O Armenteira Veteranos e o Carballo da Portela A.C.D. repártense os puntos nun partido con moitas alternativas

FICHA TÉCNICA
ARMENTEIRA VETERANOS - CARBALLO DA PORTELA A.C.D. - 3 - 3

ARMENTEIRA VETERANOS: Sirra; Moncho, Óscar Muñiz, Óscar Barreiro, Richi;  Martín, Charles, José Pérez, Marcial; Rubén e Galiñanes. Tamén xogaron Javi González, Jorge Dávila e Manolo.

GOLES: 1-0. Minuto 22. José Pérez. 1-1. Minuto 28. José Luis Blanco, de penalti. 2-1. Minuto 56. Galiñanes. 2-2- Minuto 62. Rubén Canosa. 3-2. Minuto 66. Rubén. 3-3. Minuto 73. Pablo Castro.

ÁRBITRO: García Luis. Mostrou cartóns amarelos a José Pérez, Galiñanes e Moncho por parte do Armenteira Veteranos e a José Manuel González por parte do Carballo da Portela A.C.D.

INCIDENCIAS: Partido da décimo quinta xornada da Terceira Galicia de Veteranos. Grupo 2, disputado no campo de O Leixo, en A Armenteira, ante uns quince espectadores, nunha tarde soleada e temperada, e sobre un terreo de xogo que nunhas condicións aceptables para a práctica do fútbol, debido sobre todo a que a superficie de area fora removida cunha rede nas horas anteriores á disputa do partido.
.

 CRÓNICA

O Armenteira Veteranos perdeu de novo a oportunidade de atoparse co triunfo. Dende o pasado 23 de novembro, cando vencera ao Zacande-Terras de Curro, non coñece a vitoria o cadro que capitanea José Luis Galiñanes. No encontro deste sábado ante o Carballo da Portela A.C.D. os verdinegros ben puideron levarse a vitoria, oportunidades tiveron para conseguilo, pero tamén é certo que, especialmente no segundo período, o triunfo estivo preto de caír do lado visitante. Tras uns primeiros minutos de tanteo, no que ningún dos dous conxuntos era quen de facerse claramente co dominio, o Armenteira Veteranos foi asentándose sobre o terreo de xogo e pouco a pouco comezou a aproximarse con maior frecuencia polos arredores da meta defendida por Aitor Pérez. No minuto 26 José Pérez, tocando suavemente o coiro no primeiro pau, colaba o balón cara o fondo da rede dos de Barro. Sentíase cada vez máis cómodo o equipo local, que a pesares de sufrir a notable ausencia do mancado Jorge Castro, incluso se vía con posibilidades de incrementar a vantaxe. Pero uns minutos despois, Óscar Barreiro derrubaba a un atacante visitante na área e García Luis decretaba penalti. A pena máxina sería transformada por José Luis Blanco, un futbolista habituado a visitar o campo de O Leixo, aínda que no papel de adestrador, en concreto con clubes como o Meaño F.C. ou a E.F.B. Vilanova. O tanto da igualada deu confianza aos de Barro, que trataban de buscar un fútbol dinámico e insistían nos envíos en profundidade cara uns extremos que se pegaban á liña de cal. Dispuxo nesta parte do encontro o Armenteira Veteranos tamén dalgunha ocasión máis, pero non sería ata a segunda metade cando os verdinegros tomarían novamente vantaxe. Despois de varias aproximacións con perigo, Galiñanes resolvía con elegancia ante Aitor Pérez. Co dous a un no marcador, o Armenteira Veteranos parecía emprender o camiño cara a vitoria. Xa sen Charles nin José Pérez sobre o campo, aos que un evento privou de disputar a segunda metade, os verde e negros eran donos do mediocampo, con Javi González e Martín como encargados da creación do xogo, favorecidos ademais polas continuas imprecisións nos pases do Carballo da Portela A.C.D. Con todo, as dúbidas e a falta de contundencia á hora de despexar un balón permitiron que Pablo Castro, dende fóra da área, empalmara un lanzamento ante o que nada puido facer Sirra. O esférico pasou rozando o pau esquerdo ante a desesperación local. Axiña respondeu o Armenteira Veteranos e Rubén, moi activo na punta de ataque na tarde deste sábado, culminou unha acción individual con disparo coa perna esquerda que volvía poñer por diante aos seus. O público local xa pensaba celebrar a vitoria e os verdinegros buscaban animarse entre eles e confiaban en non cometer erros que arruinasen un triunfo que semellaban ter no peto. Unha polémica decisión dun moi pouco acertado García Luis, ao anular un tanto por suposta posición antirregulamentaria de Marcial, cando o de O Marco partía dende unha situación máis atrasada que os defensores rivais, enervou os ánimos contra o colexiado por parte dos futbolistas de A Armenteira, que ían ver escapar outra ocasión propicia para acadar os tres puntos. Sería tras unha falta no borde da área, magníficamente executada por Rubén Canosa, que permitiu que os visitantes acadasen a igualada. Non se rendiron os futbolistas locais, e non deixaron de intentalo nos últimos minutos, como tampouco fixo o Carballo da Portela A.C.D. que disfrutou asimesmo dalgunha ocasión de relativa claridade nunha recta final do encontro no que os dous equipos, sen apenas recambios no banco de suplentes, acusaban o cansanzo, relaxando a presión, e concedendo amplos espazos ao adversario. Finalmente o resultado non se moveu e o tres a tres final deixou medianamente satisfeitos aos futbolistas dun e doutro equipo. Suma un punto máis ao seu casilleiro o Armenteira Veteranos, ata acadar a cifra de oito, que o mantén na décimo novena posición, precisamente a un punto do rival da próxima xornada, o Santomé S.D., que recibirá aos de O Leixo, o sábado, 1 de febreiro, nas instalacións deportivas de Chan do Piñeiro.

