 3 - 2

ARMENTEIRA C.F: Lola; Ana Pintado, Rocío; Luci, Cris, Dini; e Antía. Tamén xogaron Sara Rey e Anabel.

GOLES: 1-0. Minuto 29. Cris. 1-1. Minuto 33. Emerly. 2-1. Minuto 53. Dini. 2-2. Minuto 54. Emerly. 3-2. Minuto 57. Cris.

ÁRBITRO: Barreiro Viñas. Mostrou cartón amarelo a Dini por parte do Armenteira C.F.

INCIDENCIAS: Partido da quinta xornada da Liga Feminina de Fútbol-7 que organiza a delegación de Pontevedra-Vigo da Real Federación Galega de Fútbol, disputado no campo de O Leixo, ante uns dez espectadores, nunha tarde fresca e con moita néboa, que impedía unha visibilidade normal, e sobre un terreo de xogo cunha superficie de terra nunhas condicións algo esvaradizas debido ás choivas dos últimos días.

  CRÓNICA

O equipo feminino do Armenteira C.F. volveuno a conseguir. Se na pasada temporada vencía a un Marín C.F. que chegaba a O Leixo como líder e campión da segunda fase da Liga Feminina de Fútbol-7, este domingo, 20 de novembro, lograba de novo superar ás marinenses, que chegaba a A Armenteira como líderes destacadas do grupo, invictas no que ía de competición, e perfilándose como as máximas favoritas a alzarse cun campionato que na presente campaña constará de unha única fase. As mozas do conxunto verde e negro, moi curto de efectivos este ano, e sempre condicionado polas ausencias que sofre en cada xornada, demostraron unha vez máis que son capaces do mellor e do peor. Tras a contundente derrota da fin de semana anterior ante o Independente C.F. no campo de As Gándaras, en Valadares, o Armenteira C.F. recuperaba a algunha das xogadoras que non puido estar presente fai sete días. Con Cris de regreso tras a súa expulsión ante o Club Peñasco e coa incorporación de Luci, que volve unirse á disciplina da formación verde e negro, o potencial do equipo subía bastantes enteiros.

A vitoria deste domingo foi nun encontro equilibrado, con alternativas por ambos bandos, e no que o triunfo puido caer de calquera dos dous lados. Ao tempo que o Campionato Mundial de Fútbol de Catar daba comezo, ás 17:00, alleas ao gran espectáculo e tamén enorme negocio que supón a Copa Mundial, estas futbolistas de balompé humilde e modesto, medían as súas forzas mentres a néboa se ía facendo dona pouco a pouco da superficie de xogo de O Leixo. A escasa visibilidade que permitían as condicións meteorolóxicas non foi impedimento para que a escasa afección que se desprazou ás instalacións deportivas do lugar de O Busto puidese gozar dunha tarde entretida de fútbol. No primeiro período non houbo moitas ocasións claras de gol. Quizais a de maior claridade estivo nos pés de Dini, que non puido acertar ante a portería da Elena Soto. Ao fío do descanso, un envío en longo que se lle escapa das luvas á gardamallas de Marín, é aproveitado por Cris, moi atenta na presión, para anotar o un a cero a porta baldeira.

No segundo período parecía que o equilibrio se mantía. As futbolistas do Marín C.F. cunha mellor condición física, adiantaron liñas na procura do tanto do empate. Un saque de portería das de A Armenteira, que non levaba a suficiente potencia, caeu no borde da área local, e a Emerly, colocaba a súa punteira para enviar o coiro cara o fondo das mallas defendidas por Lola. O gol da igualada semellaba extender o temor entre a parroquia verdinegra, que temía que supuxese o punto de partida para a remontada do líder do grupo. Pero o esforzo e o sacrificio das locais, unido ás gotas de calidade das súas xogadoras, que marcan a diferenza na categoría, fixo posible a resposta á reacción marinense. Dini, culminando unha xogada individual, adentrábase na área e batía a Elena Soto cun preciso lanzamento co seu pé esquerdo. Apenas uns minutos despois, un erro nun despexe da zaga do Armenteira C.F., remataba co balón en posesión de Emerly que, desde o costado esquerdo do ataque do seu equipo, cruzaba o esférico ante a estirada de Lola e situaba o dous a dous. A partir de entón as ocasións sucedéronse por ambos bandos, e incluso daba a impresión que o tanto caería do lado das de Marín. Non foi así, e unha acción de contragolpe, na que Cris se desfixo das defensoras rivais, permitía que a atacante pontevedresa do Armenteira C.F. se presentase soa ante Elena Soto e situase no marcador o tres a dous que acabaría sendo definitivo. Tratou á desesperada de lograr polo menos o empate o Marín C.F., pero a intensidade defensiva das futbolistas verdinegras e as paradas atindadas de Lola contribuíron a que os tres puntos se quedasen en A Armenteira.

Con este triunfo, o Armenteira C.F. feminino sitúase na sétima posición, con seis, puntos. Na próxima fin de semana o cadro verde e negro deberá visitar o campo de O Cruceiro, na parroquia de San Mateo, en Ponteareas, para medirse ao Sporting Club San Mateo, pechacancelas do grupo e que aínda non sumou ningún punto no que levamos de liga. Para esa xornada, o equipo que dirixe Marcial Prado agarda recuperar a Carla, co cal podería contar co plantel ao completo por primeira vez nun partido desta temporada.

Un Armenteira Veteranos moi mermado cae ante en O Buelo ante un rival máis completo e que exhibe máis recursos

                                                        FICHA TÉCNICA

MORAÑA C.F. - ARMENTEIRA VETERANOS - 4 - 1

ARMENTEIRA VETERANOS: Sirra; Jorge Dávila, Carlos Castro, Javi, Óscar Barreiro; Rubén, Martín, Júnior, Víctor; Suso e Jorge Castro. Tamén xogaron Marcial e Galiñanes.

GOLES: 1-0. Minuto 5. Carlos Muñiz, en propia meta. 2-0. Minuto 18. Antón Gamallo.  3-0. Minuto 20. Adrián González. 3-1. Minuto 54. Rubén. 4-1. Minuto 57. Adrián González. 

ÁRBITRO: Veiga Gómez. Non mostrou ningún cartón neste partido.

INCIDENCIAS: Partido da sétima xornada do grupo 2 da Terceira Galicia de Veteranos, da delegación de Pontevedra disputado no campo de O Buelo, en Moraña, ante uns cincuenta espectadores, nunha tarde temperada e baixo unha choiva fina por momentos, e sobre un terreo de xogo de terra nunhas condicións aceptables para a práctica do fútbol.

  CRÓNICA

O Armenteira Veteranos sumou unha nova derrota no que vai de temporada 2022/2023. E xa van tres en cinco partidos. Cun plantel moi mermado, a causa das importantes ausencias de Carlos Castro, Fernando, Richi e Moncho, que minan aínda máis a un cadro que nesta campaña presenta un número reducido de efectivos en relación coa pasada, o conxunto de O Leixo presentábase en O Buelo sendo consciente da difícil misión que lle agardaba. O rival, o Moraña C.F., é un dos equipos con maior potencial do grupo e figura entre os grandes favoritos a lograr o campionato de liga. Ademais, as ausencias do Armenteira Veteranos afectaban especialmente á liña defensiva, quizais a máis endeble dos verdinegros, que nesta temporada están botando especialmente en falta a Marcos, un dos grandes referentes na retagarda dos de A Armenteira nos últimos anos, e que, por motivos laborais, non pode competir nesta campaña. O partido deste sábado foi de claro dominio dos locais, que ademais axiña marcaron distancias no marcador, pois no minuto 20 xa levaban unha vantaxe de tres tantos, polo que puideron dedicarse a xestionar esta bagaxe no resto dos minutos.

