O Armenteira C.F. confirma a Tilín como adestrador do equipo infantil para a próxima temporada

Valentín Estévez "Tilín", será o encargado de adestrar na temporada 2016/2017 ao equipo infantil do Armenteira C.F. Así o confirmaron os dirixentes do clube verdinegro, que mostraron a total confianza na valía do técnico cambadés para encabezar o proxecto con este grupo de rapaces e rapazas durante a próxima temporada. Tilín incorporouse ao Armenteira C.F. na temporada 2014/2015, na que exerceu como axudante de Jonathan Crespo no conxunto alevín, pasando a ocupar o cargo de primeiro adestrador do equipo benxamín na campaña que vén de finalizar. "Tilín" conta cunha longa traxectoria no mundo do fútbol. Como xogador defendeu as cores do C. Xuventude Cambados, a E.F.B. Vilanova ou o Beiramar C.F. e como adestrador traballou na U.D. San Miguel de Deiro e no C. Xuventude Cambados, antes de integrarse na disciplina do Armenteira C.F. A presentación de Valentín Estévez será este mércores 20 de xullo ás 20:30 horas no campo de O Leixo.