Armenteira terá un especial protagonismo na edición 2020 de FITUR

FITUR, a Feira Internacional de Turismo, é un evento que se celebra anualmente no IFEMA, a Institución Ferial de Madrid, e que, ao longo de cinco días converterase nun punto de encontro global para os e as profesionais do turismo e na feira líder para os mercados receptivos e emisores de turistas de Iberoamérica. Dende 1981 vén celebrándose a que moitos consideran como unha das feiras máis importantes do mundo no seu sector, que na pasada edición bateu o récord de participación, con 10.487 empresas de 165 países e rexións, 142.642 profesionais e 110.848 visitantes de público xeral. Na edición de 2020, entre o 22 e o 26 de xaneiro, conectaranse os profesionais do turismo cos viaxeiros e viaxeiras, e tratarase de proporcionar un espazo para descubrir as tendencias e as innovacións no sector turístico, atendendo especialmente nesta ocasión ao desenvolvemento sostible e ao coidado e respecto polo medioambiente. Como vén sendo habitual diversos países, entidades e institucións estarán presentes na cidade de Madrid para dar a coñecer os seus recursos turísticos. A Xunta de Galicia, a través da Consellería de Cultura e Turismo, e da secretaria xeral de Turismo de Galicia, Nava Castro, será de novo unha das protagonistas no evento, como tamén o será a Deputación de Pontevedra e Mancomunidade de O Salnés. Un papel relevante terá nesta edición a institución que dende o pasado mes de decembro preside Marta Giráldez, alcaldesa de Meis, como tamén o terá o propio Concello meisino. O xoves, 23 de xaneiro, ás 17:30 horas, no Pavillón 9, situado no stand de Galicia, terá lugar un acto de presentación da Mancomunidade de O Salnés, que irá seguido dos que realizarán o Concello de Cambados e o Concello de Meis, no cal, como non podería ser doutro xeito, a parroquia de A Armenteira ocupará un espazo destacado. Numerosas autoridades políticas e representantes e profesionais do sector turístico acudirán a un evento no que o Concello de Meis estará representado polas concelleiras Araceli Maquieira e María Sancho, ademais da alcaldesa Marta Giráldez, que intervirá no acto de presentación, expoñendo os valores, os servizos e as posibilidades que ofrece este territorio á xente que nos visita. Ao mesmo tempo, durante os cinco días que dura a feira, no stand da Mancomunidade de O Salnés, as persoas que asistan poderán contemplar vídeos promocionais e recibir material audivisual sobre a comarca e os municipios que a compoñen. A Armenteira, como un gran referente a nivel turístico, co seu enorme patrimonio histórico, artístico, cultural e natural, co seu marabilloso mosteiro cisterciense, a denominada a catedral de O Salnés, coa Ruta da Pedra e da Auga  ou cos seus roteiros e paisaxes arredor do monte Castrove constituirá un dos grandes centros de atracción dun evento multinacional que promociona unha das principais fontes de recursos da economía de España, de Galicia, do noso Concello e da nosa parroquia.