Desde o inicio o control do xogo estivo do lado morañés. A relativa xuventude dos membros do seu plantel, que quedaba plasmada nunha condición física bastante por enriba da que mostraban os seus contricantes, permitía que os de Moraña puidesen exercer un nivel de presión e imprimir un ritmo de fútbol impropia destas categorías da liga de veteranos. Ante a presión adiantada dos futbolistas do Moraña C.F. o Armenteira Veteranos atopábase con notables dificultades na saída do balón. Nesas circunstancias, ao ter tapados os ocos para iniciar as xogadas, o recurso fácil era buscar a Sirra, para que o gardamallas de Couso, sempre hábil no xogo cos pés, fose quen se encargase de contruír o xogo desde atrás cun envío en longo. Nunha desas accións, un balón cedido cara atrás polos futbolistas verdinegros, que Carlos Muñiz tocou de forma forzada, pillou a contrapé a Sirra cando se dispoñía a abandonar a área, e foi directo cara o fondo das mallas. O tanto en propia meta, aos cinco minutos de partido, significou unha dura lousa para os visitantes. Pero apenas uns minutos despois, unha rápida combinación do Moraña C.F. remataba co coiro nos pés de Antón Gamallo, que se abriu camiño polo medio da defensa para plantarse ante Sirra e colocar o dous a cero. Non conseguía reaccionar o Armenteira Veteranos, atenazado polo mal comezo de partido e a presión rival, e, aínda que Jorge Castro dispuxo dunha clara ocasión, na que acabou desequilibrado tras regatear ao meta adversario e acabou enviando o coiro por fóra, a escasos centímetros do pau dereito morañés, pouco despois, Adrián González, en posición dubidosa, recibe un envío por alto, que controla e, tras acomodarse, empalma un disparo que bate a Sirra. Trataron de repoñerse os visitantes, que aproveitaron a relativa relaxación local para intentar acurtar distancias. Unha magnífica xogada de Rubén polo extremo dereito, na que se desfixo do seu rival xunto ao bandeirín de córner e centrou cara a área, finalizou cun remate pouco claro dun compañeiro. Foi quizais esta a mellor acción dos verdinegros neste primeiro período, no que apenas conseguiron probar as facultades do cancerbeiro local.

No segundo período, todo parecía indicar que o Moraña C.F. ía camiño dunha vitoria abultada. Pero, os de A Armenteira, botaron man da súa habitual coraxe e puideron ir maquillando un resultado que tal como se desenvolveu o encontro nos primeiros minutos semellaba que ía ser moito máis desfavorable para o conxunto verde e negro. Unha acción de transición pola banda dereita, na que Jorge Castro recibe no costado dereito e consigue avanzar por este carril ata a área, onde un adversario o derruba, pero na que o colexiado decreta a lei da vantaxe, remata co balón nos pés de Rubén que, desde a liña da área bate a Diego Cabanelas, o meta local. Con todo, pouco durou a posibilidade de remontada, pois Adrián González, tras un rápido desmarque, escapábase da defensa verdinegra e ante Sirra, mandaba o coiro ao fondo da rede para anotar o catro a un que acabaría sendo definitivo. Puido o Armenteira Veteranos lograr algún tanto no resto de encontro, con ocasión de bastante claridade, como un lanzamento de Víctor desde o costado esquerdo que impacto na parte interna do pau e volveu cara á área, cunha cabezada de Jorge Castro ante a que reaccionou cunha soberbia estirada o cancerbeiro local, ou con algunha outra ocasión máis,  pero o marcador non se movería. Cun partido moi aberto, con moitos espazos para correr, o que favorecía a mellor condición física dos xogadores do Moraña C.F., os últimos minutos disputáronse a un ritmo notable e as chegadas a ambas as porterías eran frecuentes. 

Con esta derrota, o Armenteira Veteranos descende á novena posición, con seis puntos. Na próxima xornada, o cadro verde e negro recibirá a visita do Campañó Veteranos, outro dos conxuntos que a priori parte como un dos favoritos a ocupar os postos altos da táboa, e no que milita Valentín Sartal, que no seu día ocupara o posto adestrador do Armenteira C.F. na que era a primeira temporada na historia do clube de O Leixo na Terceira Autonómica, aló polo ano 2005. Prevese por tanto un partido intenso, de rivalidade, no que os de A Armenteira buscarán encauzar o rumbo tras as derrotas das dúas últimas xornadas.

O Armenteira Veteranos paga a falta de ritmo e sucumbe en O Leixo ante un C.D. Mosteiro superior

                                               FICHA TÉCNICA

ARMENTEIRA VETERANOS - NOALLA V. PORTAREDONDA - 4 - 2

ARMENTEIRA VETERANOS: Sirra; Jorge Dávila, Carlos Castro, Óscar Barreiro, Richi; Rubén, Martín, Carlos Muñiz, Junior, Víctor; e Jorge Castro. Tamén xogaron Fernando, Javi, Galiñanes e Suso.

GOLES: 0-1. Minuto 10. Adrián Oubiña. 1-1. Minuto 18. Carlos Muñiz.  1-2. Minuto 22. Adrián Oubiña. 1-3. Minuto 55. Francisco Martínez. 1-4. Minuto 74. David Lópèz. 2-4. Minuto 81. Rubén. 

ÁRBITRO: Arís Arribas. Mostrou cartón amarelo a Sirra por parte do Armenteira Veteranos e a Pablo Nine por parte do C.D. Mosteiro-A Barbería de Diego.

INCIDENCIAS: Partido da sexta xornada do grupo 2 da Terceira Galicia de Veteranos, da delegación de Pontevedra disputado no campo de O Leixo, en A Armenteira, ante uns vinte espectadores, nunha soleada e temperada, e sobre un terreo de xogo de terra nunhas condicións aceptables para a práctica do fútbol.

  CRÓNICA

O Armenteira Veteranos caeu derrotado na tarde deste sábado, 12 de novembro, no derbi municipal do grupo 2 da Terceira Galicia de Veteranos ante o C.D. Mosteiro-A Barbería de Diego. O conxunto de O Leixo, que disputaba o que era o seu cuarto partido da temporada, mostrouse moi espeso e impreciso, pagando quizais a falta de ritmo tras dúas semanas sen competición, unha polo obligado descanso pola retirada da competición do rival que lle correspondía, o Verducido Veteranos C.F., e outra porque o calendario establecido pola Real Federación Galega de Fútbol decretou unha fin de semana sen competición na categoría na que militan os verdinegros. Á falta de ritmo derivada do escaso número de partidos disputados no que vai de liga hai que sumar que a nula preparación durante a pretemporada, na que o Armenteira Veteranos non puido participar en ningún encontro.

Aínda que nos primeiros minutos o Armenteira Veteranos parecía querer tomar o control do xogo, en base ao seu fútbol máis directo e de transicións rápidas, axiña os visitantes foron facéndose co dominio. Cun xogo máis combinativo, dirixido por David Pérez desde a zona de mediocentros e que buscaba principalmente a mobilidade do correoso Adrián Oubiña en ataque, o C.D. Mosteiro ía gañando metros, ante un cadro local cada vez máis impreciso e vítima dos numerosos desaxustes tácticos que mostrou na tarde deste sábado. Un erro na saída de balón polo costado esquerdo, permitiu que os de O Mosteiro armasen rapidamente unha xogada na que Adrián Oubiña enviaba un tiro cruzado que se colaba preto do pau dereito da meta defendida por Sirra. Recurriu á garra o Armenteira Veteranos, que trataba de atopar desesperadamente a presenza de Jorge Castro en ataque. Unha falta cometida sobre o dianteiro de Vilar, que el mesmo se encargou de executar, impactou no pau longueiro, e, un moi atento Carlos Muñiz, colocaba a súa cabeza para enviar suavemente o coiro ao fondo das mallas. Sen estar realizando un fútbol especialmente brillante, o equipo de A Armenteira lograba igualar o marcador, pero, de novo os desaxustes tácticos acabarían condenándoo. Nunha acción de contragolpe dos visitantes, Adrián Oubiña, ao límite do fóra de xogo, recibe en velocidade polo centro da defensa e, ante a saída de Sirra, traza unha vaselina que acaba no fondo da rede. Buscaron reaccionar de novo con rapidez os locais, que tiveron algunha oportunidadade para igualar, con disparos desde media distancia de Júnior ou Martín, aínda que a máis clara estivo nos pés de Jorge Castro.

Tras o descanso, a tónica continuo sendo a mesma. O C.D. Mosteiro-A Barbería de Diego, sen levar a cabo un dominio abafante, sentíase cómodo e dominador do encontro. Mantiña a posesión e combinaba, sen xerar demasiadas ocasións de gol, mentres que o conxunto verde e negro, sufría ante a presión alta do adversario, e era présa das súas continuas imprecisións no toque, que se unía á máis que evidente falta de ritmo físico. Un despiste na marcaxe deixaría só ante Sirra a Francisco Martínez, que non perdoaría e situaría o un a tres no marcador. Todo parecía poñerse costa arriba para a formación local, que vía como Fernando tiña que deixar o terreo de xogo por problemas físicos, o que, unido á lesión de Carlos Castro nos primeiros minutos do encontro e á de Carlos Muñiz apenas uns momentos despois, deixaba o centro da defensa tremendamente desguarnecido. Moi poucos argumentos espuxo o Armenteira Veteranos na última media hora de xogo. Os erros ían extendendo a desesperación e a sensación de que non era o día dos futbolistas verdinegros. De novo unha perda de balón, cando este chegaba ao pé de Sirra nun pase sen aparente risco, acaba co pelota en poder de David López, que só tivo que empurrar o balón a portería baldeira. No medio da apatía dos minutos finais houbo tempo para que os de Armenteira puidesen maquillar minimamente o resultado. Rubén, o mellor especialista dos locais a balón parado, empalmaba un potente zapatado nun libre directo, ante o que nada puido facer o cancerbeiro José Luis Piñeiro, que se estirou, pero só puido ver como o esférico se introducía pola escadra dereita. Non houbo tempo nin posibilidades de reacción nos intres finais e o Armenteira Veteranos tivo que resignarse ante os tres primeiros puntos que se escapan de O Leixo no que vai de liga.

Esta derrota deixa ao Armenteira Veteranos na séptima posición, con seis puntos. A próxima fin de semana, o equipo verdinegro deberá rendir visita ao campo de O Buelo para medirse ao Moraña C.F., outro dos conxunto que parte entre os favoritos a ocupar as prazas de ascenso. Será unha proba de gran esixencia para un Armenteira Veteranos mermado polos problemas físicos dalgúns dos seus xogadores, e que, tratará de compensar as previsibles baixas na liña defensiva co regreso aos terreos de xogo de Óscar Muñiz que, tras pasar por unha operación de xeonllo, volverá vestir a elástica verde e negra case tres anos despois.

As outras cousas do fútbol: en O Leixo hai pouca cobertura

 AS OUTRAS COUSAS DO FÚTBOL: EN O LEIXO HAI POUCA COBERTURA

Que en O Leixo e en algún outro lugar de A Armenteira hai escasa cobertura para a telefonía móbil é algo ben sabido. Hoxe en día para elaborar as actas e enviar os datos dos partidos é preciso dispoñer dunha boa conexión á rede internet. De non ser así, a situación complícase. É o que lle ocorreu ao colexiado Leirós Brea que, loitando co deficiente nivel de conexión do seu dispositivo electrónico, non era quen de cargar as alineacións no programa informático da Real Federación Galega de Fútbol, obrigando aos futbolistas a realizar uns exercicios de quentamento máis extensos do que se acostuma nas ligas de veteranos. Finalmente, cando deu cargado as alineacións, e tras subsanar algún erro nos onces iniciais achacable ás adversidades tecnolóxicas, puido dar inicio a un encontro no que o propio colexiado compartiu protagonismo con Jorge Castro, de novo destacado na faceta goleadora, ou con Fernando, a nova incorporación do Armenteira Veteranos, que volveu estar excelso nas tareas defensivas.

O Armenteira Veteranos supera ao Noalla V. Portaredonda nun partido no que sentenciou no primeiro período

 FICHA TÉCNICA

ARMENTEIRA VETERANOS - NOALLA V. PORTAREDONDA - 4 - 2

ARMENTEIRA VETERANOS: Sirra; Jorge Dávila, Fernando, Carlos Castro, Moncho; Rubén, Carlos Muñiz, Javi, Junior; Jorge Castro e Suso. Tamén xogaron Óscar Barreiro, Richi, Víctor, Marcial e Galiñanes.

GOLES: 1-0. Minuto 12. Jorge Castro. 2-0. Minuto 15. Javi.  3-0. Minuto 29. Jorge Castro. 4-0. Minuto 43. Marcial. 4-1. Minuto 63. Lino Lima. 4-2. Minuto 89. Lino Lima. 

ÁRBITRO: Leirós Brea. Mostrou cartóns amarelos a Moncho, Carlos Castro e Junior por parte do Armenteira Veteranos e a Sergio Padín, Lino Lima e a Diego Visconti, neste caso por partida dobre, por parte do Noalla V. Portaredonda.

INCIDENCIAS: Partido da cuarta xornada do grupo 2 da Terceira Galicia de Veteranos, da delegación de Pontevedra disputado no campo de O Leixo, en A Armenteira, ante uns quince espectadores, nunha fresca e nublada, e sobre un terreo de xogo de terra algo enlolado e esvaradizo debido ás intensas choivas caídas nas horas anteriores ao partido.

  CRÓNICA

O Armenteira Veteranos logrou o que é o seu segundo triunfo da temporada tras superar ao Noalla V. Portaredonda no partido disputado na tarde deste sábado, 22 de outubro, no campo de O Leixo. O conxunto verdinegro partía coa necesidade de atoparse de novo coa vitoria, despois da derrota sufrida a pasada fin de semana en Baltar de Arriba ante o Newport Cats F.C. Naquela ocasión os de A Armenteira acudían con numerosas e importantes baixas e cun equipo inicial de circunstancias, pero na xornada deste sábado o Armenteira Veteranos contaba co plantel ao completo, a excepción de Martín, ao que un compromiso de última hora privouno de estar xunto aos seus compañeiros en O Leixo. Foi unha vitoria xusta e merecida, nun partido no que a calidade futbolística non brillou, e no que a tensión, as protestas e o xogo sucio foron cobrando importancia a medida que transcurrían os minutos. Con todo, os locais lograron un valioso botín no primeiro período, no que acadaron catro tantos, o que lles permitiu afrontar con relativa confianza o resto do partido.