Empate con sabor amargo do Armenteira C.F. feminino en Pardellas

FICHA TÉCNICA

S.D. JUVENIL RODOSA - ARMENTEIRA C.F. - 3 - 1

ARMENTEIRA C.F.:Lola; Anabel, Alba, Ana; Sara Torres, Rocío; e Sara Rey. Tamén xogou Nerea.

ÁRBITRO: Veiga Benítez. Non mostrou cartóns amarelos a ningún dos dous equipos.

INCIDENCIAS: Partido da primeira xornada da segunda fase do grupo B da Liga Feminina de fútbol-7, que se  disputou no campo Alfredo Bautista Alconero-Pardellas, de Ponteareas, ante uns trinta espectadores, nunha mañá soleada, pero fría, e sobre un terreo de xogo cunha superficie de céspede artificial excesivamente desgastada.

CRÓNICA

O equipo feminino do Armenteira C.F. comezou con empate a segunda fase do grupo B da Liga feminina de fútbol-7. Pero foi unha igualada con sabor amargo, pois o conxunto verdinegro viuse claramente superior e desperdiciou a oportunidade de lograr a primeira vitoria na historia deste equipo dende que compite na modalidade de fútbol-7. As numerosas ocasións erradas e o descenso do ritmo de xogo das verdinegras na segunda metade impediron que puideran traerse os tres puntos das terras do Tea. O encontro da mañá deste domingo foi de claro dominio do Armenteira C.F., especialmente na primeira metade, onde as accións de xogo se desenvolveron basicamente na metade do campo defendida pola S.D. Juvenil Rodosa. Acusaban a falta de pegada as visitantes, que rondaban a meta de Noelia Peláez, pero non lograban finalizar con éxito as ocasións. No minuto 25 o colexiado Veiga Benítez sinalou de forma trabucada a fin do primeiro período. Ante as advertencias de Marcial Prado o trencilla deuse de conta do seu erro e prolongou os cinco minutos que restaban desta parte. E sería nese momento cando Alba, cun potente zapatazo, convertía en gol un lanzamento de falta. Tras o descanso o Armenteira C.F. mostrou certa relaxación, baixo o ritmo de xogo e permitiu que o rival adiantase liñas e comezase a dar sensación de perigo. Conducidas por Nerea Ubeira "Peque" as pontareanas fixeron intervir a unha Lola que pasara frío na primeira metade. Ao contragolpe as verdinegras dispuxeron de oportunidades para sentenciar. Anabel, Sara Rey ou Rocío tiveron nos seus pés a ocasión de ampliar a vantaxe visitante, pero nunha acción de ataque da S.D. Juvenil Rodosa na que Anabel sufriu un forte golpe na cara, Luisa Granada colacaba o un a un. Intentou o Armenteira C.F. acadar o tanto que lle dese un triunfo que cría que por xustiza merecía, aínda que non foi posible. Con este empate o cadro que dirixe Marcial Prado sitúase na terceira plaza, á espera de recibir o próximo domingo, previsiblemente ás 17:00 horas, ao Porriño Industrial F.C., un conxuno que ocupa de forma momentánea a primeira posición desta fase da liga, e que figura entre os máximos favovitos a levarse o título de campión.

O Armenteira Veteranos roza a vitoria en San Vicente de O Grove

FICHA TÉCNICA
MAR DEL NORTE VETERANOS - ARMENTEIRA VETERANOS - 3 - 2

ARMENTEIRA VETERANOS: Sirra; Víctor, Charles, Óscar Muñiz, Richi;  Martín, Javi González, José Pérez, Marcial; Rubén e Jorge Castro. Tamén xogaron Moncho, Galiñanes, Manolo, Jorge Dávila, Óscar Barreiro e Yumas.