Desde o inicio o Armenteira Veteranos tratou de impoñer a súa superioridade. Coa liña da defensa situada á altura do mediocampo, o cadro verdinegro trataba de apretar coa presión e de atopar o máis rápido posible a meta do Noalla V. Portaredonda. As primeiras ocasións foron para os locais, aínda que o conxunto de Noalla, mediante algunha acción de contragolpe, tamén comezaba a deixarse ver polas proximidades da área defendida por Sirra. Sería nun saque de curruncho, no que Jorge Castro recibe en curto e, tras buscar o vértice esquerdo da área e perfilarse para o disparo, coloca o balón con sutileza polo lado esquerdo da meta do gardamallas Raúl Vera. O gol serviu de impulso a un Armenteira Veteranos que se sentía máis dono do xogo. Apenas uns minutos despois, unha acción de novo polo costado esquerdo do ataque local, remata co coiro nos pés de Javi, tras recibir unha asistencia co calcaño de Suso, e o fino mediocampista do Armenteira Veteranos remachaba con enerxía o balón cara o fondo da portería rival. O desquicie dos visitantes ía a máis, e un erro na saída da xogada do cancerbeiro de Noalla, que entrega a pelota a Jorge Castro no borde da área, permitiu que o atacante e máximo goleador dos verdinegros enviase con precisión un lanzamento que situaría o tres a cero no marcador. Con esta vantaxe, os locais pareceron entrar nuns momentos de relaxación, o que trataron de aproveitar os futbolistas do Noalla V. Portaredonda, que se empezaban a deixarse ver con máis frecuencia polas proximidades da área verdinegra. Pero, ao fío do descanso, unha xogada individual de Marcial pola banda esquerda do ataque verdinegro, na que se desfixo de varios rivais, rematou cun disparo que se colaba pola escadra esquerda da meta de Raúl Vera. Foi, sen lugar a dúbidas o tanto de máis bela factura dos que se lograron na tarde deste sábado en O Leixo e servía para deixar practicamente sentenciado o encontro a falta de corenta e cinco minutos para o final.

No segundo período, co vento en contra e coa relativa comodidade que daba a vantaxe no marcador, o Armenteira Veteranos cedeu un pouco no dominio que mantivera nos primeiros corenta e cinco minutos. Ao tempo, o encontro, que non se caracterizaba pola dureza nin polo xogo sucio, foi caendo nunha espiral de discusións, piques e desafíos entre os xogadores que foron eclipsando o xa de por si modesto espectáculo futbolístico que ofrecían ambos os dous conxunto. A actitude do colexiado Leirós Brea, respondendo como é habitual en el ao seu perfil de fiel observador do reglamento, afanándose en repetir as normas unha e outra vez en reacción ás protestas dos futbolistas, contribuía á que o debate se fose impoñendo ao fútbol, e a que os xogadores estivesen máis pendentes dos roces e das rencillas que de tocar o balón e crear xogadas. Recurtaría distancias o Noalla V. Portarredonda nunha acción na que a zaga local mostrou certa pasividade e na que Lino Lima, recollía un rexeitamento do pau longueiro da meta de Sirra para conseguir o primeiro gol visitante. Para parar o desconcerto táctico que padecía o Armenteira Veteranos, os locais decidiron situar un futbolista máis na zona de mediocentros. A entrada de Carlos Muñiz no terreo de xogo permitiu que os verdinegros recuperasen o dominio e que tivesen algunha ocasión para aumentar a súa bagaxe. Xa nos últimos minutos, coa tensión do encontro en aumento, Lino Lima, tras unha xogada do seu equipo pola banda esquerda, empalmaba un disparo desde fóra da área, que sorprendía a un Sirra que non tivo tempo a reaccionar para deter un balón que non levaba excesiva potencia. Era un epílogo a un encontro ao que Leirós Brea decidía poñer fin inmediatamente despois, aínda que o debate e a discusión continuaba de camiño aos vestiarios, tendo como protagonistas a algúns futbolistas e ao propio colexiado. 

Con esta vitoria o Armenteira Veteranos colócase como cuarto clasificado, con seis puntos. Na próxima xornada o cadro de O Leixo debería medirse ao Verducido Veteranos C.F. pero, a retirada da competición deste último equipo, obrigará a descansar aos verdinegros, antes de recibir, na xornada do 12 de novembro ao C.D. Mosteiro-Barbería Diego, nun novo derbi municipal que enfrontará a dous dos conxuntos chamados a loitar por ocupar as prazas máis altas da táboa.

As outras cousas do fútbol: crónicas dun regreso

 AS OUTRAS COUSAS DO FÚTBOL: CRÓNICAS DUN REGRESO

O fútbol e goles, paradas, patadas a un balón ou desmarques, pero o fútbol tamén son anécdotas, momentos de convivencia, de compañeirismo ou de lembranzas que fan aínda máis grande un deporte que desde fai anos se converteu nun fenómeno social e cultural en torno ao cal existe toda unha serie de ritos e costumes que só as persoas máis adeptas ao mundo do balompé entenden e aceptan. Para o Armenteira Veteranos a deste sábado era unha tarde de regreso ao fútbol tras catro meses sen tocar balón, ou polo menos de facelo xuntos. A principios de xuño remataba a aventura do equipo de O Leixo na fase de ascenso á Segunda Galicia de Veteranos e a principios de outubro comezaba a aventura na liga 2022/2023. Con varias e importantes baixas, e cunha soa novidade, a de Fernando, única fichaxe polo momento do Armenteira Veteranos para esta temporada, os verdinegros presentábase no campo de O Revel, en Vilalonga, ante un rival, que ao contrario que os de A Armenteira, abandonou a superficie de terra do campo de O Cruceiro, para vagar polos distintos campos de céspede artificial que existen no municipio de Sanxenxo. A escasos cinco minutos para o inicio do encontro, sobre o terreo de xogo, unicamente comparecían os futbolistas visitantes. Estiramentos, carreiras, toques de balón... mentres os máis rezagados calzaban as botas e vestíanse á presa porque o tempo apremiaba. Acantoados no seu vestuario, os futbolistas do Dorrón C.F. Veteranos, agargaban a cita. O pitido do colexiado para pasar revista antes de comezar o encontro reunía aos xogadores ás portas dos vestiarios. Un trámite, unha rutina habitual, das moitas que ten este deporte. O fútbol de veteranos regresaba para Dorrón e para A Armenteira. Do resto xa demos cumprida conta.

O Armenteira Veteranos inicia a liga 2022/2023 cun claro triunfo sobre o Dorrón C.F. Veteranos en O Revel

 FICHA TÉCNICA

DORRÓN C.F. VETERANOS - ARMENTEIRA VETERANOS - 3 - 7

ARMENTEIRA VETERANOS: Sirra; Jorge Dávila, Carlos Castro, Carlos Muñiz, Moncho; Rubén, Javi González, Martín, Marcial; Junior e Jorge Castro. Tamén xogaron Suso, Fernando e Galiñanes.

GOLES: 0-1. Minuto 19. Rubén. 0-2. Minuto 25. Suso.  0-3. Minuto 33. Jorge Castro. 1-3. Minuto 35. Rubén Da Costa, de penalti. 1-4. Minuto 40. Jorge Castro. 1-5. Minuto 55. Rubén. 2-5. Minuto 76. Daniel Guiance. 2-6. Minuto 82. Jorge Dávila. 3-6. Minuto 85. Juan José Varela. 3-7. Minuto 87. Jorge Castro.

ÁRBITRO: Martínez Martínez. Non mostrou cartóns aos xogadores de ambos os dous equipos.

INCIDENCIAS: Partido da primeira xornada do grupo 2 da Terceira Galicia de Veteranos, da delegación de Pontevedra disputado no campo de O Revel, en Vilalonga, ante uns dez espectadores, nunha soleada e bastante calorosa, e sobre un terreo de xogo de céspede artificial nunhas condicións idóneas para a práctica do fútbol.