GOLES: 0-1. Minuto 26. Marcial. 1-1. Minuto 32. Juan Alarcón. 1-2. Minuto 50. Jorge Castro. 2-2- Minuto 58. Pablo Camiña.3-2. Minuto 75. Pablo Camiña.

ÁRBITRO: Núñez Veget. Mostrou cartóns amarelos a José María Meis por parte do Mar del Norte Veteranos e a Moncho, Óscar Muñiz e Yumas por parte do Armenteira Veteranos.

INCIDENCIAS: Partido da décimo cuarta xornada da Terceira Galicia de Veteranos. Grupo 2, disputado no campo de As Lampáns, en San Vicente de O Grove, ante apenas cinco espectadores, nunha tarde fría, anubrada e chuviosa por momentos, e sobre un terreo de xogo que nunhas condicións aceptables para a práctica do fútbol.
.

 CRÓNICA

O Armenteira Veteranos tivo na súa man a vitoria no partido da tarde deste sábado en San Vicente de O Grove, pero, como xa ocurriu noutras ocasións esta temporada, o triunfo, e incluso a posibilidade de puntar escapouse na recta final do encontro. As oportuninades desperdiciadas, os erros defensivos e a falta de intensidade no xogo acabaron condenando a un equipo que non acaba de saír dos postos baixos da táboa, a pesares de que o potencia do conxunto e a calidade individual dalgúns dos seus homes deberían situalo nunha situación máis cómoda. Este sábado, ante o Mar del Norte Veteranos, os verdinegros non deixaron mala imaxe. Ordenados, intentanto manter a posesión do balón con Javi e José Pérez na zona de creación e buscando a presenza de Jorge Castro en ataque os de O Leixo foron dende o principio un duro oponente para un adversario que aspira a rematar na parte noble da clasificación. Sen pasar excesivos apuros nos primeiros minutos, o Armenteira Veteranos axiña atopou o camiño da portería dos grovenses. No minuto 26 era quen de colocar na escadra un balón que recibiu no vértice esquerdo da área local. Un auténtico golazo do que apenas tiveron tempo a disfrutar os de A Armenteira, xa que uns minutos despois, Juan Alarcón, aproveitando unha asistencia dun futbolista do Armenteira Veteranos, poñía a igualada. A partires de entón mantívose o equilibrio entre os dous conxuntos, ata que, tras a reanudación, Jorge Castro culminaba unha acción de ataque ante varios defensores rivais enviando o coiro ao fondo das mallas mecas. O resultado que reflectía o marcador non parecía inxusto, tendo en conta os argumentos expostos por un e outro equipo. Tratando de reaccionar, o Mar del Norte Veteranos imprimiulle unha maior velocidade ao xogo e acabouse atopando co premio, máis por erros do rival que por acertos propios. Pablo Camiña, tras unha combinación despois dun saque de banda, e ante a escasa intensidade defensiva, enviaba un suave disparo pegado ao pau esquerdo da meta de Sirra. Non conformes coa igualada os locais foron a pola vitoria e de novo víronse favorecidos polo desacerto do Armenteira Veteranos. O protagonista da remontada sería outra vez Pablo Camiña, que conectou un testarazo na área pequena, sen apenas oposición, poñendo o definitivo tres a dous no marcador. De nada valerían as últimas arremetidas dun Armenteira Veteranos que ademais vía como o seu principal referente ofensivo, Jorge Castro, lastrado por uns problemas físicos, terminaba con moitas dificultades o encontro. Esta derrota deixa ao Armenteira Veteranos na décimo novena posición, con sete puntos, un posto que podería abandonar de vencer no partido da próxima xornada ao Carballo de Portela A.C.D., décimo cuarto clasificado con doce puntos.