  CRÓNICA

O Armenteira Veteranos iniciou con bo pé a liga 2022/2023, e polo menos así o indica o resultado acadado na tarde deste sábado, 1 de outubro, no campo de O Revel. Tras catro meses de inactividade, os xogadores do cadro de O Leixo volvían calzar as botas para entrontarse a un rival de sobra coñecido. Curiosamente xa a temporada pasada Dorrón C.F. Veteranos e Armenteira Veteranos se viran as caras na primeira xornada, aínda que naquela ocasión o encontro tivera lugar en O Leixo. E como naquela ocasión a vitoria caeu do lado verdinegro.

O deste sábado foi un partido falto de ritmo, con moitas imprecisións, máis propio da pretemporada cá da competición oficial. Desde o inicio, o Armenteira Veteranos tratou de tomar o control do xogo. Co fútbol disputándose case exclusivamente na metade do campo que defendían os de Dorrón, a posesión, os balóns divididos e as ocasións daban como claro vencedor ao conxunto verde e negro. Pero faltaba o gol. As primeiras oportunidades chegaron nos pés de Jorge Castro, pero o dianteiro de Vilar, moi entonado a nivel físico, non tivo fortuna no remate. Ademais, o meta local, Javier González, comezaba a que sería unha das actuacións máis destacadas do partido. As acertadas intervencións do gardamallas local ao longo dos noventa minutos acabarían impedindo un triunfo máis abultado do Armenteira Veteranos. Con todo, se Jorge Castro non estivo afortunado nos primeiros remates, como futbolista de enormes recursos que é, decidiu converterse en asistente. Tras unha xogada individual do atacante verdinegro polo costado esquerdo cede o balón a Rubén, que no segundo pau non perdoa e coloca o cero a un. Sen tempo a que o rival reaccionase, de novo outra acción de Jorge Castro, na que asiste a Suso no punto de penalti, serviría para o que bulideiro dianteiro de Couso situase o cero a dous, No cero a tres Jorge Castro deixaría de lado a súa faceta de asistente para anotar o cero a tres mediante unha cabezada no segundo pau. Recortarían distancias os locais desde o punto de penalti, ao transformar Rubén Da Costa unha pena máxima cometida por Carlos Castro. Antes do descanso, unha falta no borde da área cometida sobre Jorge Castro, era executada e enviada ao fondo das mallas polo atacante dos de A Armenteira. Nada puido facer o gardamallas Javier González ante o potente disparo do "killer" visitante.

Tras a reanudación, a situación apenas variou. O cansanzo de ambos os dous conxunto provocou que se abriran máis espazos. Isto permitiu a posibilidade de que futbolistas veloces e incisivos como Rubén puidesen lucir mellor as súas cualidades. O extremo de Caroi encargaríase de colocar o un a cinco tras recibir en profundidade e plantarse diante do meta local. Daniel Guiance aproveitaría o relaxamento da zaga do Armenteira Veteranos, e despois de recoller o rexeitamento na área, poñía o dous a cinco. O intento de reacción do Dorrón C.F. Veteranos paralizouse cando, a escasos minutos do final, Jorge Dávila, tras recoller un balón na zona dereita do ataque, empalma un zapatazo que se acaba colando pola escadra esquerda da meta dos de Dorrón. O lateral de Couso, que non acostuma prodigarse en ataque en demasiadas ocasións, atopábase co gol despois de varias temporadas. Pero de novo a pasividade defensiva dos verdinegros permitiu que Juan José Varela superase a uns cantos defensores e só ante Sirra puxese o tres a seis. Non quedaría aínda así o resultado, e novamente Jorge Castro, a centro de Rubén, poñía a súa cabeza para bater a Javier González e situar o definitivo tres a sete.

Con esta vitoria, o Armenteira Veteranos sitúase na primeira posición da táboa, un posto que pode resultar anecdótico, dado que se leva disputado unicamente unha xornada de liga, pero que mostra que, pese ás importantes baixas que sufre esta temporada o conxunto de O Leixo, preséntase como un dos máis firmes candidatos a ocupar os postos nobres da clasificación. Corresponderalle descansar ao Armenteira Veteranos na próxima fin de semana, e non retomará a competición ata o 15 de outubro cando a escadra verdinegra visite o campo de Baltar de Arriba para medirse ao Newport Cats F.C.

San Lourenzo revalida o título de campión no II Campionato Interparroquial do Concello de Meis

 O equipo que representou á parroquia de San Lourenzo de Nogueira levouse este sábado o título de campión no II Campionato Interparroquial do Concello de Meis. No torneo, que organizou o C.D. Mosteiro e se celebrou  no campo Municipal de Meis, organizado polo C.D. Mosteiro, o equipo de San Lourenzo viuse as caras na final co de San Vicente. Os conxuntos das dúas "Nogueiras" finalizaron como líderes dos seus respectivos grupos na liguiña disputada á mañá. Xa pola tarde, nas eliminatorias, San Vicente foi deixando polo camiño a Santo Tomé en cuartos de final e a San Salvador en semifinais, mentres que San Lourenzo superou ao equipo de A Armenteira en cuartos de final e a Paradela en semifinais, na que era a reedición da final da primeira edición, que tivera lugar no verán de 2019. 

O partido que estaba en liza o título de campión foi bastante equilibrado. Fronte á xuventude e ao alto ritmo no xogo dos de San Lourenzo, San Vicente apostaba pola súa maior pegada e os detalles de calidade que marcan diferenzas dalgúns dos seus futbolistas. Foi precisamente un destes detalles o que colocou por diante a San Vicente. Nunha rápida transición entre a defensa e o ataque, Álex Fernández asistiu de cabeza ao seu pai Ricardo, e este superou ao meta rival cunha perfecta vaselina. Axiña reaccionou San Lourenzo, e tras unha serie de combinacións, David Outón, poñía a igualada. Co equilibrio no marcador foise ao descanso, e tras a reanudación, mantívose a igualdade no xogo. A carga de minutos nos xogadores máis destacados do equipo de San Lourenzo, unido a que este equipo se atopou cunhas eliminatorias a priori de maior desgaste, parecían notarse nos futbolistas que este ano vestían con camisola branca. Tampouco andaban sobrados de forzas os xogadores de San Vicente e tanto un como outro conxunto dispuxeron de ocasións para desequilibrar, aínda que isto non se produciría ata os últimos suspiros do encontro, cando de novo David Outón aproveitaba un desequilibrio defensivo do adversario para situar o dous a un no marcador. Non deu tempo a reaccionar ao equipo de San Salvador e o equipo de San Lourenzo conseguiría así revalidar o título que conseguira na primeira edición aló por 2019. Co especial protagonismo de David Outón, un rapaz de 17 anos que milita actualmente nas categorías de fútbol-7 do Pontevedra C.F. e da saga dos irmáns Ares, unido á forza dun potente bloque no que se aúnan xuventude e calidade, o equipo de San Lourenzo foi o digno vencedor dun Campionato Interparroquial que parece que se está a consolidar entre o panorama de actos festivos e deportivos que teñen lugar no territorio do municipio de Meis.