O 17 e o 18 de xaneiro A Armenteira vístese de novo de festa polo San Antonio Abad

Poucas figuras son obxecto de tanta devoción e están tan arraigadas na cultura e na tradición occidental como San Antonio Abad. Conta a historia que San Antón naceu nas terras de Exipto aló polo ano 250 despois de Cristo. Fillo de acaudalados campesiños, parece ser que durante unha celebración eucarística escoitou as seguintes palabras de boca de Xesucristo: "se queres ser perfecto, vai e vende todo o que tés e dallo aos pobres". E efectivamente, ao morrer os seus pais distribuíu os seus bens entre os pobres e retirouse ao deserto, onde comezou a levar unha vida eremítica xunto un personaxe chamado Pablo. Despois foi residir xunto a un cemiterio e organizou comunidades adicadas á oración e ao traballo, e volveu retirarse ao deserto, conciliando alí a vida solitaria coa dirección dun mosteiro. Faleceu a unha idade moi avanzada cara o ano 356 a.C. nun lugar próximo ao Mar Vermello. Patrón de tecedores de cestos, fabricantes de pinceis, dos cemiterios, dos carniceiros e carniceiras e dos animais domésticos esta figura ten a súa particular celebración en A Armenteira. O 17 de xaneiro, día propio da festa, pero tamén o día 18, a parroquia vístese cada ano de gala para honrar a un dos santos máis queridos e acude á pequena capela situada no lugar de San Amedio, ao pé da estrada que conduce ao mosteiro cisterciense, da que está separada por apenas medio quilómetro. A dependencia durante séculos dunha economía de base agraria fixo que as xentes da parroquia se encomendasen a San Antón para buscar protección para os seus animais. As vacas, e en menor medida as ovellas, as cabuxas, os porcos e os cabalos foron pouco a pouco desaparecendo da paisaxe de A Armenteira, e hoxe en día teñen unha maior presenza nos fogares mascotas como cans, gatos ou outras especies de carácter exótico. Con todo, a devoción por este santo non decaeu e, especialmente no lugar de San Amedio, pero tamén en Castiñeira, Couso, Cabeza de Boi, As Pereiras ou Gondes, lugares todos eles situados na parte norte da parroquia, os veciños e veciñas teñen marcado no calendario os días 17 e 18 de xaneiro como datas especiais. O programa da festa mantense respecto dos anos anteriores. Así, a misa solemne, que tanto o venres 17 como o sábado 18 terá lugar ás 13:00 horas, irá seguida da habitual procesión, na que non volverán faltar a música e os foguetes. Para rematar, Argimiro Torres, encargarase, como o vén facendo dende fai décadas, das poxas, nas que as persoas asistentes tratarán de levarse os donativos, normalmente en forma de produtos agrarios, que os devotos e devotas ofreceron ao San Antón. A continuación a celebración trasládase aos fogares, onde coma sempre, e cumprindo coa tradición, o día 17 será un ano máis o "día do cocido", mentres que o día 18 volverá ser o "día dos callos". Sen recuperarse aínda totalmente dos excesos das datas de Nadal, as xentes da parroquia intentarán comezar o ano da maior maneira posible, arredor dunha boa mesa, con exquisitos manxares, e na compaña de familiares e amizades, un feito que nesta oportunidade se verá favorecido pola coincidencia na fin de semana desta popular celebración.

O Armenteira C.F. feminino xa coñece o calendario da segunda fase da liga

A delegación de Vigo da Real Federación Galega de Fútbol, na que está inscrito o equipo sénior feminino do Armenteira C.F. deu a coñecer este luns, 13 de xaneiro, o calendario da liga feminina de fútbol-7. As mozas do clube verdinegro, que finalizaron na décimo terceira posición na primeira fase, con trece puntos, terán que medirse nesta etapa da competición a outros seis conxuntos, todos eles de localidades situadas na zona sur da provincia de Pontevedra. Porriño Industrial F.C., Caldelas C.D., Cultural Areas, Colegio Apóstol, S.D. Juvenil Rodosa e San Roque Casablanca serán as rivais que terá en fronte a escadra que dirixe Marcial Prado. A tenor da clasificación na primeira fase o favoritismo correspondería ao Porriño F.C., que rematou na novena praza, con vintedous puntos, pero todo indica que será unha competición aberta e igualada, na que a influencia das lesións e a dispoñibilidade de futbolistas serán determinantes. Para iniciar esta parte da liga o Armenteira C.F. terá que desprazarse ata Ponteareas, onde a próxima fin de semana se medirá á S.D. Juvenil Rodosa, á que vén de superar por dous tantos a cero no último partido que as verdinegras disputaron no ano 2019. Quedan por diante catorce xornadas nas que as de A Armenteira agardan competir con dignidade e, a ser posible, loitar por situarse por posicións privilexiadas da táboa. 

 

Os equipos de fútbol de A Armenteira regresan ao traballo esta semana

Despois dunhas semanas de descanso, nas que tanto as xogadoras do equipo sénior feminino do Armenteira C.F. como os xogadores do Armenteira Veteranos puideron desconectar da competición durante as datas de Nadal, co inicio do ano e a fin das festas chega a volta ao traballo. Ás ceas e comidas familiares, ao turrón, aos mazapáns ou ás copas sucédenlle agora os golpeos de balón e as carreiras pola banda. Sempre son compricados os regresos, e máis cando se trata de categorías de carácter amateur, pero ambos os dous conxuntos contan con experiencia e cunha traxectoria suficientemente longa como para estar acostumados a situacións deste tipo. O primeiro en voltar ao traballo será o equipo sénior feminino, que este martes, 7 de xaneiro, se reincorpora aos adestramentos. O cadro que dirixe Marcial Prado realizará unhas sesións preparatorias coa vista posta na segunda fase da liga. A retirada do campionato do C.D. Arcade F.F., rival das verdinegras na última xornada, permitirá que as mozas do Armenteira C.F. sumen tres novos puntos sen necesidade de vestirse de curto, co cal rematarán esta fase inicial con total de trece puntos. A pesares de non ter que disputar o partido da próxima fin de semana, non haberá tempo para o relax, pois está previsto que a delegación de Vigo da Real Federación Galega de Fútbol, na que está inscrito este clube, dea a coñecer axiña o calendario da segunda fase, na cal, a finais de xaneiro, terán que medirse cos equipos que remataron na parte media-baixa da táboa. Pola súa contra, o Armenteira Veteranos recibe este sábado, 11 de xaneiro, a partires das 16:30 horas, no campo de O Leixo, a un dos favoritos a alzarse co primeiro posto na clasificación da parte inicial da liga. O Newport Cats F.C., da veciña localidade de Portonovo, segundo clasificado, con 33 puntos, é unha das formacións con maior potencial do grupo 2 da Terceira Galicia de Veteranos e conta con serias aspiracións de arrebatarlle o liderato ao Bora Nazaret C.F., do que só o separa un punto. Queda por ver o estado físico dos futbolistas do cadro que capitanea José Luis Galiñañes, que tras tres semanas sen calzarse as botas, e unha vez superados os excesos típicos das datas de Nadal, tratarán de atoparse de novo cunha vitoria que se lles resiste dende o pasado 23 de novembro, cando venceran ao Zacande-Terras de Curro no derbi municipal da liga de veteranos. Oito son as xornadas que restan desta primeira fase para o Armenteira Veteranos, xa que ás sete que lle corresponden hai que engadir o partido fronte ao Godos C.F. Veteranos, que foi aprazada por orde da Federación o 21 de decembro, e que finalmente terá lugar o sábado, 22 de febreiro. O obxectivo dos verdinegros non pode ser outro que finalizar da forma máis digna posible esta primeira fase antes de abordar unha parte final da liga na que parten coa ambición de loitar por situarse nos postos privilexiados da clasificación, sempre e cando as lesións os respecten e os problemas dispoñibilidade de efectivos non supoñan un obstáculo insalvable.

O lugar de Valboa segue sen solución ao problema do alumeado público

Dúas semanas levan agardando en Valboa a que se lle poña solución ao problema do alumeado público. Neste núcleo, un dos máis extensos e que conta cunha maior número de vivendas e habitantes da parroquia de A Armenteira, un problema técnico é o causante de que durante as noites as luces que se sitúan ao pé dos fogares e das vías de circulación permanezan apagadas. Unha situación que repercute ademais na conexión á rede internet, dependente do suministro eléctrico do que provén o alumeado público. Tras poñerse en contacto tanto tanto coas empresas responsables como co Concello de Meis a desesperación dos veciños e veciñas vai en aumento. Segundo se indica dende a institución municipal o problema radica nunha avaría nun contador pertencente á empresa Naturgy, a antigua Unión Fenosa. Os intentos de restablecer o alumeado por parte do Concello resultaron inútiles, pois durante os últimos días un operacio do Concello estívose desprazando diariamente ata Valboa para activar a chave do contador pero, ao chegar a noite, un fallo provocaba que esta volvese a saltar, deixando de novo á aldea sen luz. Por este motivo fai uns días que transmitiron a información da incidencia a Naturgy, e reiteiran que continuarán insistindo ata que esta empresa multinacional non repare a deficiencia. Cabe lembrar que as queixas respecto ao servizo que presta Naturgy estanse convertendo nunha tónica habitual en A Armenteira, como ocurriu a finais do pasado mes de novembro cando en lugares como Castiñeira, Couso, Silván ou O Batán estiveron sen suministro eléctrico ao longo de quince horas. Deficiencias deste tipo, ou como a que están sufrindo no lugar de Valboa, acaban irritando á poboación contra compañía suministradora, tendo en conta o alto prezo a pagar por un servizo que ademais soporta continuas subas ano tras ano.