En canto á participación do equipo que representou á parroquia de A Armenteira, este ano realizou un papel meritorio. Con dezaoito futbolistas dos vintedous incritos inicialmente, o cadro que este ano acabou lucindo unha camisola azul mariño logrou competir e pór en apuros a todos os rivais cos que se foi atopando no torneo. Nos partidos da liguiña caeu por un tanto a cero fronte ao equipo de San Vicente no primeiro dos encontros. No segundo, tras facer variacións no sistema e tratar de reforzas a liña defensiva e o medio campo, fixeron o que foi quizais o mellor partido. Dous a un perderon ante Paradela, cun gol de tacón dun dianteiro adversario nos minutos finais. O tanto dos de A Armenteira, o primeiro neste torneo, foi logrado por Dani Dadín. Menos sorte correu o equipo de A Armenteira no partido fronte a San Martiño. No que era a cita máis decisiva da mañá, os xogadores da parroquia veciña estiveron máis atinados e, con dous tantos case seguidos, desequilibraron un partido, no que de nada valeu no tanto nos intres finais de José Pérez remachando sobre a liña de gol un pase de Jorge Castro. Xa á tarde, nas eliminatorias, as opcións dos de A Armenteira reducíanse, pois, ao rematar na cuarta posición na liguiña, tiñan que medirse ao campión do outro grupo, San Lourenzo. O bo inicio dos azul mariños, que dispuxeron de algunhas ocasións para adiantarse, non tardou en ser contarrestado polos de San Lourenzo, que acabarían vencendo por tres tantos a cero, cun gol no minuto final de David Outón. Pese a non lograr o triunfo en ningún dos encontros, o equipo representativo de A Armenteira tivo un papel aceptable nun torneo no que se enfrontou a rivais dun potencial notable. A amplitude do plantel, que non impediu que se puidesen repartir de forma bastante equitativa os minutos, e as achegas da nova xeración de futbolistas de A Armenteira, representada nesta ocasión por Dani Dadín, Manu Meixús, Íñigo, Javi Abal e Fran, foron das notas máis destacadas dun conxunto que xa pensa en preparar, se as circunstancias o permiten, a edición de 2023, na que agarda continuar coa progresión mostrada este ano e na tratará de continuar coa incorporación de mozos da parroquia a un equipo no que se combinarán de de novo o brío e a axilidade da xuventude e a experiencia e serenidade dos futbolistas máis veteranos.

O equipo de A Armenteira xa coñece o horario dos partidos do II Campionato Interparroquial

Na tarde-noite deste mércores, 29 de xullo, o C.D. Mosteiro deu a coñecer a composición dos grupos e o horario dos partidos do II Torneo Interparroquial do Concello de Meis. No campo Municipal de Meis, en horario de mañá e tarde, o sábado, 2 de xullo, competirán oito equipos, sete representando ás parroquias do municipio meisino, xunto con un combinado formado por ex-xogadores do C.D. Mosteiro. Non resultou agraciado a priori o equipo representativo da parroquia de A Armenteira, xa que, no grupo B, no acabou encadrado, tamén figuran os conxuntos das parroquias de San Martiño, San Vicente e Paradela, equipos que debido á súa estrutura demográfica, cunha poboación relativamente nova, adoitan presentar equipos de gran potencial, e que están entre os principais aspirantes a alcanzar o título de campión, que ostenta o equipo de San Lourenzo, vencedor en 2019. O cadro de A Armenteira, que nesta edición lucirá unha vistosa camisola negra, comezará a súa participación ás 10.35 horas fronte ao equipo de San Vicente. A continuación, ás 12:00 horas medirase a Paradela e, para finalizar, ás 13:10 horas verase as caras coa formación da parroquia colindante de San Martiño, no que será un interesante duelo de rivalidade. Tras o descanso para a comida do mediodía, terán lugar as eliminatorias, que se iniciarán cos cuartos de final, e que rematarán coa gran final, prevista para as 19:00 horas. 

Máis aló do ámbito competitivo, no que o equipo de A Armenteira agarda desempeñar un digno papel, será unha xornada de convivencia, na que o deporte e a amizade entre xogadores de parroquias veciñas se combinarán e no que haberá tempo para a charla, as anécdotas e para comentar o acontecido ao longo do día. De feito, a entidade organizadora, o C.D. Mosteiro, ten instalada unha carpa no recinto do campo Municipal de Meis, na que se servirán comidas, e que fará que, previsiblemente, boa parte dos participantes decidan xantar xa no escenario dos partidos. No caso do combinado de A Armenteira, son 22 os futbolistas inscritos, aínda que compromisos laborais de última hora fan que non sexa segura a presenza de todos os efectivos e que, algún deles, unicamente poida disputar unha parte do torneo. Quen si confirmou a súa asistencia é unha parte da afección que acudirá ao Mosteiro para animar á escadra que nesta ocasión vestirá de negro.

A parroquia de A Armenteira volverá contar cun equipo representativo no II Torneo Interparroquial do Concello de Meis

O sábado, 2 de xullo, no campo Municipal de Meis, en O Mosteiro, desenvolverase a segunda edición do Torneo Interparroquial do Concello de Meis. O evento, organizado polo C.D. Mosteiro, iniciouse no verán do ano 2019, pero a extensión da pandemia do COVID-19, impediu que puidese celebrarse nos anos seguintes. Superados os efectos máis graves da pandemia, o C.D. Mosteiro, coa colaboración de varias casas comerciais e, principalmente, do Concello de Meis, retoma unha competición na que estarán representados equipos das sete parroquias que conforman o termo municipal, ademais dun equipo feminino, que substitúe ao equipo convidado en representación doutro Concello, como fora o caso do conxunto da parroquia de Barro no ano 2019. Naquela ocasión o equipo de A Armenteira acudira moi mermado a causa das numerosas baixas que o afectaban. Lesións, ocupacións profesionais ou compromisos de diverso tipo impediran configurar un plantel amplo que garantise competir en igualdade de condicións cos equipos doutras parroquias, que si acudiron con representacións máis amplas. Baixo a dirección de Martín Casais e Jorge Dávila, a representación de A Armenteira no Torneo Interparroquial de 2022 agárdase que sexa bastante máis extensa. Ata 21 futbolistas inscribiu a parroquia na competición, aínda que compromisos de última hora poden reducir esta cifra. Trátase dun plantel variado, que ten como base o equipo do Armenteira Veteranos, pero que tamén contará con xogadores que compiten con outros equipos, e tamén cunha nova formada de mozos formados nas categorías de fútbol base do Armenteira C.F.,  e que, unha vez que o proxecto de canteira da entidade verdinegra deixou de existir, continúan a súa aventura noutros clubes da contorna. C.D. Mosteiro, S.D. Noalla, Sisán Veteranos, C. Juventud Cambados, S.D. Puentearnelas, ademais do Armenteira Veteranos, son as entidades que conforman a representación dunha parroquia que nesta ocasión cambiará a camisola rosa da edición de 2019 por unha camisola negra, máis a tono coas cores que locen tanto o Armenteira C.F. como o Armenteira Veteranos, que en ambos os casos combinan os tonos verdes e os negros nos seus uniformes. 

Coa intención de defender con dignidade o nome da parroquia, sen renunciar ás máis altas cotas, o equipo de A Armenteira prepárase para que un torneo que o sábado, 2 de xullo, en horario de mañá e tarde, no campo Municipal de Meis, reunirá a veciños e veciñas de Meis e da contorna para disfrutar, convivir e competir arredor dun balón. Os 21 futbolistas que, en principio, defenderán a camisola da parroquia, parten coas máximas expectativas e, sobre todo, coa ilusión de pasar un día de fútbol entre amigos, compañeiros e veciños.

A Armenteira acapara este sábado as actividades do mes do medio ambiente que organiza o Concello de Meis

 O territorio da parroquia de A Armenteira será o protagonista das actividades que este sábado organiza o Concello de Meis co motivo do mes do medio ambiente. Ao longo deste mes de xuño veñen desenvolvéndose unha serie de actividades, como as relacionadas co proceso de compostaxe, obradoiros de limpeza ecolóxica e de elaboración de xabón ou contacontos. Case todas estas actividades están centradas no CPI de Mosteiro-Meis, ao que acude o alumnado de A Armenteira para cursar os estudos de ensino secundario, pero no caso deste sábado, será o propio territorio da parroquia o escenario principal das actividades. A partir das 10:15 horas realizarase un roteiro interpretativo coa intención de pór en valor o patrimonio cultural, histórico, artístico e natural do entorno do complexo rupestre do Outeiro do Cribo. Ao tempo que disfrutarán e coñecerán máis respecto dos segredos que garda este enclave, as persoas participantes irán identificando as plantas invasoras e realizarán unha recollida do lixo que vaian atopando ao longo do camiño. Será un percorrido didáctico, guiado por persoas expertas nestes campos, e que partirá da denominada Praza de Vilar, na entrada ao adro do mosteiro cisterciense, e discorrerá pola aldea de Valdedeus, onde a tradición popular sitúa o episodio da lenda de San Ero e a paxariña, para despois desprazarse ata o complexo rupestre do Outeiro do Cribo e, desde alí, se o tempo o permite ata os petróglifos de Outeiro do Tronco e a necrópole de Pedra do Lagarto, onde se atopan varios sepulcros da etapa do Neolítico, entre os que destaca a mámoa coñecida como a Casiña da Moura. 

Á fronte da expedición estará Martín Casais, veciño de A Armenteira e concelleiro responsable da área de Medio Ambiente no consistorio meisino, as persoas participantes percorrerán un traxecto no que a riqueza natural se mestura coa arte, coa historia e coa lenda, que nos traslada a épocas que van desde a Prehistoria, na que se elaboraron as mámoas ou os petróglifos, ata a época actual, pasando pola Idade Media, coa figura de San Ero e co inicio da construción do mosteiro cisterciense, que continuaría ao longo da Idade Moderna. Desde a organización recoméndase levar roupa cómoda, dada a esixencia do treito a percorrer, e ir provistos de luvas, coas que recoller o lixo e retirar as plantas invasoras. Na pasada edición, no ano 2021, leváronse a cabo roteiros independentes por cada parroquia, pero neste caso decidiuse concentrar os esforzos en A Armenteira, para deste xeito promocionar o valioso patrimonio co que conta o entorno do mosteiro cisterciense, en especial o complexo rupestre do Outeiro do Cribo, no cal o Concello, co apoio da Deputación de Pontevedra, está desenvolvendo un proxecto de recuperación e posta en valor do entorno dos gravados rupestres, un feito que se veu impulsado principalmente tras a incorporación ao patrimonio municipal dos terreos nos que se asentan os petróglifos, tras a doazón realizado polo propietario, o veciño do lugar de San Amedio Antonio Cores.

Dúas accións a balón parado do A. Cinania-Idago Cal Barral acaban coas opcións de ascenso do Armenteira Veteranos

 FICHA TÉCNICA

ARMENTEIRA C.F. - A.CINANIA-IDAGO CAL BARRAL - 1 - 2

ARMENTEIRA VETERANOS: Sirra; Jorge Dávila, Carlos Castro, Javi, Moncho; Marcial, Martín, Júnior, Víctor; Rubén e Jorge Castro. Tamén xogaron Suso e Galiñanes.

GOLES: 1-0. Minuto 5. Jorge Castro. 1-1. Minuto 33. Félix Santos.  1-2. Minuto 62. Javier Rico.

ÁRBITRO: García Pérez. Mostrou cartóns amarelos a Galiñanes, Moncho e Carlos Castro por parte do Armenteira Veteranos, e a Hugo Vázquez, Félix Santos, Jacobo Campo e a Fernando Carhuachín, neste caso por partida dobre.

INCIDENCIAS: Partido da cuarta xornada do grupo D1 da liga de promoción de ascenso á Segunda Galicia de Veteranos, da zona de Pontevedra, disputado no campo de O Leixo, en A Armenteira, ante uns dez espectadores, nunha moi soleada e calurosa, e sobre un terreo de xogo nunhas condicións aceptables para a práctica do fútbol.

  CRÓNICA

O Armenteira Veteranos perdeu toda opción de ascender á Segunda Galicia de Veteranos tras o partido da tarde deste sábado no campo de O Leixo. A derrota ante o A. Cinania-Idago Cal Barral puxo fin ao soño de dar o salto de categoría, unha aventura que foi posible tras finalizar a primeira fase do campionato entre os catro mellores do seu grupo. 

Foi tras un partido que se iniciou ás catro e media da tarde, no medio dun  intenso calor, e no cal a fortuna non estivo do lado do conxunto local. Sen realizar un partido brillante, o Armenteira Veteranos non foi inferior ao seu rival no plano futbolístico, pero si no acerto de cara á portería contraria. Se na pasada fin de semana a inspiración a nivel ofensivo de Rubén, autor de dous tantos, permitira desequilibrar un partido que parecía que ía rematar en táboas, nesta ocasión non tiveron demasiada puntería os atacantes verdinegros. De novo lastrado polas numerosas baixas, o Armenteira Veteranos trataba de facer fronte a esta eiva coa confianza que outorgaba a vitoria da última xornada. E nada máis comezar o encontro, unha combinación en ataque dos verdinegros deixaba a Jorge Castro ante o meta Antonio Martínez, e o dianteiro de Vilar non perdoaba. O gol fixo incrementar a confianza dos locais, que se vían dominadores do xogo e non pasaban apenas apuros en defensa. Máis contundentes na disputa do balón e buscando transicións rápidas cara a portería dos de Cangas o Armenteira Veteranos dispuxo incluso dalgunha ocasión máis para ampliar o seu rédito. Pero, tras unha serie de desaxustes defensivos, que deron lugar a unha falta ao borde da área, o A. Cinania-Idago Cal Barral acabaría logrando a igualada en torno á media hora de xogo. Javier Rico, un auténtico especialista no lanzamento de golpes francos, que xa anotaba no partido de volta, conseguiu colar o balón por entre a barreira verde e negra e, pese a estirada de Sirra logrou  deter o coiro, un atento Félix Santos recollía o rexeitamento e mandaba o esférico ao fondo das mallas. O gol, xunto coas altas temperaturas, foron mermando as ansias do Armenteira Veteranos, que pouco a pouco foi cedendo terreo. 

Esta tendencia mantívose no segundo período, no que os visitantes ían facéndose coa posesión do xogo, apoiados sobre todo na calidade do tridente ofensivo que formaban David Vizoso na media punta e Paulo Pedrosa e Javier Rico na dianteira. Ao igual que ocorrera no partido da primeira volta, tras unha falta no ángulo dereito da área dos de Armenteira, Javier Rico conectaba un potente disparo que sorprendía a Sirra. Conscientes de que este resultado dilapitada toda opción de ascenso, os futbolistas do cadro local exprimiron as súas forzas na parte final do partido. Guiados desde a liña de creación por un moi activo Júnior, que sen dúbida foi un dos futbolistas máis destacados no partido, e apostando polos balóns aéreos e o fútbol directo, o Armenteira Veteranos foi quen de xerar varias ocasións de perigo. Jorge Castro, Javi González, Rubén, Suso ou Martín tiveron nos seus pés a posibilidade de conseguir a igualada, pero parece que a fortuna non estaba este sábado do lado local. Pero a ocasión máis clara tívoa Jorge Castro. A cinco minutos do final, o dianteiro de Vilar era derrubado dentro da área por un defensor cangués. O propio Jorge Castro encargaría de asumir a responsalidade de executar a pena máxima, atopábase coas luvas do meta Antonio Martínez. Un hábil Rubén chegaría a recoller o rexeitamento, pero axiña os defensores visitantes se interpuxeron no seu camiño para evitar o gol. Á desesperada, o Armenteira Veteranos buscou o empate nos minutos finais. A fortaleza física dos defensores rivais e a sorte esquiva en ataque para os locais fixeron que estes intentos fosen infrutuosos e que o triunfo final se acabase marchando para terras de O Morrazo. 