As noticias máis visitadas de ACVP en 2019

As numerosas publicacións que realizamos ou compartimos en ARMENTEIRA, CON VOZ PROPIA ao longo de 2019 tiveron un seguimento desigual. Os contabilizadores da rede social Facebook ou da páxina Blogger permítennos establecer un curioso ránking.

No caso da rede social Facebook a publicación que contou con maior seguimento foi a vídeo-reportaxe que o programa da RTVE España Directo emitiu o 5 de abril, no que, a través testemuños de Javier Limeres e María Carramal, representantes da Asociación de Veciños e Veciñas de A Armenteira, se abordaba a problemática da presenza de cabalos salvaxes nas leiras de cultivo e nas vías de circulación, ademais doutros aspectos. A publicación acadou as 6.924 visitas. A segunda posición a nivel de visitas ocuparíao a publicación do cartel do IV Festival Armenteira Jazz, realizada o 7 de agosto, que sumaría 2.681 visitas. A continuación, no terceiro posto, estaría a publicación dunha nota informativa sobre a exposición das bases provisionais do proceso de concentración parcelaria, realizada o 11 de xullo, e que alcanzaba 1.634 visitas. Na cuarta posición situaríase unha noticia compartida da edición dixital do Faro de Vigo, que se refería a que a asociación veciñal de A Armenteira buscaba colaboradores e colaboradoras para poñer en marcha un proxecto de horta ecolóxica comunitaria e que lograba a cifra de 1.136 visitas. Finalmente, no quinto posto do ránking estaría de novo unha publicación co cartel do festival Armenteira Jazz`2019, con data de 7 de xullo, e que tivo 1.114 visitas.

En canto á contabilización realizada pola páxina Blogger a publicación que conseguiu un maior número de visitas ao longo do ano 2019 foi a que o 7 de xullo relataba o triunfo do equipo que participou en representación da parroquia de San Lourenzo de Nogueira no I Torneo Interparroquial do Concello de Meis. Esta nova alcanzou 482 visitas. Na segunda posición situábase outra noticia que levantou a gran expectación. É a que se refería o 1 de abril á presenza eses días dun equipo do programa España Directo para gravar unha reportaxe en A Armenteira. O terceiro posto das publicacións, segundo Blogger, sería para unha noticia con escasa base real, pero que a tenor dos indicadores, chamou moito a atención. Trátase dunha das inocentadas publicadas este ano por ARMENTEIRA, CON VOZ PROPIA co motivo do 28 de decembro, na cal se contaba que unha nova comisión relanzaría as festas da parroquia durante o ano 2020. Na cuarta posición dase un empate entre unha noticia publicada o 24 de xuño na que se facía referencia á celebración da tradicional fogueira de San Xoán, adiada a causa das previsións climatolóxicas desfavorables, e na que se mencionaban algúns detalles deste popular festexo, que finalmente tería lugar na noite do 28 de xuño. Co mesmo número de visitas estaría unha publicación realizada o 16 de xullo e referida á exposición das bases da concentración parcelaria na Casa de Cultura de A Armenteira. Para finalizar, no quinto posto do ránking situaríase unha noticia na que se abordaba a celebración do último pleno da anterior lexislatura, que reuniu o 25 de marzo aos membros da Corporación Municipal do Concello de Meis, antes de dar paso á nova representación dos veciños e veciñas saída das eleccións desenvolvidas o 29 de maio.