Con esta derrota o Armenteira Veteranos continúa na cuarta posición do grupo D1 da promoción de ascenso. A loita por subir de categoría estará agora entre a E.F.B. Vilanova-Caleiro, líder, con doce puntos, o A. Cinania-Idago Cal Barral, segundo, con oito puntos, e o Club Lamense-Serra do Suído, terceiro, con sete puntos, e que este sábado derrotou sorprendemente ao líder e gran favorito, a E.F.B. Vilanova, por un contundente catro a cero. Será curiosamente a formación de Vilanova de Arousa a que visite o campo de O Leixo a próxima fin de semana, nun partido no que os vilanoveses poderán certificar o seu pase á Segunda Galicia de Veteranos.

O Armenteira Veteranos inicia a promoción de ascenso á Segunda de Veteranos cunha derrota en Cangas do Morrazo

  FICHA TÉCNICA

A. CINANIA-IDAGO CAL BARRAL-ARMENTEIRA C.F. - 3 - 1

ARMENTEIRA VETERANOS: Sirra; Jorge Dávila, Carlos Castro, Marcos, Moncho; Suso, José Pérez, Júnior, Javi González, Martín; e Jorge Castro.

ÁRBITRO: García Luis. Mostrou cartóns amarelos a Paulo Pedrosa e Arturo Cordeiro por parte do A. Cinania-Idago Cal Barral e a Javi González, Moncho, Carlos Castro e Jorge Dávila por parte do Armenteira Veteranos.

INCIDENCIAS: Partido da primeira xornada do grupo D1 da liga de promoción de ascenso á Segunda Galicia de Veteranos, da zona de Pontevedra, disputado no campo das Pistas de Atletismo, en Cangas do Morrazo, ante uns cinco espectadores, nunha tarde soleada e anubrada por momentos, e bastante calurosa, e sobre un terreo de xogo cunha superficie de herba natural, pero moi irregular, e polo tanto, nunhas condicións non demasiado favorables para a práctica do fútbol.

  CRÓNICA

O Armenteira Veteranos non inicio con bo pé a súa aventura na promoción de ascenso á Segunda Galicia de Veteranos. Encadrado no grupo D1, xunto á E.F.B. Vilanova-Caleiro, ao Club Lamense-Serra do Suído e ao A.Cinania-Idago Cal Barral, o conxunto verdinegra parte coa máxima ilusión por desempeñar un papel digno nunha competición para non parte entre os favoritos a dar o salto de categoría. O partido deste sábado non se presentaba na mellor situación para os de O Leixo. Cun elevado número de baixas, o Armenteira Veteranos compareceu no campo das Pistas de Atletismo de Cangas do Morrazo con tan só once efectivos, o que sumado ás altas temperaturas que se rexistraban a esas horas, dificultaba a posibilidade de competir en igualdade de condicións fronte a un rival que finalizara na segunda posición do seu grupo da Terceira de Veteranos, e que si puido realizar cambios e repartir os esforzos dos seus futbolistas ao longo dos noventa minutos.

En canto ao encontro foi un partido equilibrado, con alternativas por ambos bandos, pero no que acabou decidindo a maior pegada e a maior adaptación á peculiar superficie do terreo de xogo por parte dos locais. Sen un dominador claro desde o inicio, o Armenteira Veteranos non parecía sentirse incómodo nos primeiros minutos. Cunha liña de medio campo bastante poboada, na que Júnior, José Pérez e Javi González ocupaban a zona de creación, o cadro verdinegro trataba de asumir o control do xogo, aínda que con demasiadas precipitacións. Cústaballe conectar cun Jorge Castro que, moi só na liña de ataque, e sempre rodeado de varios defensores, conseguía avanzar con moitas dificultades cara a meta adversaria. Non tardou en poñerse por diante o A. Cinania-Idago Cal Barral. Unha acción de contraataque, na que un futbolista local foi derrubado no borde dereito da área visitante daría lugar a unha falta que Javier Rico, o dianteiro máis incisivo dos cangueses, colocou na escadra esquerda da meta de Sirra. A desvantaxe no marcador non acabou coas ansias dos de  A Armenteira, que insistían no seu fútbol directo na procura de Jorge Castro. Tras varios avisos, á media hora de xogo, Jorge Castro era derrubado na área cando se plantaba diante do gardamallas local. O escaso público que se desprazou a animar ao Armenteira Veteranos reclamaba que a pena máxima fose executada por Júnior, que contou cunha pequena lexión de fans este sábado no campo das Pistas de Atletismo, pero sería o propio Jorge Castro o encargado de realizar o lanzamento do penalti. Logrou anotar o dianteiro de Vilar, aínda que non duraría demasiado á alegría para a parroquia visitante, pois nunha xogada na que os futbolistas verdinegros reclamaban que o adversario se axudou da man para levarse o balón, e na que, ao xeito dos xogadores do Real Madrid no recente enfrontamento co Manchester City esqueceron a intensidade defensiva para centrarse nas protestas ao colexiado, Paulo Pedrosa conectaba un disparo con exterior da súa bota dereita que ía de novo cara o fondo das mallas pola escadra da meta que defendía Sirra. Unha tangana despois dun choque entre Carlos Castro e un futbolista cangués, na que os graves insultos dun xogador local ao defensor do Armenteira Veteranos fixo elevar a tensión, con ameazas, agarróns e empurróns, apurou ao colexiado García Luis a sinalar a fin do primeiro período.

Tras a reanudación a situación non variou moito. Mentres o A. Cinania- Idago Cal Barral intentaba armar un fútbol combinativo desde a zona defensiva, o Armenteira Veteranos apoiábase no seu fútbol máis físico e dinámico para buscar o empate. Jorge Castro, Martín ou Suso tiveron nos seus pés a oportunidade de lograr a igualada, pero tamén puideron ampliar vantaxe os locais, principalmente cando un centro á área verdinegra impactou no cóbado de Marcos. Aínda que o central de Castrelo se atopaba sobre a liña da área, o colexiado García Luis decidiu decretar penalti. Ao lanzamento desde os once metros reaccionou Sirra cunha excepcional parada. No último tramo do encontro o Armenteira Veteranos tratou de buscar a meta local, pero o cansanzo provocaba que cada vez houbese máis espazos, o que provocaba que os de O Morrazo, guiados por David Vizoso desde a liña medular, atopasen máis vías para levar o perigo á meta de Sirra. Nunha desas accións, unha internada do lateral polo costado esquerdo, na que apenas se lle presentaron obstáculos, rematou cunha asistencia a Javier Rico que, cara a cara ante Sirra, acabaría enviando o coiro ao fondo das mallas. Era a sentenza definitiva a un partido que xa non tería máis historia e que complica enormemente as escasas aspiracións de ascenso do Armenteira Veteranos, que con este resultado finalizan a primeira xornada na cuarta posición, con cero puntos. A próxima fin de semana, a formación verde e negra deberá visitar o campo de O Terrón para medirse á potente escadra da E.F.B. Vilanova-Caleiro. O conxunto de Vilanova de Arousa liderou con absoluta autoridade a liga do grupo A, contando por vitorias todos os partidos menos un, o que o enfrontou ao Salud S.D. O enorme potencial do rival do próximo sábado e as numerosas baixas que vén arrastrando o Armenteira Veteranos converten á cita desta segunda xornada da promoción de ascenso nun reto tremendamente difícil para os de O Leixo, que buscaran exprimir ao máximo as mínimas opcións de puntuar no feudo vilanovés.